ཁོ་བོས།

གཞིལ་མེད་པའི་མེ་དབལ་གྱི་སྟེང་དུ་འཕྱན།

ཡ་མ་བརླ་ཡི་ངག་འཁྱལ་ལད་མོ་བྱས་ཏེ།

སྒྱུ་མའི་ཁམས་སུ་གྱི་ན་བའི་འཚོ་བར་བཅད།

གཞིག་ལ་ཁད་པའི་མྱ་ངན་གྱི་ངུ་བཤུམ་དག

རྒྱུ་སྐར་ལ་ཅེར།

དགུ་ཚིགས་ལ་གཡེང་།

གཞོམ་གཞིག་དབེན་པའི་དྲན་པར་ཉོན་མོངས་

ཀྱིས་གདུ་བའི་སུན་པ་གླན།

རྟོག་ངོར་གཡེར་དྲིལ་གྱི་འགྲོས་ཀྱང་དེ་ལྟ་བུ་ངང་ཡལ།

དཔྲལ་མཚམས་སུ་སྐྱིལ་བའི་སྐྱེངས་ལ་འཛེམ།

ནམ་སྨད་དུ་ལྡོམ་པའི་རྨི་ལམ་ལ་འཁྱུད།

འབྱམས་ཀླས་པའི་འཁང་ར་ཡིས་གཏམས་པའི་མིག་ཀོང་།

དམར་ཙ་རེའི་ཆོ་འཕྲུལ་གྱིས་གཤེར།

སྐྱ་ཉིལ་ལེའི་སྤྲེལ་ལད་ཀྱིས་གཙེས།

སྒྲ་མེད་གསོང་བའི་ཚིག་གིས་བཀྲམ་པའི་གཏན་ཚིགས།

གཅོང་རོང་ཞིག་གི་རུམ་ནས་ཉིན་ཞག་མོད་པོར་རྩེན།

ཁོ་བོས།

བྲིད་པའི་གཤིས་དེར་སྡིགས།

ནོངས་པའི་མཚང་ལ་མཐོལ།

འཁང་ཡུས་གྱོང་བོས་འཚེམ་པའི་རྟོག་འགྱུ་དུབ།

རྣམ་ཤེས་དེ་ཉིད་གཤིན་རྗེར་འཇིགས་ཡེར་ཡེར།

གཏད་སོ་མེད་པའི་ཞེ་འདང་སིལ་བུ་ཞིག

གྲེ་འགྱུར་རབ་རིབ་ཅིག་གི་སྣང་ངོར་བལྟམས།

རྣམ་ཤེས་ཀྱིས་སྤྲུལ་པའི་འཁོར་བའི་ཕུན་ཚོགས།

མཚར་སྣང་དང་སྐྱོ་ངལ་གྱིས་གཅུན།

གང་ཡིན་པ་དེ་ཡང་མིན་པ།

གང་མིན་པ་དེ་ཡང་ཡིན་པ།

བློ་སྒྱུ་མས་འཕྲུལ་ནས་དུབ།

སེམས་རྟོག་པས་སྤྲུལ་ནས་རྨོངས།

ངེས་འབྱུང་བློ་ཞིག་འབྱུང་ཡང་།

བདེ་བས་བཅོམ།

བདེ་བའི་དགའ་བ་བྱུང་ཡང་སྡུག་བསྔལ་གྱིས་མནར།

སྐྱིད་ཡིན་པ་ཤེས་ཀྱང་སྡུག་ལ་སྙེག

སྡུག་ཡིན་པ་སྣང་ཡང་དོར་དབང་མེད།

སྔོན་བསགས་པའི་ལས་ཀྱིས་དེད།

རྗེས་སྨིན་པའི་ལས་ཀྱིས་གཡོག

གྲོག་རོང་གི་དུང་ནག་ནང་ནས།

གྲེ་འགྱུར་རབ་རིབ་ཀྱི་དབྱངས་ཉན་ནས།

མི་ཚེ་མཐར་འཁྱོལ།

དེ་ཡང་རྣམ་སྨིན་གྱིས་བསླེས་པའི་མདུད་པའང་

ལས་ཀྱི་རླུང་བུས་གསེད།

ཆག་གྲུམ་གྱི་ཤེས་པ་ཡང་བྱུང་རྒྱལ་གྱིས་བྲན་དུ་བཀོལ།

ཨེ་མ་ཀྱི་ཧུད་ཀྱི་རོལ་དབྱངས་ལེན་ཏེ་འཚོ་བ་ལ་དུངས།