སྨག་སེལ། 2019-01-21
སྤྲིན་དཀར་འཇའ་རུ་ཤར་བའི་དབྱར་གཞུང་དུ།།
སྦྲ་མཐའི་ལ་གཞས་ཆ་གཅིག་སྙིང་ལ་སིམས།།
ལྷུང་ལྷུང་གཙང་བོའི་འགྲམ་གྱི་མེ་ཏོག་ཀྱང་།།
ང་ཡི་སེམས་ཀྱི་ཕྱི་ནང་གཉིས་ཀར་ཐིམས།།
ཉིན་ཞག་རྫོགས་མེད་ཅིག་གི་རྨི་ལམ་ལས།།
བྱམས་པའི་བཞིན་རས་ངོས་ཀྱི་འཛུམ་ཀོང་གྲོལ།།
ལྡེམ་ལྡེམ་གར་གྱིས་རྩེན་པའི་ལང་ཚོ་ཡང་།།
རྟོག་པའི་གུར་ཁྱིམ་དབུས་ན་རྟག་ཏུ་མཛེས།།
འཛུམ་ཆུང་བག་མར་བསུ་བའི་ལོ་ཟླའི་ཁྲོད།།
དུངས་བའི་ཡིད་ཀྱི་འཇོལ་ལོ་སྙིང་ལ་བཅངས།།
སྙན་སྙན་རྒྱུད་མངས་སྟོང་གི་དབྱངས་རྟ་ཡང་།།
བདག་གི་ཚེ་རབས་ལས་ཀྱི་དྲན་ཤིང་ཡིན།།
ཉིན་མཚན་ལོ་ལས་རིང་བའི་དུས་ཚིགས་སུ།།
དྲན་པའི་གླེགས་བམ་ཞིག་གི་དབུ་ཁྱུད་བྲིས།།
ཁྲེལ་གཞུང་ཕྱི་ཐག་ཅན་གྱི་བྱམས་པ་ལ།།
ཞིམ་མངར་གཏམ་རྒྱུད་རེ་རེ་གླུ་རུ་བླངས།།
སྙིང་གི་སྒྲོམ་དུ་བཅུག་པའི་གསང་ཨང་ལས།།
དུངས་བ་དབྱངས་ལ་དཀྲིས་པའི་མགུར་མོ་དང་།།
འཁོར་བའི་རྨི་ལམ་ཐང་གི་བརྩེ་སྒྲུང་གཉིས།།
ས་མཐའི་རོགས་ལ་ཕུལ་བའི་ལེགས་སྐྱེས་ཡིན།།
དགའ་སྐྱོ་ཕྲེང་བར་བརྒྱུས་པའི་སྙན་ངག་གིས།།
གདུང་བའི་ན་ཟུག་དག་ཀྱང་ཤུགས་ཀྱིས་གྱེར།།
ཞེ་སེམས་ཆང་ལ་བསྒྲེས་པའི་སྨྲེང་གླུ་ཡིས།།
ལོ་ཟླ་ཁེར་རྐྱང་ཞིག་གི་གནས་མལ་བསྐྱལ།།
རྩོམ་གསར། 10