མགར་ཐང་དཀར། མཚོ་ལྷོ། 2019-07-18
གློ་བུར་མུན་པ་འཐིབ་ཐེངས་རེར།
ངའི་སྣང་བའི་ཕྱི་ནང་དུ།
གསལ་ལ་མི་གསལ་བའི་སྤྲིན་པ་འཁྲུག
སྤྲིན་པས་ཉི་འོད་སྒྲིབ་ཐེངས་རེར།
འཚང་ཁ་རྒོལ་བའི་མི་ཚོགས་ཀྱིས།
གང་ཟེགས་ཀྱི་དྲན་པ་བཀག
ཆབ་རོམ་གྱི་ཧྲག་བར་ནས།
ང་ཁེར་ཧྲེང་ངེར།
ལུང་པའི་ཕུ་ཐག་རིང་བའི་ག་ཤེད་ནས།
གཉིད་ལ་ཡུར་ནས་སད་མ་ཐུབ།
དུས་དེ་རུ།
རྦབ་རྡོ་དང་གཡའ་མས།
ང་ལ་གནས་ཚང་གསར་བ་ཞིག་བསྐྲུན།
ག་ལེར་ག་ལེར།
སྤྲིན་གྱི་བང་རིམ་ནས་རབ་རིབ་ཀྱི་ཐ་སྙད་གཏོར་ནས།
ཐ་སྙད་ཀྱི་ལྕི་ཡང་ང་ལ་ཤེས་སུ་བཅུག
རེད་དེ།
སྤྲིན་ནང་གི་སྙན་ངག
བདག་སེམས་ཀྱི་གཙང་བོར་ཞུགས་དུས།
ངས་ད་གཟོད་སྐྱོ་བ་གར་དུ་འཁྲབ་ཚར།
ཀྱི་ཧུད།
སྤྲིན་ནང་གི་སྙན་ངག
ཕ་རོལ་ན་ཕ་རོལ་དང་ཕ་རོལ་གྱི་གསང་བ།
ངའི་རྟོགས་འགྱུ་ཡོད་ཚད།
རིག་ལམ་གྱི་མེ་ལ་གཞེས་ནས།
ཆུ་རྐྱང་ཙམ་དུ་གྲུབ་ཟིན།
ཨེ་མ།
སྙན་ངག་དང་སྙན་ངག་གི་བྱེ་བྲག
གཏམ་རྒྱུད་དང་གཏམ་རྒྱུད་མེ་ལོང་།
མིན།
དེ་ནི་མེ་ལོང་ནང་གི་བསྟི་གནས་ཡིན་ལ།
ཤ་ཞེན་གསེར་གྱི་རྨུ་ཐག་ཡིན།
རྩོམ་གསར། 10