དབྲ་སྤྲུལ་ཚུལ་ཁྲིམས་དྲི་མེད་རྣམ་རྒྱལ་མཆོག་གི་མཛད་རྣམ་བསྡུས་པ།

དབྲ་དཀར་གཞན་ཕན་ཤེས་རབ།        2019-01-04

དབྲ་སྤྲུལ་ཚུལ་ཁྲིམས་དྲི་མེད་རྣམ་རྒྱལ་མཆོག་གི་མཛད་རྣམ་བསྡུས་པ།

    དེ་ཡང་དམ་པ་འདི་ནི་འཛམ་གླིང་ཡུལ་གྱི་སྙིང་པོ་དྲུག་གི་ཡ་གྱལ་ཕྲོམ་གེ་སར་གྱི་སོ་མཚམས་ཤར་ཟླ་ལུང་རིང་མོའི་ཡུལ་གྲུ་གནས་ཆེན་ཉེར་ལྔའི་ནང་ཚན་རྫ་ཁྲ་ལྡོམ་ཝེར་སྙིང་མི་འགྱུར་གྱི་རི་ཕྲན་བླ་རི་གཉེན་ཆེན་རི་བོའི་ཉེ་ཕྱོགས་སུ་གཤེན་གྱི་འབྱུང་ལྡན་སུམ་བརྒྱ་གཅིག་གི་ལོ་རབས་གསུམ་པ་སྟེ་མེ་སྟག་སྤྱི་ལོ༡༩༨༣ལོར་ཡབ་ཚེ་རྡོར་དང་། ཡུམ་གཡང་རིལ་གཉིས་ཀྱི་སྲས་སུ་སྐུ་འཁྲུངས། ལྷུམས་སུ་ཞུགས་པ་དང་སྐུ་བལྟམས་པའི་དུས་སུ་རྟེན་འབྲེལ་ལེགས་པའི་ཚུལ་གྱིས་མཁའ་ལ་འཇའ་ཚོན་བཀྲ་བ་དང་ཡུལ་ཁམས་བདེ་བའི་རྟགས་བྱུང་ཡོད་པར་མ་ཟད་སྐུ་ཕྲེང་མང་པོའི་རིང་ནས་བསྒྲུབས་པའི་བསྟན་སྲུང་ཨ་བསེ་རང་བཞིན་གྱིས་འཁོར་བའི་བརྡ་ཨ་བསེའི་བླ་བྱ་འུག་པ་མང་པོས་འབྲོག་ཁྱིམ་སྐོར་བ་སོགས་བྱུང་བས་ཁོང་གི་ཡབ་རྒན་ལ་རྟོག་པ་སྐྱེས་ཏེ་ཡུལ་དེའི་སྐྱབས་མགོན་སྔ་འགྱུར་རྙིང་མའི་མཁན་ཆེན་ཐུབ་བསྟན་ནོར་བུ་རིན་པོ་མཆོག་ལ་སྙན་ཞུ་ཕུལ་སོང་སྐབས། བླ་མས་བུ་དེ་བོན་པོའི་བླ་སྤྲུལ་ཞིག་གི་རྣམ་སྤྲུལ་ཡིན་པས་བཙོག་ཤོར་མི་ཉན་ཚུལ་སོགས་ལུང་བསྟན་རྒྱ་ཆེར་གསུངས། དེ་ནས་བརྡ་འཕྲད་ཙམ་གྱི་སྐབས་ནས་མ་བསླབ་རང་བརྡོལ་ཚུལ་དུ་སྨྲ་སེང་བསྙེན་པ་དང་སྙིང་པོ་རྣམ་གསུམ་སྐུ་གསུང་ཐུགས་ཀྱི་སྙིང་པོ་སོགས་ཞལ་ནས་གསུངས་པ་དང་། བྱོན་ཐུབ་ཙམ་ནས་ཐུགས་ལ་བབས་མིན་བྱུང་ན་ང་སྟེང་ཆེན་དགོན་དུ་འགྲོ་ཡིན་གསུངས་ཏེ་བྱོན་ཚུལ་བསྟན་པར་མཛད། བར་སྐབས་ཤིག་ལ་སྙུང་གཞི་ཐེབས་ཏེ་ཤར་རྫའི་གདན་སར་ཉག་བླ་གཡུང་དྲུང་བསྟན་འཛིན་ཞེས་རྫོགས་པ་ཆེན་པོའི་རྣལ་འབྱོར་བ་ཞིག་བཞུགས་པའི་མདུན་དུ་ཡབ་ཡུམ་གཉིས་ཀྱིས་སྐྱབས་ཞུས་ཚེ་དབང་དང་ཁྲུས་སོགས་མཛད་ནས་བུ་འདི་མི་འདྲ་བ་ཞིག་འདུག་གསུངས། དགུང་ལོ་གསུམ་ཙམ་ནས་ཁོང་གི་སྐུ་ཡི་མཆེད་ཟླ་མཁན་པོ་བུམ་པ་ཞུ་བའི་ར་སྐོར་དགོན་པའི་བླ་མ་ཞིག་ཡོད་པ་དེའི་གམ་ནས་ཡི་གེའི་འབྲི་ཀློག་བསླབས་ཏེ་ཚེགས་མེད་དུ་མཁྱེན། དགུང་ལོ་བཞི་པ་ས་སྦྲུལ་ལོ་ཚུལ་ཆེན་ཐེག་མཆོག་བསྟན་པའི་ཉི་མ་མཆོག་གི་བརྡ་ཡིག་གིས་ལུང་ལྟར་སྤྲུལ་སྐུ་ངོས་ཟིན་ནས་མི་རིང་བར་སྟེང་ཆེན་དགོན་གྱི་བླ་གྲྭ་རྒན་རིམ་རྣམ་པ་དང་རྟོགས་ལྡན་ཚུལ་ཁྲིམས་བསྟན་འཛིན་སོགས་གཉེན་ཆེན་ཐང་དུ་ཕེབས་ཏེ་ཁྲ་ཐེར་གྱི་འོག་ནས་སྐུ་ཁྲུས་དང་ན་བཟའ་གསོལ། དེ་སྐབས་ཚུལ་ཆེན་ཐེག་མཆོག་བསྟན་པའི་ཉི་མས་སྤྲུལ་སྐུའི་མཚན་དང་ཞབས་བརྟན་གསོལ་འདེབས་འདི་ཕུལ་ཏེ། ཚུལ་ཁྲིམས་རྣམ་དག་བ་གམ་མངོན་མཐོའི་རྩེར། །དྲི་མེད་ལུང་རྟོགས་བསྟན་པའི་རྒྱལ་མཚན་བསྒྲེང་། །བདུད་བཞི་གཡུལ་ལས་རྣམ་པར་རྒྱལ་བ་ཡི། །དབྲ་སྟོན་བླ་མའི་ཞབས་ལ་གསོལ་བ་འདེབས། །གང་གི་ཞབས་ཟུང་འགྱུར་མེད་གཡུང་དྲུང་ཁྲིར། །བསྐལ་པ་རྒྱ་མཚོའི་བར་དུ་རྟག་བརྟན་ནས། །བཤད་དང་སྒྲུབ་པའི་སྣང་བ་དམ་པ་ཡིས། །འཕྲིན་ལས་ས་སྟེང་འདི་རུ་ཁྱབ་གྱུར་ཅིག །ཅེས་རྟེན་འབྲེལ་ལེགས་པར་འགྲིག དེ་ནས་དགུང་ལོ་ལྔ་སོན་སྐབས་སྟེང་ཆེན་མདོ་སྔགས་བསྟན་རྒྱས་གླིང་གི་སྐུ་ཐོག་གོང་མའི་གསེར་ཁྲིར་མངའ་གསོལ། དེའི་དུས་པཎྜི་ཏ་ཆེན་མོ་ཚུལ་ཆེན་ཐེག་མཆོག་བསྟན་པའི་ཉི་མ་རིན་པོ་སྐུ་ཆེད་ཕེབས་ཀྱི་བཀའ་དྲིན་བསྩལ་བ་དང་། མཐུ་སྟོབས་རྣམ་རྒྱལ་རིན་པོ་ཆེ་དང་སྟེང་ཆེན་མཁན་རྒན་ཉི་མ་ཚེ་རིང་། སི་དྷི་ཆོས་དབྱིངས་རང་གྲོལ་སོགས་རིས་མེད་ཀྱི་བླ་སྤྲུལ་དང་དགོན་སྡེ་མི་ཆེན་དུ་མ་འདུ་འཛོམ་བྱས་ཏེ་རྒྱལ་ཚབ་མཐུ་སྟོབས་རྣམ་རྒྱལ་རིན་པོ་ཆེས་ཕུན་སུམ་ཚོགས་པ་ལྔའི་སྒོ་ནས་ཁྲི་སྟོན་གྱི་ཚོགས་བཤད་རྒྱ་ཆེར་གནང་། ཧོར་པ་ཤོག་བཞི་དང་ཝ་རེ་གཤོང་གསུམ་བཅས་རྫ་ཡུལ་རོང་འབྲོག་གཉིས་ཀའི་འབུལ་དངོས་རིན་པོ་ཆེ་དང་རྟ་ནོར་ལུག་གསུམ་བརྒྱ་ཕྲག་ལས་བརྒལ་བ་སོགས་ཁྲི་སྟོན་དུ་དགའ་སྤྲོའི་ངང་འབྲེལ་འཇོག་བྱས། དེ་ནས་སྤྲུལ་སྐུ་དགོན་པའི་སྐུ་བདག་བྱས་ཏེ་བླ་རྒན་ཨ་གཡང་སྐུ་གཉེར་བར་བཞག་ཏེ་འདོན་ཆ་སྐོར་སོགས་བསླབ་ཙམ་གྱིས་མཁྱེན་པར་བྱུང་། དགུང་ལོ་དྲུག་བདུན་གྱི་དུས་སུ་མཁན་རྒན་ཉི་མ་ཚེ་རིང་མདུན་ནས་དབང་ལུང་མང་ཙམ་ཞུས། སྐབས་དེར་ཚུལ་ཆེན་མཆོག་གི་སྐུ་གམ་ནས་ཆོ་ག་བཅུ་གཉིས་དང་། བསྐལ་བཟང་སྟོང་དབང་། བདེར་གཤེགས་སྟོང་དབང་བཅས་དབང་ལུང་ཁ་ཚང་ཞུས། དགུང་ལོ་དགུ་བཞེས་པ་སྤྱི་ལོ༡༩༩༤ལོར་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཁན་ཆེན་ལུང་རྟོགས་བསྟན་པའི་ཉི་མ་དཔལ་བཟང་པོ་མདོ་སྨད་ཤར་རྫ་འཇའ་ལུས་པའི་གདན་སར་ཕེབས་པ་དང་བསྟུན་ཏེ་གཙང་མ་གཙུག་ཕུད་ཀྱིས་ཁྲིམས་ཞུས་ཏེ་རབ་ཏུ་བྱུང་བའི་མཚན་ལ་ཚུལ་ཁྲིམས་གཡུང་དྲུང་དྲི་མེད་རྣམ་རྒྱལ་ཞེས་གསོལ། ཁྱད་པར་དུ་ཀུན་མཁྱེན་ཤར་རྫ་བའི་རྒྱལ་ཚབ་གཉིས་པ་མཐུ་སྟོབས་རྣམ་རྒྱལ་རིན་པོ་ཆེ་མཆོག་བཞི་རྫོགས་ཀྱི་སློབ་དཔོན་དུ་བསྟེན་ཏེ་ལམ་གྱི་གོ་རིམ་མ་ནོར་བ། རྫོགས་ཆེན་སྐུ་གསུམ་རང་ཤར་ལས། བསྐྱེད་རྫོགས་ཀྱི་སྔོན་དུ་ཞི་ལྷག