ལྷོ་སྨོན། 2019-03-18
སྟོན་རླུང་ངར་མ་ལྡང་སོང་། །
ལོ་སེར་ས་ལ་ལྷུང་སོང་། །
སྐྱོ་བའི་མིག་ཆུ་ཕྲ་མོ། །
ས་གཞིའི་རུམ་ལ་སྦས་སོང་། །
སྟོན་ཁའི་ལོ་ལེགས་ཡག་སོང་། །
འབྲས་བུའི་མེ་ཏོག་འཐོར་སོང་། །
མི་རྣམས་དགའ་བས་མྱོས་པའི། །
གླུ་སྒྲ་རྣ་བར་སྙན་སོང་། །
ལྗང་མདོག་འཇིག་རྟེན་དྲོད་མོ། །
སེར་པོའི་གོས་ཀྱིས་གཡོགས་སོང་། །
དགུན་རླུང་གྲང་མོ་བསམ་དུས། །
སེམས་པ་འཁྱགས་ལ་བཏང་སོང་། །
སེར་མདོག་ཞིང་འདི་ཡལ་རྗེས། །
སྐྱ་བོའི་ཐང་དེ་དྲན་འོང་། །
ཁ་བའི་འདབ་མ་བསམ་དུས། །
བརྩེ་བའི་འཛུམ་ཆུང་ཤོར་འོང་། །
ལོ་འདབ་རླུང་པོས་འཁྱེར་སོང་། །
ཁུ་བྱུག་མོན་ལ་ལོག་སོང་། །
གཞན་ཡུལ་འགྲིམ་པའི་བུ་ཆུང་། །
ཕ་ཡུལ་དྲན་པས་སྐྱོ་སོང་། །
ཉི་མ་འཆར་བཞིན་བཞུད་འགྲོ།།
མེ་ཏོག་བཞད་བཞིན་སྐམ་འགྲོ། །
མི་ཚེ་སྤྱོད་བཞིན་ཟད་འགྲོ། །
ལྡོག་མེད་འཇིག་རྟེན་ཆོས་ཉིད། །
རྩོམ་གསར། 10