སྒོ་ཡོན་གྱིས་ཉེ་ཆར་གསར་དུ་བྲིས་པའི་སྙན་ངག་བདམས་བཀོད།

        2019-05-27

སྒོ་ཡོན་གྱིས་ཉེ་ཆར་གསར་དུ་བྲིས་པའི་སྙན་ངག་བདམས་བཀོད།


ངེས་འབྱུང་སྤུ་སུད་མ།  (སྙན་ངག • ཞར་བཀོད་བཅུ་གཅིག)

 

      སྒོ་ཡོན།  (དཀར་མཛེས།)

 

གམ་དུ་སྡོད་པའི་དགའ་མ་ལ།།

མིག་གིས་ལན་མང་བལྟས་པའི་ཚེ།།

རིམ་བཞིན་ཤ་དང་ཁྲག་ཏུ་གྱུར།།

ཤ་ཁྲག་དག་ཀྱང་རུས་པར་ཟགས།།

 

མཐར་ནི་ཀེང་རུས་དཀར་སངས་ལ།།

“སྙིང་ཉེ”ཞེས་པས་བོས་པ་ན།།

འཕྲལ་དུ་བྱད་བཞིན་ལེགས་པ་ཡི།།

ཆགས་པའི་ཁུར་འཛིན་ན་ཆུང་མ།།

སྨིན་མ་དཀྱུས་རིང་དང་བཅས་ཏེ།།

ང་ལ་བལྟས་ནས་དགོད་ཙམ་བྱེད།།


      འགྲུལ་པ།

རང་ཉིད་གཅིག་པུས་སྒོ་ཐེམ་བགོམས་ཏེ།།

ཁང་པའི་ཕྱི་ལོགས་འཆམ་འཆམ་འགྲོ་དུས།།

མདུན་གྱི་ཟམ་ཁར་མ་སླེབས་ཙམ་ལ།།

སྟོན་རླུང་སིབ་སིབ་ཁ་བ་བབས་བྱུང་།།

 

ཁ་བ་མར་མར་འབབ་པའི་ལམ་ཀར།།

གོམ་པ་ཡ་ཡོ་མང་པོ་བོར་ཏེ།།

ཡང་ཡང་རྗེས་སུ་འཁོར་ནས་བལྟས་ཀྱང་།།

སྔར་གྱི་སོང་ཤུལ་རྙེད་ཐབས་མི་འདུག།

 

གལ་སྲིད་སང་ཉིན་ཉི་མ་ཤར་ནས།།

ཉི་འོད་ལམ་ལམ་ས་གཞིར་འཕོག་ན།།

དེ་རིང་བཏོད་པའི་རྐང་རྗེས་དེ་དག།

སླར་ཡང་མཐོང་བའི་སྐལ་བ་ཡོད་དམ།།

 

 མཐའ་མེད་པའི་སྒྲུབ་ཕུག

ང་ཡི་རྟོག་བཏགས་རྒྱ་མཚོའི་དབུས།།

སྙན་ངག་གྲུ་ཆུང་ཡོམ་ཡོམ་སྐྱོད།།

རེས་འགའ་རླུང་གི་འདབ་མར་རྡེག།

རེས་འགའ་ཉི་མའི་རླབས་ལ་རྡུང་།།

 

འཚོ་བའི་གཡོར་ཤིང་རྔམ་ཤིག་ཤིག།

ངག་གི་ཐུ་གུ་དམ་ཧྲུག་ཧྲུག།

སྤྲིན་དང་ཆར་པས“རེ་ཕི”(RAP)ལེན།།

སྨིན་དྲུག་ཉ་མོ་ཆུ་རྩེར་གཡེང་།།

 

དེའི་ཚེ་ཡིད་ཀྱི་སྲིད་པ་ནི།།

རྡུལ་ཕྲན་ལས་ཀྱང་དཔག་ཚད་ཆུང་།།

སུ་ཡང་འཇིག་རྟེན་གྲངས་མེད་ཀྱི།།

མཛེས་པའི་སྙན་ངག་གྲངས་མེད་དོ།།

 

       རི་མོ།

སྟོང་བའི་མཁའ་ལ་བྱེ་མའི་རི་བོ་འབྲི།།

རི་བོའི་དབུས་སུ་འཇའ་དང་སྤྲིན་པ་རྨོ།།

སྤྲིན་པ་གྱ་གྱུར་ཟིམ་པའི་བུ་མོ་ཕབ།།

ཡིད་འོང་ལན་བུ་ཡིད་ཀྱི་རྫིང་བུར་ཞུགས།།

 

དཀར་ནག་ཚོན་གྱི་སྤྲོས་པ་གསལ་ལ་འཚེར།།

དག་པ་སྒྱུ་མའི་སྣང་བ་གཡོ་ཞིང་ལྡེམ།།

 

