ལྷ་བབས་དུས་ཆེན།

དུང་དཀར་རིན་པོ་ཆེ།    དུང་དཀར་ཚིག་མཛོད།    2011-05-17

ལོ་ལྟར་བོད་ཟླ་དགུ་པའི་ཚེས་ཉེར་གཉིས་ཉིན་དགུ་པ་ལྷ་བབས་དུས་ཆེན་ཞེས་སྔོན་སྟོན་པ་ཤྰཀྱ་ཐུབ་པའི་ཡུམ་སྒྱུ་འཕྲུལ་མ་ལྷ་ཡུལ་དུ་སྐྱེ་བ་བཞེས་པར་ཆོས་གསུང་ཕྱིར་སྟོན་པ་ལྷ་གནས་སུམ་ཅུ་རྩ་གསུམ་དུ་ཕེབས་ནས་ལྷ་རྣམས་ལ་ཆོས་གསུངས་ཤིང་དབྱར་ཞལ་བཞེས་ཀྱིས་བཞུགས་པར་རྒྱལ་པོ་གསལ་རྒྱལ་སྟོན་པ་དྲན་དྲག་ནས་མོའུ་འགལ་བུ་རྒྱུད་སྟོན་པ་མི་ཡུལ་དུ་བྱོན་པར་གསོལ་བ་ན་སྟོན་པ་ལྷ་མིའི་འཁོར་དང་བཅས་ཏེ་རྫུ་འཕྲུལ་གྱི་སྐས་འཛེག་ལ་བརྟེན་ནས་འཕགས་ཡུལ་གསལ་ལྡན་དུ་བབས་པར་མཛད་པའི་དུས་ཆེན་ཡིན་པས་བོད་ཟླ་དགུ་པའི་ཚེས་ཤར་ནས་ཕོ་བྲང་པོ་ཏ་ལ་དང་གཙུག་ལག་ཁང་ཆེ་ཆུང་སོགས་ལ་སྐུ་དཀར་སྒྲོན་རྗེས་གྲོང་ཁུལ་གྱི་ཁང་པ་སོ་སོར་ཡང་ས་དཀར་བཏང་ནས་ནག་རྩི་ཕྱིས་པ་སོགས་ཚེས་ཉེར་གཉིས་གོང་ཚར་བར་བྱས་ཐོག དེ་ཉིན་བོད་མི་ཚོས་གཙུག་ལག་ཁང་རྣམས་སུ་ཕྱག་མཆོད་དང་།དགེ་འདུན་ལ་བསྙེན་བཀུར།ངན་སློང་ལ་སྦྱིན་གཏོང་སོགས་བྱེད་ཀྱི་ཡོད།ཟླ་བ་དང་པོ་ཆོ་འཕྲུལ་དུས་ཆེན་དང་།བཞི་པ་ས་ག་ཟླ་བ།དྲུག་པ་ཚེས་བཞི།དགུ་པ་ལྷ་བབས་དུས་ཆེན་བཅས་ལ་སྟོན་པའི་དུས་ཆེན་རྣམ་བཞི་ཡང་ཟེར།
  • ལེ་ཚན་སྔོན་མ།:འཇང་དགུན་ཆོས་སྐོར།
  • ལེ་ཚན་རྗེས་མ།:ཆོ་འཕྲུལ་དུས་ཆེན།