མཁས་གྲུབ་ནོར་བུ། 2019-02-18
མཐོན་མཐིང་ཨ་སྔོན་དབྱིངས་ནས་སྤྲིན་དཀར་ལྷ་རས་དཀར་པོའི་དར་ཟམ་བརྐྱངས།།
དོག་མོ་ས་གཞི་ཡངས་པོར་མཛེས་སྡུག་ཁ་བ་དཀར་པོའི་གོས་བཟང་བཀླུབས།།
གང་འདོད་རེ་འབྲས་སྨིན་པའི་ལོ་རྙིང་ས་ཕོ་ཁྱི་ལོ་ཕར་སྐྱེལ་ཏེ།།
ཡིད་སྨོན་ཕུགས་རེས་བཀང་བའི་ས་ཕག་གནམ་ལོ་གསར་ཚེས་མདུན་བསུ་འོ།།
རྒྱལ་ཁབ་འབྱོར་ཕྱུག་ལྡན་ཞིང་སྤྱི་ཚོགས་དར་ཞིང་རྒྱས་པ་དབྱར་ཀའི་མཚོ།།
མི་རིགས་མཐུན་སྒྲིལ་དམ་ཟབ་འགྲོགས་བདེ་མཛའ་བརྩེའི་འོ་ཆུ་གཅིག་ཏུ་འདྲེས།།
འཛམ་གླིང་ཞི་བདེའི་ཉི་འོད་རིས་མེད་གླིང་གྲུ་ཀུན་ཏུ་སྤྲོ་མཛད་ཅིང་།།
རྗེ་འབངས་མི་སེར་ཚོགས་ཀྱི་བདེ་སྐྱིད་འཚོ་བའི་ལོངས་སྤྱོད་ཕུན་སུམ་ཚོགས།།
རྒན་རབས་ཉམས་མྱོང་མཁན་པོ་སྐུ་ཉིད་སྙུང་གཞི་ཀུན་བྲལ་རིང་འཚོ་ཞིང་།།
དར་མ་འཇོན་ཅན་ཚོགས་ཀྱི་གང་བྱེད་སེམས་ཀྱི་ལམ་ཐིག་བརྒྱུད་དང་ལྷན།།
གཞོན་བྱིས་བློ་གསལ་ཅན་དག་རིག་པའི་སྒོ་མོ་འབྱེད་ལ་ཐོགས་མེད་ཅིང་།།
གང་དག་འཕྲིན་ལས་སྒྲུབ་མཛད་ཅི་བསམ་ཡིད་བཞིན་གེགས་མེད་འགྲུབ་གྱུར་ཅིག།
བཀྲ་ཤིས་གནམ་ལོ་གསར་ཚེས་བསྐལ་བཟང་རྟེན་འབྲེལ་ཚོགས་པའི་བཀྲ་ཤིས་ཤོག།
བཀྲ་ཤིས་རྒྱལ་ཁམས་དར་ཞིང་འབངས་མི་བདེ་ལ་འཁོད་པའི་བཀྲ་ཤིས་ཤོག །
བཀྲ་ཤིས་ཅི་བསམ་ལྷུན་འགྲུབ་དགེ་མཚན་འབུམ་གྱིས་ཕྱུག་པའི་བཀྲ་ཤིས་ཤོག །
བཀྲ་ཤིས་དགེ་ལེགས་དཔལ་འབར་འཛམ་གླིང་ཞི་ཞིང་འཇགས་པའི་བཀྲ་ཤིས་ཤོག།
རྩོམ་གསར། 10