ཞི་ལྷག་གི་སྔོན་དུ་སྡིག་སྦྱོང་། སྡིག་སྦྱང་སྔོན་དུ་རྒྱུད་སྦྱང་འགྲོ་དགོས། ཞེས་གསུངས་པ་ལྟར། སྔོན་འགྲོ་བསགས་སྦྱོང་དང་དངོས་གཞི་ཉམས་ལེན་རང་གཞན་གྱི་ཕོ་བ་བཅས་མཐར་སོན་པར་མཛད། དེ་དུས་སྐུ་ན་གཞོན་ཡང་དམ་པའི་རིགས་མངོན་དུ་སད་ཅིང་ལས་འབྲས་ཀྱི་སྤང་བླང་ལ་བརྩི་བསྲུང་རབ་ཏུ་ཞིབ་པ་སོགས་ངོ་མཚར་བརྗོད་པ་མཐའ་ལས་འདས། དགུང་གྲངས་བཅུ་པ་སྟེ་སྤྱི་ལོ༡༩༩༥ལོར་དཀར་མཛེས་བོད་རིགས་རང་སྐྱོང་ཁུལ་ཆོས་ལུགས་ལས་དོན་ཅུས་ནས་སྤྲུལ་སྐུའི་ཡང་སྲིད་དཔང་ཡིག་དཀར་མཛེས་ཁུལ་གྱི་ཨང་སོ་གསུམ་པ་གནང་།

    དགུང་གྲངས་བཅུ་གཅིག་སོན་ཚེ་བླ་མ་ཨ་གཡུང་རིན་པོ་ཆེ་གཤེན་བསྟན་མཐའ་རྒྱས་མཆོག་ཤར་རྫའི་གདན་སར་ཕེབས་ནས་དབྱིངས་རིག་རིན་པོ་ཆེ་ཁྲིད་དང་མ་རྒྱུད་དབང་བཞི་དང་རིག་ལྔ་བདེར་གཤེགས་འདུས་པའི་དབང་བཞི་སོགས་ཟླ་བ་གཉིས་ལྷག་རིང་ལ་བསྩལ་བ་ཚུལ་བཞིན་གསན། དགུང་གྲངས་བཅུ་གཉིས་པ་མེ་གླང་ལོར་འབུམ་རྨད་མི་གཡོ་བསམ་གཏན་གླིང་དུ་གྲུབ་ཆེན་བསོད་ནམས་གཡུང་དྲུང་དང་། ཤར་རྫའི་རྒྱལ་ཚབ་རིན་པོ་ཆེ་མཐུ་སྟོབས་རྣམ་རྒྱལ་རྣམ་གཉིས་ཀྱིས་ཐེག་སྒོ་མཐའ་ཡས་པའི་དབང་བསྐུར་བ་ཞུས་ཏེ་རྒྱུད་སྨིན་པར་མཛད། འདི་ཡར་མས་དགེ་ལུང་རི་ཁྲོད་དུ་བཞུགས་པའི་བྱ་བྲལ་བ་བསྟན་འཛིན་འགྱུར་མེད་མདུན་ནས་དབང་ཆོག་སྐོར་སོགས་ཕྱག་ལེན་ལ་ལེགས་པར་བསླབས། དགུང་གྲངས་བཅུ་གསུམ་ལོར་མ་ཡུམ་གྲོངས་ནས་བོན་བན་གཉིས་ཀྱི་ལུགས་དང་བསྟུན་ནས་དགོངས་རྫོགས་གནད་སྨིན་མཛད། དགུང་གྲངས་བཅུ་བཞི་བ་སྤྱི་ལོ༡༩༩༩ལོར་རིས་མེད་ཀྱི་གྲུབ་མཐའ་ཡོངས་ལ་ཐུགས་རྒྱུད་འབྱོངས་པའི་ཆེད་ཨ་འཛམ་འབྲུག་པ་དང་གསེར་རྟ་བླ་རུང་སྒར་གྱི་བླ་མ་འཇིགས་མེད་ཕུན་ཚོགས་སོགས་ཀྱི་མདུན་དུ་ཕེབས་ནས་རྫོགས་པ་ཆེན་པོའི་ཁྲིད་ཡིག་ཡེ་ཤེས་བླ་མ་བཅས་ཁྲིད་སྒོམ་ཟུང་འབྲེལ་དུ་མཛད། འདི་ལོ་ཚུལ་ཆེན་སྐུ་ཕྲེང་གསུམ་པ་ཐེག་མཆོག་བསྟན་པའི་ཉི་མའི་མདུན་ནས་ཡང་ཟབ་ནམ་མཁའ་མཛོད་ཆེན་གྱི་དབང་བཞི་མནོས། དགུང་གྲངས་བཅོ་ལྔ་པ་ལྕགས་འབྲུག་ལོར་ཤར་རྫའི་རྒྱལ་ཚབ་རིན་པོ་ཆེའི་མདུན་ནས་ཤར་རྫ་བའི་གསུང་མཛོད་ཆེན་རྣམ་ལྔ་གཙོས་པའི་ཡོངས་རྫོགས་ལུང་རྒྱུན་བླངས། འདི་ལོ་ཨུདྷིཿབླ་མ་ལུང་རིགས་རྣམ་དག་དྲུང་ནས་སྔོན་འགྲོ་བཀའ་ལུང་རྒྱ་མཚོ་དང་ལྷ་གཉེན་ཤེལ་སྒོང་གི་ཞལ་ཁྲིད་ཟབ་རྒྱས་གསན་བཞེས་མཛད། དགུང་ལོ་བཅུ་དྲུག་པ་ལྕགས་སྦྲུལ་ལོ་རྫ་སྨོན་རྒྱལ་དགོན་དུ་མཆོག་སྤྲུལ་ཚེ་དབང་གཡུང་དྲུང་རིན་པོ་ཆེའི་མདུན་ནས་རྒྱལ་བའི་བཀའ་རིན་པོ་ཆེ་ལུང་རྒྱུན་ཚད་ལྡན་བླངས། རྒྱལ་ཚབ་རིན་པོ་ཆེ་ཡང་དེར་ཕེབས་ཏེ་འབུམ་དུམ་དྲུག་མའི་ལུང་དང་ཆོ་ག་བཅུ་གཉིས་ཀྱི་དབང་སོགས་གནང་བ་གསན་བཞེས་མཛད། ཀུན་གྲོལ་ལྷ་སྲས་ཚོགས་གཉིས་རྒྱ་མཚོའི་མདུན་ནས་བཀའ་འགྱུར་བརྒྱུད་རིམ་བཅས་ལུང་འགའ་ཞུས། སྐྱང་ཚང་དགོན་གྱི་རྣལ་འབྱོར་བ་བསྟན་པ་ཚུལ་ཁྲིམས་མདུན་ནས་མཁའ་འགྲོ་གསང་གཅོད་ཀྱི་ལུང་ཞུས། དེའི་དགུན་ངོར་ཤར་རྫའི་རི་ཁྲོད་དུ་རྒྱལ་ཚབ་རིན་པོ་ཆེའི་མདུན་ནས་རྫོགས་ཆེན་སྐུ་གསུམ་རང་ཤར་རྩ་རླུང་ཞག་བརྒྱར་བཞུགས་ཤིང་རྒྱབ་ཐུར་བཅུད་ལེན་བཅས་མཐར་ཕྱིན་པར་མཛད། འདི་ལོ་རྒྱལ་ཚབ་རིན་པོ་ཆེའི་མདུན་ནས་དྲང་སྲོང་གི་བསྙེན་པར་རྫོགས་ཏེ་མཚན་དུ་དྲང་སྲོང་ཚུལ་ཁྲིམས་བསྟན་འཛིན་རྒྱལ་མཚན་ཞེས་གསོལ། དགུང་ལོ་བཅུ་བདུན་སོན་ཚེ་སུམ་ལྡན་གྱི་བཀའ་དྲིན་ཅན་རྒྱལ་ཚབ་འཇིགས་མེད་རིག་པའི་དབང་ཕྱུག་མདུན་ནས་སྔོན་འགྲོ་བཀའ་ལུང་རྒྱ་མཚོ་ཞལ་ཁྲིད་གསན། དེ་ལོར་སྟོད་ཕྱོགས་སུ་མཇལ་སྐོར་ལ་ཕེབས་ཏེ་ཀོང་པོ་བོན་རི་ལ་བཅུ་སྐོར་ཞིག་དང་གྲྭ་ས་གོང་འོག་བར་གསུམ་བཅས་མཆོད་མཇལ་ལེགས་པར་གྲུབ་མཐར་རང་ཡུལ་དུ་ཕེབས་ནས་ཇི་སྲིད་བར་དུ་ཉམས་པ་མེད་པའི་སྨྱུང་གནས་ཀྱི་རྒྱུན་བཙུགས། ཞོར་དུ་ཨུདྷིཿབླ་མའི་མདུན་ནས་ལྟུང་བཤགས་ཆོག་ཁྲིད་བཅས་གསན་བསམ་མཛད། དགུང་གྲངས་བཅོ་བརྒྱད་པ་སྐུ་ཡི་མཆེད་ཟླ་མཁན་པོ་བུམ་པའི་མདུན་ནས་འབྱུང་རྩིས་སྐོར་སོགས་གསན་བཞེས་མཛད། དེའི་དགུན་ངོར་རྒྱལ་ཚབ་རྣམ་དྲུང་ནས་ཚེ་དབང་བོད་ཡུལ་མའི་རྩ་རླུང་སྦྱངས། དགུང་གྲངས་བཅུ་དགུ་བཞེས་ཚེ་བོད་ཟླ་དང་པོའི་ཚེས་གཉིས་ཀྱི་ནུབ་མོར་ར་ཆུང་ཚང་དུ་ཞག་བཞུགས་མཛད་པའི་རྨི་ལམ་དུ་ཐུགས་ཀ་ནས་འཇའ་ཚོན་ཞིག་འཕྲོས་པའི་སྣེ་མོ་རྡོ་ཞིག་ལ་ཟུག་པ་རྨིས། ཚེས་གསུམ་ཉིན་སྨོན་ལམ་བྲག་དཀར་ལ་ལྷ་གསོལ་ཕེབས་སྐབས་ཕྱག་མཛུབ་ཀྱི་རྗེས་ལམ་མེར་འཇོག་པ་ར་ཟམ་གཉིས་ཀྱི་སྡེ་མི་དང་ཕྲན་རང་གིས་ཀྱང་དངོས་སུ་མཇལ། དེ་མ་འགྱང་པར་སྟེང་ཆེན་དགོན་དུ་ཚེ་སྒྲུབ་བྱ་རི་མའི་སྐུ་མཚམས་ལ་བཞུགས་ནས་བསྙེན་ཆེན་ཞིག་ཐོན་ངེས་མཛད་སྐབས་ཚེ་རིལ་འཕུར་བ་སོགས་གྲུབ་རྟགས་ཀུན་ཀྱིས་མཐོང་སྣང་དུ་བྱུང་། དེའི་དགུན་ངོར་རྒྱལ་ཚབ་རྣམ་གཉིས་གམ་ནས་རྫོགས་ཆེན་དབང་བཞི་ཞུས་ནས་གཞི་གནས་ཡེ་ཤེས་ཆེན་པོའི་ངོ་འཕྲོད་དེ་དབང་བཞི་རྫོགས་པར་ཐོབ། དམ་པ་དེ་གཉིས་ཀྱི་དྲུང་ནས་ཐེག་ཆེན་ལྷ་ཡི་མེ་ལོང་གི་ཆོ་ག་ལ་བརྟེན་ནས་བྱང་ཆུབ་སེམས་ཀྱི་སྡོམ་པ་མནོས་པའི་མཚན་ལ་རྒྱལ་སྲས་གཞན་ཕན་སངས་རྒྱས་འབྱུང་གནས་ཞེས་གསོལ། དགོན་པའི་ཀྲུའུ་རིན་གྱི་འགན་བཞེས་ཏེ་སྔ་ཕྱི་རིམ་པའི་ཞིང་ཆེན་དང་ཁུལ་རྫོང་རྣམས་སུ་ཆོས་ལུགས་ཀྱི་ཚོགས་འདུར་ཞུགས། དགུང་ལོ་ཉི་ཤུའི་ཐོག་སླར་ཡང་རི་ཁྲོད་དུ་བཞུགས་ནས་རྒྱལ་ཚབ་འཇིགས་མེད་རིག་པའི་དབང་ཕྱུག་དང་མཁན་པོ་རིག་འཛིན་དབང་རྒྱལ་རྣམ་གཉིས་དྲུང་ནས་རྒྱལ་བའི་བཀའ་རིན་པོ་ཆེ་ལྗགས་ལུང་དང་། གྲུབ་རྗེ་རིན་པོ་ཆེ་ནམ་མཁའ་རྒྱལ་མཚན་མཆོག་གི་གམ་ནས་སེམས་ཕྱོགས་སྐོར་དུ་མ་གསན་བཞེས་ཡང་དག་པར་མཛད། བར་གསེང་དུ་རྒྱལ་ཚབ་འཇིགས་མེད་དབང་ཕྱུག་མདུན་ནས་སྙན་འགྲེལ་གཙང་གཤེན་དགོངས་རྒྱན་ཞལ་ཁྲིད་རྒྱས་པ་གསན་ཏེ་དཔེར་བརྗོད་སོགས་ཚུལ་བཞིན་བྲིས་པས་རྩོམ་གྱི་གཅད་ལྷུགས་ལ་བྱན་ཆུད་པར་བྱུང་།

    དེ་ལོ་ནས་སླར་སྔ་གཞུག་ཏུ་ཐུགས་ཉིད་མཁྱེན་པའི་དཀྱིལ་འཁོར་ཕྱོགས་ཀུན་ལ་སྒོ་མ་འགག་པ་གཡུང་དྲུང་བོན་གྱི་གཞུང་ལུགས་ཁག་ལ་བག་ཆགས་ཟབ་མོ་ཐེབས་ནའང་། རྣམ་རྒྱལ་ལས། གཡུང་དྲུང་བོན་གྱི་རྒྱ་མཚོ་གཏིང་ཟབ་པ།། ངོམ་མེད་བློ་ཡི་དོན་ལ་མྱོང་བ་སྤྱོད།།ཅེས་པའི་ལུང་དོན་ཐུགས་ལ་བཅངས་ནས་ཤར་རྫ་རི་ཁྲོད་དུ་ལོ་གསུམ་སྒྲུབ་གྲྭར་བཞུགས་ནས་རྒྱལ་ཚབ་རིན་པོ་ཆེ་མཐུ་སྟོབས་རྣམ་རྒྱལ་དང་། རྒྱལ་ཚབ་འཇིགས་མེད་དབང་ཕྱུག མཁན་པོ་རིག་འཛིན་དབང་རྒྱལ་རྣམ་གསུམ་གཙོས་མཁས་དབང་དང་རྟོགས་ལྡན་སྐྱེས་ཆེན་དུ་མའི་དྲུང་ནས་སྒྲུབ་གྲྭའི་ཁྲིད་རིམབཞིན་སྦྱངས་པ་ཚད་དུ་ཕྱིན་ཏེ་དགུང་གྲངས་ཉེར་བཞི་པ་སྤྱི་ལོ༢༠༠༦ལོར་རྒྱལ་ཚབ་རིན་པོ་ཆེས་མཁན་པོའི་མཚན་རྟགས་གནང་སྟེ་སྤྱི་སངས་རྒྱས་བསྟན་པ་དང་སྒོས་སུ་འཕྲུལ་ངག་གཡུང་དྲུང་བོན་གྱི་བསྟན་པ་ཡང་ཁྱད་ཤར་རྫའི་བསྟན་པའི་རྒྱུད་འཛིན་དུ་མངའ་གསོལ་མཛད། དེ་ནས་མཁན་སྤྲུལ་ཟུང་གི་མཚན་སྙན་གྱི་གྲགས་པ་ཕྱོགས་བཅུ་བུ་མོའི་ཕ་མཐར་བརྒལ་སོང་། འདི་ལོར་བོད་ལྗོངས་ཆབ་མདོའི་མངའ་འོག་བླ་ཁྲི་དགོན་དང་། མང་རི་དགོན། སྐམ་ཚང་དགོན། སྤང་རྒན་དགོན་བཅས་ཀྱིས་གདན་ཞུས་ལྟར་ཕེབས་ཏེ་དགོན་ཁག་བཞིའི་བླ་གྲྭ་ཡོངས་དང་། ཚ་རོང་། ཀོང་པོ། ནག་ཆུ། རྫ་ཁོག་བཅས་ནས་འདུས་པའི་སྡེ་མང་དག་ལ་རྒྱལ་བའི་བཀའ་དྲི་མ་མེད་པ་པོ་ཏི་ཉིས་བརྒྱ་ལ་ཉེ་བ་ཙམ་ཞིག་ལྗགས་ལུང་གི་བཀའ་དྲིན་བསྩལ། དེའི་ཞོར་དུ་རྫི་བོ་དགེ་བཤེས་བསོད་ནམས་ཕུན་ཚོགས་ཀྱི་མདུན་ནས་ཐེག་འགྲེལ་མེ་ལོང་དགུ་སྐོར་འཆད་ཁྲིད་རྒྱས་པ་གསན། དགུང་ལོ་ཉེར་ལྔའི་ཐོག་མདོ་སྨད་རྔ་ཡུལ་རྟོགས་ལྡན་དགོན་ཆེན་དུ་ཞབས་བསྐྱོད་གནང་སྟེ་ཚུལ་ཆེན་ཐེག་མཆོག་བསྟན་པའི་ཉི་མའི་དྲུང་ནས་དམར་མོ་མཛུབ་ཁྲིད་དང་། རང་གཞན་གྱི་འཕོ་ཁྲིད། བདེ་ཆེན་ཞིང་གི་ཕྱག་ལེན་ཆོག་ཁྲིད་ཟུང་སྦྲེལ། སྙན་འགྲེལ་གཙང་གཤེན་དགོངས་རྒྱན། གཞན་དག་གི་གམ་ནས་རྩིས་ཕྲན་འགའ་དང་། ས་དཔྱད་དང་ས་འདུལ་བཅས་གསན་བཞེས་མཛད་དེ་ཞང་ཞུང་རྫོགས་ཆེན་སློབ་གླིང་རིག་གནས་ཀྱི་རྒྱུགས་ཆེན་སྐབས་སུ་ཨང་རྟགས་ཐོབ། འདིར་ལོ་བོན་བརྒྱ་དགེ་ལེགས་ལྷུན་གྲུབ་རྒྱ་མཚོ་ཤར་རྫའི་རི་ཁྲོད་དུ་ཞབས་བསྐྱོད་གནང་སྟེ་ཐེག་དགུ་གྲུབ་མཐའི་རྣམ་བཞག་ཞལ་ཁྲིད་གསན་པ་དང་ཚེ་དབང་བོད་ཡུལ་མའི་དབང་ཞུས། དེ་ནས་དགུང་གྲངས་ཉེར་དྲུག་ཐོག་མཚོ་སྔོན་རེབ་གོང་བོན་བརྒྱ་སྨན་རིའི་དགོན་དུ་བྱོན་ཏེ་བོན་བརྒྱ་དགེ་ལེགས་ལྷུན་གྲུབ་རྒྱ་མཚོའི་དྲུང་ནས་ལམ་རིམ་དྲུག་ཅུ་བ་དང་། ལམ་རིམ་དྲུག་ཅུ་པའི་འགྲེལ་ཀུན་གྲོལ་ཅན་ལུང་། ཀུན་བཟང་སྙིང་ཏིག་གི་ཁྲིད། བརྡ་སྤྲོད་ཉི་ཤུ་བདུན་པའི་ལུང་། ཡིག་གཟུགས་འགའ་ལ་སྤྱང་གསན་མཛད་པ་བཅས་འཆད་ཁྲིད་སོགས་ཚུལ་བཞིན་དུ་གསན་ཏེ་སླར་རང་དགོན་དུ་ཞབས་སོར་འཁོད་དེ་བདེ་ཆེན་ཞིང་སྒྲུབ་ཆེན་མོ་གསར་དུ་བཙུག་སྟེ་སