འདི་བཅོམ་ལྡན་འདས་སངས་རྒྱས་ནས་ལོ་གང་གི་དུས་སུ་བྱུང་ཞེ་ན།འདུལ་བ་ལུང་གི་ཚིག་རིས་རྣམས་ལ་བརྟགས་ན།སངས་རྒྱས་ནས་ལོ་དྲུག་པ་ལ་ཡབ་སྲས་མཇལ་འཕྲད་མཛད།ལོ་བདུན་པ་ལ་ཆོ་འཕྲུལ་ཆེན་པོ་བསྟན།དེ་ལོར་འདུ་འཛི་ཆེ་བའི་རྐྱེན་གྱིས་དེ་འགོག་ཆེ་དང་།ཡུམ་ལྷ་གནས་སུ་སྐྱེས་པ་དེར་དྲིན་ལན་གསབ་ཆེད་སུམ་ཅུ་རྩ་གསུམ་དུ་བྱོན་ནས་དབྱར་གནས་མཛད་པར་འདུལ་བ་ལུང་གི་དགེ་སློང་མས་སྟོན་པའི་མདུན་དུ་རྫུ་འཕྲུལ་བསྟན་པའི་ལྟུང་བའི་གླེང་གཞིའི་སྐབས་སུ་གསལ་བས་སྐབས་དེར་མུ་སྟེགས་རྫོགས་བྱེད་ཤི་ཟིན་པ་དང་དགེ་སློང་ལྷས་བྱིན་གྱིས་མཚམས་མེད་གསུམ་བྱས་ཟིན་པ་ཡིན་ནམ་བརྟག ཟླ་བ་དང་པོ་ཆོ་འཕྲུལ་དུས་ཆེན་དང་།བཞི་པ་ས་ག་ཟླ་བ།དྲུག་པ་ཚེས་བཞི།དགུ་པ་ལྷ་བབས་དུས་ཆེན་བཅས་ལ་སྟོན་པའི་དུས་ཆེན་རྣམ་བཞི་ཡང་ཟེར།