སྒོ་རང་གྲོལ། 2019-07-05
ཡུལ་ལ་མཚར་པོ་ལྷ་ཡི་གདུལ་ཞིང་ན།།
སྤྲུལ་བའི་མི་ལ་ལྷ་སྨྱོན་རྡོ་རྗེ་ཞེས།།
ཡུལ་ལ་སྡུག་པོ་དམྱལ་བའི་ཁམས་ཆེན་ན།།
གྲུབ་ཆེན་མི་ལ་སྟོབས་ལྡན་རྟ་ཁྱུང་འདོད།།
ས་ཆེན་ཞབས་ཀྱིས་བཅག་པའི་མི་ཆེན་ལ།།
ཁམས་གསུམ་སེམས་ལྡན་འགྲོ་བའི་མགོན་པོ་ཆེ།།
ལྷག་པར་ཕ་ཡུལ་སྐྱོང་བའི་བླ་ཆེན་ལ།།
དཔལ་ལྡན་བླ་མ་རིག་འཛིན་རྡོ་རྗེར་འདོད།།
ཡུལ་གྱི་སྔ་ཕྱི་མཁྱེན་པའི་རྟོགས་པ་ཅན།།
མི་ཡི་སྐྱིད་སྡུག་ཤེས་པའི་རིག་པ་ཅན།།
སྤྲུལ་བའི་རང་གཟུགས་མངོན་པར་སྟོན་མི་ལ།།
ལྷ་འདུས་དབང་ཆེན་གར་དབང་རྒྱལ་མཆོག་པ།།
མཚན་དཔེའི་དཀྱིལ་འཁོར་མནྡ་ར་བར་གཟིགས།།
ཡུལ་ལུང་གདམས་པས་མཐུན་པ་གཅིག་དུ་འདུལ།།
དགོངས་པ་ཆོས་དབྱིངས་ཞིང་ཐར་རི་ལ་ཐིམས།།
འདི་ནི་བདག་ཡིད་དད་པའི་བླ་མའོ།།
འོན་ཏེ་ང་ནི་རོལ་མོའི་རྟ་ལ་འཁྱུད།།
ཆང་དང་ཉེ་བར་བཅར་ན་དབྱངས་རྟས་འགུག།
རོལ་མོའི་གནས་སུ་ཕྱིན་ན་ཨ་རག་ཞིམ།།
སེམས་ལ་སྐྱོ་བ་སྐྱེ་དུས་ཐ་མག་དྲན།
ལྷག་པར་དམན་ཤར་ལུས་ལ་ཤིན་ཏུ་འདང་།།
དེ་བས་བརྩེ་དུང་ཞེས་པར་དྲག་ཏུ་ཞེན།།
སེམས་ཀྱི་ཁང་པ་ཟེར་ནས་སྤྱི་བོར་འདུད།།
འཇིག་རྟེན་ལས་དབང་བསམས་ནས་སྲོག་ཏུ་བཟུང་།།
འཁོར་བའི་ཐོག་མཐའ་དཔག་མེད་ཡིན་པར་སེམས།།
འདོད་པའི་ཞེན་ཆགས་དོང་སྤྲུགས་ཐུབ་བསམ་མེད།།
ལས་ཀྱི་བྱ་བ་ལུགས་དང་མཐུན་དགོས་བསམ།།
རང་གི་ནུས་པས་བསམ་བཟང་བསྟེན་དགོས་འདོད།།
འདི་ནི་རང་ཡིད་ཆེས་པའི་བདག་ཉིད་དོ།།
གང་ལྟར་བླ་མ་སྙིང་གི་ནོར་བུ་ཡིན།།
ཅི་ལྟར་བདག་ནི་ལམ་གྱི་གཙོ་བོ་ཡིན།།
ལས་སྐལ་མ་རྫོགས་བར་དུ་ཁྱེད་ལ་གུས།།
རྩོམ་གསར། 10