གངས་ཆབ་སྔོན་མོ། 2019-03-11
ཧ་ཅང་སྡུག་པོའི་ཟོལ་གྱིས་ས་སྲོད་ཀྱི་པང་དུ་འཐོར།
ས་ཕྱོགས་ཀྱིས་བཅད་པའི་གདུང་བ་མག་མོག
ཤ་དང་རུས་པའི་ལྷུ་ཚིག་ལས་གྱེས་ཏེ།
ལ་མོའི་ཕར་རྒྱབ་ཀྱི་མེ་ལོང་ལྟ་བུའི་མཚེའུ་ནང་དུ།
ར་རིའི་དྲི་མ་མེད་པར། ཉིན་ནས་ཟླ་རུ་འཛུམ།
ཡ་གིའི་རི་ཟོམ་ལ་དཔྱངས་པའི་ཚེས་རིས་འཁྱོག་པོ།
འ་འུར་དང་ཟོལ་སྦྱོར་གྱི་ཀློང་ནས་ང་ཡི་སྨྱུག་རྩེར་ལུད།
ཟ་འོག་གི་རིས་སུ་བཀྲ་བའི་གཡང་སྡེ་གོར་མོ་དེའང་།
ཞ་རེངས་སུ་གྱུར་བའི་ལོ་ཟླ་དུ་མར་རྒས་ཤིང་འཁོགས།
ཝ་ལེར་བསམ་གྱིན་བསམ་གྱིན་ཡ་ང་བའི་མཚན་མོ་དེ།
ཛ་དྲག་ཏུ་གྱུར་ནས་སླར་ཡང་ཡལ་སོང་བའི་ངོ་གདོང་དེ
ཚ་བ་ཀེམ་ཀེམ། གཟེར་བསླང་བསླང་དུ་སྣང་བ་ནི།
ཙ་རིའི་སྨྱུག་སོས་རྐང་མཐིལ་ཕུག་པ་ལྟར་སྣང་།
མ་བཅོས་ལྷུན་གྲུབ་ཀྱི་གཙང་ཆུའི་ངོ་བོ།
བ་སོས་བརྒྱན་པའི་མེ་ལོང་དུ་དྭངས་ཤིང་གསལ།
ཕ་གིའི་སྡེ་འདབས་ནས་མཆེད་པའི་ལ་གཞས་སྙན་མོ།
པ་ཏྲའི་རི་མོ་ལྟར་སེམས་འགྱུའི་གཏིང་རིམ་ནས་ཡར་ཡར་འཕྱོ།
ན་ཚོད་ཀྱིས་བསྒོས་འོང་བའི་སེམས་གཅོང་དེ་ཀོ།
ད་ཆར་བསྐྱར་ཡོང་མེད་པའི་དུས་ཚོད་དེ་ཀོ།
ཐ་དད་དུ་སྣང་བའི་སྟོང་ཉིད་ཀྱི་ཐིག་ལེ།
ཏ་ལེན་བྱེ་བ་དགུ་སྟོང་མེ་རུ་བསྲེགས་པ་ཙམ་མོ།
ཉ་གང་ཟླ་བ་དེ་སྐྱོ་བ་སངས་བྱེད་ཀྱི་ནོར་བུ་ཞིག་ཡིན་ནམ།
ཇ་ཡུན་ཙམ་ལའང་ཡལ་བར་སྙམ་པའི་ཐེ་ཚོམ་ནི།
ཆ་བྱད་མ་རྫོགས་པའི་ངོ་གདོང་གཞན་ཞིག་སྟེ།
ཅ་ནེ་ནང་གི་རླངས་པ་ཐོལ་ཐོལ་དེའོ།།
ང་ཡི་རྟ་མཆོག་དེ་གར་སོང་།
ག་ལེར་ཡལ་གྱིན་པའི་སྣང་བརྙན་མཐའ་དག
ཁ་བའི་རང་མདངས་དཀར་པོ་ཇི་བཞིན།
ཀ་ཏོ་ར་ལྟ་བུའི་ང་ཡི་ཀླད་ཕོར་དུ་ཡང་ཡང་སྐྱོམས་ཤོག
རྩོམ་གསར། 10