ཕར་གྱི་རི་མོ་མཛེས་ཤིང་སྡུག་པ་གང་།།

རང་སེམས་རླུང་དང་མཆི་མས་སྦག་ཡོད་དམ།།

 

   དཀྱིལ་འཁོར།

གམ་གྱི་ན་ཆུང་བཞིན་བཟང་མ།།

དོ་ནུབ་ཁྱོད་ཀྱི་མཆུ་སྒྲོས་དམར།།

འགྲམ་པར་རེག་པའི་འོ་དག་ཀྱང་།།

ཨ་མའི་འོ་མ་ལྟར་དུ་ཞིམ།།

སྒྲོལ་མ་ཡུམ་ལས་མཛེས་པ་ཡི།།

ལུས་ཀྱི་དྲི་བཟང་ཐུ་ལུ་ལུ།།

མིག་ཟུང་ཧྲིག་གེར་གསལ་མ་ཐག། 

བ་སྤུ་རྣམས་ཀྱང་ཅིག་ཅར་བཟི།།

བདག་ཀྱང་འདམ་གྱི་ངང་བ་བཞིན།།

ཙོག་པུར་ཁྱོད་ལ་བསྙེས་གྱུར་ཏེ།། 

འདོད་པའི་དངོས་གྲུབ་འབོག་པ་ལ།།

ལུས་སེམས་ཐམས་ཅད་འདར་ཞིང་རྒྱས།།

 

སོ་ཁི་ར་ཐེའི(Socrates)ཆིག་ལབ།

ཡུན་རིང་གནམ་ལ་གཏད་ནས་བསམ་བློ་བཏང་།།

ཉི་འོད་ཐེ་ཚོམ་དང་བཅས་སྨ་རར་འཐོག།

རང་ཉིད་མིན་པའི་རང་ཡང་རང་ལ་འཕྲད།།

ཚིག་ལ་མགུལ་རྒྱན་མ་བསྣོལ་གཅེར་བུ་མ།།

དོན་ལ་སྙིང་བོ་སྟོངས་པ་བྲག་ཆ་ཙམ།།

དགའ་ཞིང་དགོད་པའི་ངང་ལ་གནས་པ་ཚོར།།

དེ་ནི་སུ་ཡིན་སུས་ཀྱང་ག་ལ་རྟོགས།།

ལྷའམ་འཆི་བའི་འཇིངས་སུ་མིད་པར་འགྱུར།།

 

    རྟབ་རྟབ་པོ།

ད་ལྟ་ཕྱི་རོལ་གནམ་གཤིས་ཡག།

སྒེའུ་ཁུང་འགྲམ་གྱི་ལྗོན་པ་ཡང་།།

ཡུན་རིང་འགྲེངས་པའི་ནད་པ་ལྟར།།

གྲག་འགུལ་མེད་པར་ཉི་མར་ལྡེ།།

ཉི་འོད་གཞུང་ལམ་འཁྲིས་ལ་འཕོག།

ལམ་ཆེན་སྟེང་གི་རླངས་འཁོར་དག།

ཕན་ཚུན་བང་ཁ་འགྲན་པ་ཡི།།

རྟ་ཕོ་བཞིན་དུ་ཤར་མར་སྐྱོད།།

 

དུས་ཚོད་འཁྲོལ་བའི་དབྱངས་ཅན་མ།།

དེ་རིང་འདིར་ནི་ལྷགས་གྱུར་ན།།

སེམས་ཀྱི“ཕེར་ཐེ”(party)ལ་རོལ་ནས།།

བྲེལ་བ་མ་ལུས་གླུ་རུ་ལེན།།

 

    མུན་པའི་ནགས་ཚལ།

ང་རང་སྤྱི་ཚོགས་ཀྱི་དམུས་ལོང་གྱུར་པའི་རྗེས།།

ལག་པ་ཡ་གཅིག་གིས་གནམ་ལ་སྤར་ཤད་བྱས།།

སོར་མོའི་རྩེ་མོ་ནི་ཟླ་བར་རེག་ན་ཡང་།།

ཡིད་ཀྱི་མཚོ་ངོས་སུ་ཟླ་གཟུགས་ཤར་མ་བྱུང་།།

 

མུན་པའི་ནགས་ཚལ་གྱི་ཤྭ་བ་ཡུ་མོའི་ཚོགས།།

རྔོན་པའི་མེ་མདའ་ལས་ལྷག་པར་ང་ལ་འཇིགས།།

རང་དབང་ལྕགས་ཀྱུ་ལས་བྱོལ་བའི་འུག་པས་ཀྱང་།།

སྡོང་པོ་ཁེར་རྐྱང་གི་ཕག་ནས་ལྐོག་ལྟ་བྱེད།།

 

