དབུས་ཀྱི་ལྷ་ལྡན་ཞིང་ནས།།

གཙུག་ལག་ཆོས་ཀྱི་སྲུང་མ།།

རྒྱལ་མོ་དམག་ཟོར་ལྷ་མོ།།

དེ་རིང་ཁྲོས་པ་མ་གནངས།།

ཇོ་ཇོ་ཡིད་བཞིན་ནོར་བུས།།

སྐུ་སྲུང་རྫོང་བཙན་དམར་པོ།།

ས་དེ་གྲིབ་ཚེའི་སྒང་ནས།།

དེ་རིང་གཟིགས་པ་གནངས་དང་།།

རྫོང་བཙན…

མཇལ་འཕྲད་གསེར་ལས་དཀོན་པའི།།

བཅུ་པའི་བཅོ་ལྔའི་ཞོགས་པར།།

སྙིང་སྡུག་དཔལ་ལྷ་དྲག་མོ།།

རྒྱང་ནས་མཐོང་བ་ཨེ་བྱུང་།།

དཔལ་ལྷ…

ཤི་འབྲལ་བྱས་ན་མ་གཏོགས།།

གསོན་བྲལ་ཞེ་ནས་བོར་བའི།།

ཕོ་རྒོད་རྫོང་བཙན་དམར་པོས།།

ཁྱེད་རང་བསྒུགས་པ་མཐོང་ངམ།

རྫོང་བཙན…

ལས་འཕྲོའི་དར་སྐུད་འབྲེལ་བའི།།

གཙུགས་ལམ་སྒོ་འཕྱོར་ནང་གི།

ཆུང་མ་ཨུཏྤལ་དམར་པོ།།

ཁྱེད་ཕྱོགས་འཁོར་བ་གཟིགས་སམ།།

དཔལ་ལྷ…

དེ་རིང་བཅོ་ལྔའི་ཞོགས་པར།།

སྐྱིད་ཆུའི་ཁ་གཏད་སྒང་ན།།

ན་གཞོན་དཔའ་རྩལ་ཅན་དེའི།།

ཞེ་འདྲིས་ཁྱེད་རང་བསྒུགས་འདུག།

རྫོང་བཙན…

དབུས་ཀྱི་མི་ཚོགས་ལང་ལོང་།།

དགེ་འདུན་ཚོགས་ཁང་གམ་ནས།།

ཁྱོ་ཤུག་ཁྱེད་གཉིས་གླེང་བ།།

ཨམ་ཅོག་ཁོག་ཏུ་བྱུང་ངམ།།

དཔལ་ལྷ…

དགུན་གྱི་བུ་ཡུག་ལྡང་ཡང་།།

མཛའ་བརྩེའི་ཉི་མ་དྲོ་བའི།།

སྟག་ཤར་རྫོང་བཙན་དམར་པོས།།

ཁྱེད་རང་མཐོང་བར་བྲེལ་འདུག།

རྫོང་བཙན…

མ་ཡུམ་དམག་ཟོར་རྒྱལ་མོས།།

བཀའ་ཁྲིམས་རི་ལས་ལྕི་ཡང་།།

ཉིན་ཞག་ཕྲུག་གཅིག་གནང་བ།།

སྐྱོ་གདུང་ངང་ནས་མ་འདའ།།

དཔལ་ལྷ…

འུ་གཉིས་མཇལ་འཕྲད་དཀོན་ཡང་།།

བརྩེ་འདང་ཆུ་ལས་རིང་བའི།།

ལས་འཕྲོའི་དམ་རྟགས་དམར་པོ།།

སང་ལོའི་བཅུ་པར་སྦྲེལ་ཆོག །