སྲད་འདབ་གསར། 2019-02-22
ལོ་རྙིང་རྒད་པོའི་སློག་ཐུལ་དེ།།
ཚོམ་མེད་དོར་ཅིང་བྱ་རྨྱང་བྱས།།
གསར་བཞད་དཔྱིད་དཔལ་མེ་ཏོག་དེ།།
འཐུ་བར་ཆས་འགྲོ་ན་གཞོན་ཚོ།།
འབྲུག་རིས་པི་ཝང་རྒྱུད་སྐུད་ལ།།
སོར་མོས་གཡས་དཀྲོལ་གཡོན་བསྣན་བྱས།།
བཀྲ་ཤིས་དབྱངས་ཀྱི་སྙན་ཆའི་ཁྲོད།།
ལོ་སར་བསུ་བའི་དགྱེས་སྟོན་མཛད།།
འདི་ལོ་ཁ་བའི་འཆི་ཐག་དེ།།
རྨུ་ཐག་ཇི་བཞིན་ལྷག་པར་རིང་།།
དཀར་མཛེས་ཁ་བའི་ལྷ་དར་ཁོང་།།
ལོ་སར་བསུ་བར་བསྡད་དམ་དོགས།།
རབ་རོབ་དགུ་ཐུག་སྟོན་མོ་དེ།།
གནོད་ཅན་སྲིན་མོའི་རྒྱགས་ཕྱེར་བརྫངས།།
གདོན་འདྲེ་ཀླུད་ཀྱི་རྟ་ཕོར་བཀྱོན།།
ལ་རྒྱབ་མྱ་ངམ་ཐང་ལ་སྤྱུགས།།
བྲེད་ཚིག་ཀི་སྒྲའི་ང་རོའི་ཁྲོད།།
གེགས་བར་གྲིབ་གཟུགས་མེ་ལ་བསྲེགས།།
ཤོག་སྦག་འུར་གྱི་འཁྲུག་ཆའི་ཁྲོད།།
ཆག་སྒོའི་ཟ་འདྲེ་རྐུབ་ཚག་ཤོར།།
གཡའ་དག་གནམ་གང་ནམ་མཁའ་ན།།
དུ་བའི་ཕུག་རོན་ལྡིང་སྐོར་བརྒྱབ།།
མེར་བསྲེགས་ལུག་མགོའི་དྲི་ཞིམ་ཐུལ།།
བཀྲ་ཤིས་རྟགས་བརྒྱད་ལོ་སར་བསུ།།
ཐོ་རངས་བྱ་ཕོ་ཚ་ལུ་ཡིས།།
སྐྱ་མདའ་ཤར་ཟེར་ངག་རྩལ་ངོམས།།
ཆུ་ཕུད་ནོར་གྱི་ཕྱྭ་གཡང་བཀུགས།།
རྩམ་པའི་དར་གྱིས་ལོ་སར་བསུ།།
ཟབ་ཡངས་ཆུ་གཏེར་འགྲམ་ངོགས་ནས།།
རྟ་ལྗང་འཁོར་ལོ་དལ་གྱིས་འཕགས།།
ས་འཛིན་གྱད་མིའི་དབུ་རྩེ་རུ།།
ཉི་ཟེར་བྱ་གླག་དལ་གྱིས་འགྱིང་།།
སློབ་དཔོན་པདྨའི་བདུད་རྩིར་སྐད།།
ཆུ་མིག་འགྲམ་དུ་ལྷ་བསང་བཏང་།།
ཆུ་ཁུང་ཟུར་ནས་ལྷ་རྒྱལ་འཐེན།།
ལོ་སར་དུང་བརྡ་རིམ་བཞིན་གྲགས།།
བདེ་ལྡན་དྲོ་འཇམ་མལ་ས་རུ།།
ཨ་མས་ཞིམ་པོའི་ཆང་བསྐོལ་བླུགས།།
ད་ནི་མ་ཉལ་ཕྱོགས་སུ་ལྟོས།།
དགའ་སྤྲོའི་འཛུམ་གྱིས་ལོ་སར་བསུ།།
རྩོམ་གསར། 10