གྱིན་འདའ་བ། 2019-06-28
བརྩེ་ན་བརྩེ་བའི་དུང་སེམས་ལྷུག་པར་དུ་གྲོལ་ཞིང་།།
དུང་ན་དུང་བའི་འཁྲེང་ཞེན་མངོན་པར་དུ་འབུར་ཏེ།།
བརྩེ་དུང་མཛའ་གཅུགས་མེ་ཏོག་ཡང་དག་ཅིག་བཞད་ན།།
ཡལ་མེད་དྲན་པའི་ངོགས་སུ་སིམ་པ་རང་ཐོབ་བོ།།
ཕན་ཚུན་མཛའ་མཐུན་རི་མོ་སེམས་ངོས་སུ་བཀོད་ཅིང་།།
དགའ་སྐྱོ་འཚོ་བའི་ཁ་དོག་འཛུམ་དཀར་གྱིས་བསུས་ཏེ།།
སྐྱིད་སྡུག་འཁོར་བའི་བགྲོད་ལམ་དྲན་པ་ཡིས་བརྒལ་ན།།
དུང་སེམས་བརྩེ་བའི་དྲོད་ཁོལ་དྲན་ངོགས་ནས་འཚེར་ཡོང་།།
དུང་ཞེན་གསེར་གྱི་མེ་ཏོག་ཡིད་ཡུལ་ནས་བཞད་ཅིང་།།
བདེ་སྐྱིད་ཟེའུ་འབྲུ་དྭངས་མ་སྙིང་དབུས་སུ་བདོ་སྟེ།།
མཛའ་གཅུགས་མཐུན་པའི་བརྩེ་སེམས་ལྷད་མེད་ཅིག་མཆིས་ན།།
བརྩེ་དུང་འཚོ་བའི་ཀློང་ལ་དྲོད་ཁོལ་རེ་ཡོད་དོ།།
སྤྱིར་ན་སྐྱིད་སྐྱིད་སྣང་བའི་བརྩེ་དུང་གི་བརྙན་ལ།།
དོན་དམ་བདེ་བའི་བདེ་འབྲས་དེ་ག་རང་མེད་ཀྱང་།།
བག་ཆགས་འདོད་སྲེད་དམར་པོའི་ཞེན་འཁྲིས་ཀྱི་སེམས་པ།།
སྦྲང་བུ་གཤོག་ཐོགས་ཇི་བཞིན་དེའི་རྗེས་སུ་ཉུལ་འགྲོ།།
མེད་ན་དེ་ལ་དགོས་པའི་འཇིག་རྟེན་གྱི་རང་གཤིས།།
ཡོད་ན་སུན་པོ་བྱུང་བའི་བདེ་འབྱུང་གི་གཉེན་པོ།།
དེ་ག་སྡུག་མཚང་ཡིན་པ་མངོན་སུན་དུ་གྲུབ་ཀྱང་།།
ད་དུང་བག་ཆགས་བཙན་པོས་དེའི་ཕྱོགས་སུ་ཁྲིད་འགྲོ།།
མཐོང་ན་རོལ་འདོད་རྒོད་པའི་བརྩེ་དུང་གི་ཟློས་གར།།
མྱོང་ན་གདུག་རྩུབ་ཆེ་བའི་གཟུགས་མེད་ཀྱི་ལྕགས་ཀྱུ།།
ཤེས་ལྡན་གཟུར་བོའི་བློ་ཡིས་ཚད་མས་རང་བརྟག་ན།།
རྨ་མེད་ན་ཟུག་སྟེར་བའི་དུག་མཚོན་གྱི་གཏེ་བོ།།
མཐུན་ན་ཡོད་ཡོད་སྣང་བའི་གནས་སྐབས་ཀྱི་བདེ་དགའ།།
འབྲལ་ན་རང་རང་སྐབས་ཀྱི་སྐྱོ་སྡུག་གི་མྱ་ངན།།
དོན་དུ་ཟག་བཅས་ངང་ཚུལ་ཡིན་པ་རང་རྟོགས་ཀྱང་།།
གོམས་ཆགས་དབང་གིས་དེ་ལ་བཀག་པས་ཀྱང་མི་ཁོག།
མཐོང་ན་བདེན་བདེན་འཆར་བའི་བརྩེ་དུང་གི་འཇའ་ཚོན།།
མྱོང་ཡང་ཐུག་རེག་མེད་པའི་གཟུགས་མེད་ཀྱི་རྣོ་དབལ།།
གཏི་མུག་ཉོན་མོངས་དགྲ་ཡི་ནུས་མཐུ་རང་རྒོད་པས།།
ཀུན་ཀྱང་འདི་ལ་མ་བསླབ་རང་བཞིན་གྱིས་ཆུད་དོ།།
རྩོམ་གསར། 10