རྨུ་ཐག 2019-06-21
སྙན་ངག་ཅིག་འབྲི་བསམ་བྱུང་།
ཁོ་མོ་མ་སད་སྔོན་དུ།
ངས་སྙན་ངག་ཅིག་འབྲི་བསམ་བྱུང་།
སྙན་ངག་དེ་གྲུབ་རྗེས།
ཁོ་མོའི་རྒྱབ་གཟུགས་དང་སྲེ་སྟེ།
ནམ་ལངས་ནས་མུན་མ་རུབ་རག་ཏུ།
ངས་སྙན་ངག་དེ་དང་རྒྱབ་གཟུགས་དེ་ལ་ལྟ་འདོད།
དོན་དུ་ཁོ་མོའི་རྒྱབ་གཟུགས་ཤིན་ཏུ་འཁྱག་པས།
ངས་དེ་ལ་སྙན་ངག་གི་གྱོན་པ་ཞིག་གསོལ་འདོད་ཡིན།
དུས་ཚོད་རྐྱང་བ་ཞིག་ལ་སྐྱོ་གདུང་རྐྱང་བ་ཞིག་ལས་ཅི་
ཡང་མི་འདུག་པས།
ཁྱོད་ཀྱིས་དུས་ཚོད་རྐྱང་ལ་དེ་དག་ལ་སྐྱོ་གདུང་རྐྱང་
བ་རིམ་པ་ཡིན་ནམ།
འུ་གཉིས་ཀྱི་ཕ་ཡུལ་ཤིན་ཏུ་འཁྱག་པ་བདེན།
དེའི་ཟོལ་དུ།
ཡུལ་མི་དག་གི་ཁ་སེམས་ཀྱང་འཁྱག་པ་རེད།
སྙིང་ཉེ་་་་་
ཉི་ནུབ་དང་འཆི་འཕོ།
འཆི་བ། འཆི་བ། འཆི་བ།
སྒྱུ་མའི་བ་གླང་དང་རྟ་ཁྱུའི་རྨིག་སྒྲ་རེད།
རྒྱང་ཐག་རིང་བོ་ནས་གྲགས་འོང་བ་དེ།
འཆི་བའི་བརྡ་དང་མིག་ཆུའི་བཞུར་སྒྲ་རེད།
ཉི་ནུབ་དག་ནི་དུས་ཚོད་ཀྱིས་བཟོས་པའི་
ནག་ཉེས་རེད།
ལས་འཕྲོ་མེད་པའི་མི་ཞིག་གིས།
ཨུ་ཚུགས་ཀྱི་ལག་པ་བསྲིངས་ནས།
མེ་ལོང་ངོས་ཀྱི་མེ་ཏོག་འཐུ་བར་འཁྲུལ།
མི་ཞིག་གི་ཉི་ནུབ་གཅིག
ཉི་ནུབ་གཞན་དག་དང་མི་འདྲ་ས་ཞིག་ཡོད་པ་ནི།
རང་ཉིད་གསོན་པ་རྒྱུན་ལྡན་གྱི་གསོན་པ་དང་མ་
འདྲ་བར་སྣང་བས་རེད།
ཉི་ནུབ་དག་ཁེར་རྐྱང་རེད།
དེ་བཞིན། འཆི་བའང་ཁེར་རྐྱང་རེད།
ཁ་གཏད་ཀྱི་མི་ཞིག
འུ་གཉིས་ལ་བར་ཐག་ཅིག་ཡོད་ན།
ཤོག་བུ་ལེབ་མོ་ཞིག་གི་མདུན་རྒྱབ་ལྟ་བུ་རེད།
ཁྱོད་ཀྱིས་བར་ཐག་ཤེས་སམ། ཁ་གཏད་ཀྱི་མི།
ངས་བར་ཐག་གི་གཙང་བོ་ཧུབ་ཀྱིས་འཐུང་འདོད།
བར་ཐག་གཅིག རྡུལ་དང་ནམ་མཁའ་རེད།
བར་ཐག་གཅིག ཁྱོད་རང་མི་གོམས་པའི་འདུ་
འཛོམས་ཆེ་ས་རེད།
རྩོམ་གསར། 10