རེ་ནག་པོ། 2019-07-26
གྲོང་ཁྱེར་འདིར་མི་ཚོགས་ཀྱི་གྲིབ་མའི་འཁྱག་རོམ་འཕྱུར།
མིག་གི་ཁུང་བུ་རེ་རེའི་ནང་ནས་སྐད་ཆ་བརྡོལ།
ཡིད་གཉིས་སུ་བཞུར་བའི་ཆུ་བོ་དག་རབ་ཏུ་བྲུགས།
མཚན་མོ་ཕྱིར་ལོག་སའི་ཁང་ཆུང་དག་གི
ལྡེ་མིག་ཁོ་ན་བརྗེ་འཚོང་མེད་པར་ཉར།
གྲོང་ཁྱེར་འདིར་ལམ་ཕྲན་མང་བོ་ལག་རྡང་སྦྲེལ།
མི་ཚོགས་ཀྱིས་ཅི་ཞིག་བོར་སོང་བ་ལྟ་བུས།
ཁང་མིག་རེ་རེའི་སྒོ་སྒེའུ་ལས་སྐེ་སོ་བྱེད།
རང་གི་མཆིན་པར་གླན་པའི་དངུལ་ཁུག་ཁོ་ན།
རྒྱུ་མཚན་མེད་པར་གཞན་གྱི་མིག་སྔོན་ནས་རྔོགས་གཤེར་མི་བྱེད།
གྲོང་ཁྱེར་འདིར་ཆགས་སྡང་གི་ཁ་རླངས་འཐིབ།
དེའི་ནང་དུ་སྨིན་པའི་མི་ཚོགས་ཀྱི་བྲོ་བ་ཁ།
ཁོ་ཚོ་ཕན་ཚུན་ཆ་མེད་ཏག་ཏག་ཡིན་པས།
རང་གི་དཔུང་བར་བཏགས་པའི་ཆུང་མ་ཁོ་ན།
འབྲོག་ཁྱིའི་སྐེ་ཡི་འདོགས་ཐག་བཞིན་སིལ་སིལ་གྱིས་དྲུད་དེ་འགྲོ།
གྲོང་ཁྱེར་འདིར་རི་དྭགས་དམེ་བོ་ཞིག་དང་འདྲ་བའི།
འཕྱོན་མའི་ཚོགས་ཀྱི་སྟངས་ཀ་རྒོད་ཅིང་།
དེ་ཚོ་བཀྲུ་ཤད་ཀྱིས་དག་པས་ཀེང་རུས་ལས་ཅུང་ཙམ་སྤོམ།
ཁོ་མོ་ཚོས་རས་ཤམ་གྱིས་གཅུད་པའི་ལང་ཚོ་ཁོ་ན།
ལྟོ་རྒྱབ་གཉིས་ཀྱི་རྒྱལ་ཕམ་གྱི་གཡུལ་སར་བཤམས།
རྩོམ་གསར། 10