བུད་མེད་ནི།

རྨི་ལམ་བཞིན་རྨིས་ཀྱང་།

ཐོབ་དཀའ་བའི་སྒྱུ་མ་ཞིག་ཏུ་གྱུར།

བུད་མེད་ནི།

ཉན་བཞིན་པའི་རོལ་དབྱངས་ཤིག

སྐབས་འགར་ངལ་དུབ་ཀྱི་སུན་སྣང་སྐྱེས།

བུད་མེད་ནི།

རྩྭ་ཐང་གི་རྟ་ཕོ་བཞིན།

སུས་ཀྱང་ལོངས་སྤྱོད་ཆོག་པའི་གཡོག་འཁོར་ཡིན་ནམ།

བུད་མེད་ནི།

མཁའ་དབྱིངས་ཀྱི་འཇའ་ཚོན་བཞིན།

རེག་ཏུ་མེད་པའི་བསླུ་བྲིད་ཡིན་ནམ།

བུད་མེད་ནི།

ལུ་གུ་བཞིན་སེམས་ཀྱིས་བསྲུངས་ནས།

ཉིན་གྱི་བྱ་ར་དང་མཚན་གྱི་མེལ་ཚེ་བྱས།

བུད་མེད་ནི།

ཉི་ཟླའི་འོད་སྣང་བཞིན།

དྲོད་བསིལ་གྱི་དབྱར་དགུན་གཉིས་ཡིན།