ལྷག་རླུང་འུར་འུར་གྱི་མཚན་ལྗོངས་འཁྱག་པོ་འདིར།།

སྣང་བའི་ཆར་ཐིགས་ཤིག་དཔྲལ་བར་ལྷུང་ན་ཨང་།།

 

ཕོར་པའི་ནང་གི་ཞིང་ཁམས།

ཁོ་ཧྥེ་ཁམ་བུ་གང་འདི།།

ཇཱ་ཟིའི(Jazz)རོལ་མོར་བརྒྱུས་ཏེ།།

ཡིད་ཀྱི་བླ་མར་མཆོད་ན།།

བླ་མའི་སྐུ་གསུང་ཐུགས་གསུམ།།

བདག་གི་ལྕེ་རྩེར་བབས་ནས།།

འཚོ་བའི་དངངས་སྐྲག་མ་ལུས།།

བདུད་རྩིའི་ཟོལ་གྱིས་དྭངས་འགྲོ།

 

དོ་ནུབ་དབེན་པའི་གནས་འདིར།།

ང་རང་གཅིག་པུ་མ་རེད།།

 

   འཇའ་ལུས།

རྨི་ལམ་ཐོག་མའི་ནང་ལ།།

ཁྱེད་ཉིད་ཁ་རོག་བུད་སོང་།།

རྨི་ལམ་བར་མའི་ནང་ལ།།

ཁྱེད་ཉིད་ཁ་རོག་བུད་སོང་།།

རྨི་ལམ་ཐ་མའི་ནང་ལ།།

ང་ཡང་ཁ་རོག་བུད་སོང་།།

མཚན་མོ་ཁ་རོག་བུད་སོང་།།

རྨི་ལམ་ཁ་རོག་བུད་སོང་།།

 

  འཆི་བདག་གི་དཔྱིད་ཀ

སྒྱུ་རྩལ་གྱི་གཞུང་ལམ་སྟེང་དུ་མི་མང་པོས་ཕྲེང་བསྟར།།

ལ་ལ་ནི་ལག་པས་བྲང་ཁར་འབྲད་བཞིན་ཆོ་ངེ་འདོན།།

ལ་ལ་ནི་པུས་མོ་ས་ལ་བཙུགས་ཏེ་ཁོང་དགོད་བྱེད།།

ལ་ལ་ནི་མིག་མཐར་མཆི་མས་བརླན་ནས་རྗེས་སུ་ལྟ།།

སྐྱེ་བོའི་ཚོགས་བཤར་བའི་རྒྱབ་ཀྱི་གྲོང་ཁྱེར་སྨུག་པས་བསྒྲིབས།།

མདུན་ཕྱོགས་ཀྱི་ཕར་སྣེ་ཡང་སུ་གང་ལ་ཆ་རྒྱུས་མེད།།

ལམ་འགྲམ་གྱི་གཡས་གཡོན་དུ་མེ་ཏོག་དང་ཚེར་མ་འདར།།

ང་གཅིག་པུར་ལམ་དཀྱིལ་དུ་རྣམ་ཤེས་དང་ལྷན་ཅིག་ལུས།།

 

 ཤི་རྨས་ཐེབས་པའི་སེམས་བསྐྱེད།

ཇི་ལྟར་བལྟས་ཀྱང་གཟུགས་ཀྱི་ཁམས།།

ཁྱོད་ཀྱིས་མཐོང་བ་ལྟར་མ་ཡིན།།

ཇི་ལྟར་སྨྲས་ཀྱང་འཇིག་རྟེན་གནས།།

ཁྱོད་ཀྱིས་བཟླས་པ་ལྟར་མ་ཡིན།།

ཇི་ལྟར་བསམས་ཀྱང་འཚོ་བའི་རྒྱ།།

ཁྱོད་ཀྱིས་འདོད་པ་ལྟར་མིན་པས།།

 

རང་སེམས་གླང་ཆེན་སྨྱོན་པ་ལ།།

ཁྲབ་རྨོག་འཁོར་གསུམ་མི་གདག་པར།།

ཟང་ཟིང་རྩེད་མོ་ལས་ཕྱུང་སྟེ།།

ཅུང་ཟད་ཉི་མར་ལྡེ་ན་ལེགས།།

རྩོམ་སྒྲིག་པ། མགར་རྒྱལ་སྲས།


  • ལེ་ཚན་སྔོན་མ།:གཙང་བོ།
  • ལེ་ཚན་རྗེས་མ།:ལམ་བར་གྱི་མགྱོགས་བྲིས།