རྔ་སྐོར་རྒྱལ་བྷོ། 2019-08-30
ཇི་འདྲའི་སྙིང་དུ་སྡུག་ཅིང་།།
གཏན་དུ་ཞེ་རྩར་ལྷུང་བའི།།
བྱམས་པ་ང་སར་བཅར་རོགས།།
དྲན་པའི་ཟུག་གཟེར་ལྕི་ཨང་།།
འཇམ་པོ་བལ་ལས་ལྷག་རེད།།
དྭངས་མོ་ཆུ་ལས་གསལ་རེད།།
སྙིང་སྡུག་སྨུག་པ་སྲབ་མོ།།
ཡུལ་འདིའི་ཕྱོགས་བཅུར་རྒྱུ་བ།།
གླུ་དེ་སུ་ཡིས་མ་བླངས།།
ཚིག་དེ་མ་བྲིས་རང་གྲུབ།།
ནམ་མཁའ་དྭངས་ཤིང་སྔོ་བ།།
ཡིད་སེམས་དྲག་ཏུ་སྐྱོམ་བྱུང་།།
ངག་དེ་ཆ་ཡོད་རྒྱུས་ཅན།།
གཟུགས་དེར་འདྲིས་ཤིང་གོམས་པ།།
རྨི་ལམ་ནང་ལ་སླེབས་པའི།།
མ་ཤེས་གསང་བ་དེ་ནི།།
ཁྱོད་ཀྱི་དགོད་སྒྲ་ཨེ་རེད།།
ཁྱོད་ནི་པད་མ་དཀར་མོ།།
ཆར་ནང་ང་རང་སྒུག་པའི།།
བསིལ་འཇམ་རླུང་བུ་དེ་རེད།།
སྙིང་སྡུག་གཡུ་ཆུང་དྲུག་དཀར།།
རྐང་རྗེན་ཐང་དུ་བརྒྱུགས་ཏེ།།
དགོང་དྲོ་ང་དང་ལྷན་དུ།།
མཚོ་ཆུང་མཐའ་རུ་ཞུགས་ཤིང་།།
བརྩེ་བའི་གཞས་ཆུང་གཏོང་བ།།
ལོ་བརྒྱའི་དྲན་པ་རེད་ཨང་།།
མེ་ལོང་གས་འགྲོ་མ་གསུང་།།
ཆུ་མོ་བཞུར་འགྲོ་མ་གསུང་།།
བརྩེ་བའི་ཉི་མ་གཞོན་ནུ།།
སྤང་གི་པང་དུ་གཉིད་ཡོད།།
ས་འདི་ང་ཡི་ཕ་ཡུལ།།
མི་འདི་ང་ཡི་སྙིང་སྡུག།
ལོ་བརྒྱར་ཡལ་དུ་མེད་པ།།
ངེད་གཉིས་མཉམ་པོར་བསྡད་དེ།།
ཟླ་འོད་གདོང་དུ་འཚེར་ཞིང་།།
སྐར་ཚོགས་མིག་མཐར་ཟེགས་པའི།།
མཚོ་མཐའི་མཚན་མོ་དེ་རེད།།
རྩོམ་གསར། 10