གངས་ཆར། 2019-05-05
ཉི་ཟླ་གཉིས་སེམས་སུ་ཉར་ནས། །
རྒྱུ་འབྲས་ཀྱི་རྒྱ་མ་ཉོ་སྐབས། །
འཇིག་རྟེན་དུ་དྲག་རླུང་ལྡང་ནས། །
ཚོར་བ་འདི་དེ་ཙམ་མི་སྐྱིད། །
ཚོར་བ་འདི་རླུང་གིས་འདེད་བཞིན། །
དྲན་པ་འདི་ཁ་བས་གཡོགས་འདུག །
དབྱར་ཁ་འདིར་ཆར་སྒྲ་མི་འདུག །
མིག་ཆུ་ནི་སེམས་ཀྱི་སྐྱོ་ཚུལ། །
ལས་དབང་གི་ཐ་སྙད་སྐྱུར་མོར། །
བརྩེ་སེམས་ཀྱི་ཁ་བ་བབས་སོང་། །
ཉིན་མཚན་གྱི་འཁོར་ལོའི་གསེང་ནས། །
རི་ཀླུང་ཡང་མིག་ཆུ་ཤོར་འདུག །
ལས་དབང་ནི་བརྩེ་བ་རྡོག་གཅིག །
གནམ་ས་ཡི་བར་དུ་གནས་ཡོད། །
མེ་ཏོག་གི་དྲི་བསུང་ཁྱབ་པ། །
བརྩེ་སེམས་ཀྱི་མེ་ལྕེ་སྦར་དུས།
ཁ་བ་ཡི་བརྩེ་བ་རེག་བྱུང་། །
འཚོ་བ་ནི་རྒྱ་ལམ་འགྲུལ་པ། །
མི་ཚེ་ནི་དུས་ཀྱི་མགྲོན་པོ། །
མགྲོན་པོ་དང་མགྲོན་པོ་མི་འདྲ། །
མི་ཚེ་ནི་མགྲོན་ཁང་འདྲ་པོ། །
གཏན་འཇགས་སུ་སྡོད་དབང་མི་འདུག །
དབྱར་གྱི་ཆར་དགུན་གྱི་རླུང་བུ། །
རི་དང་ཀླུང་ལ་དང་མཚོ་ཆེན། །
རིམ་པ་ནས་རིམ་པར་བརྒལ་ཏེ། །
འཚོ་བ་ཡི་ལམ་དུ་བཞུད་སོང་། །
དཀའ་ངལ་གྱི་ལས་ལ་བརྩོན་སོང་།
ཉི་ཟླ་གཉིས་རྒས་པའི་ཤུལ་དུ། །
མཉམ་གཤིབས་ཀྱི་ལོ་ཟླ་དཀོན་ཡང་། །
བརྩེ་བ་ཡི་མེ་ཏོག་བཏབ་ཡོད། །
ཚོར་བ་འདི་རླུང་གིས་དེད་ཀྱང་། །
མ་འོངས་ནི་འོད་ཟེར་སྟོང་ལྡན། །
འཚོ་གནས་ཀྱི་ལམ་དུ་བཞུད་དུས། །
རྒྱུ་འབྲས་གཉིས་རྒྱ་མར་བཀྱག་རོགས། །
རྩོམ་གསར། 10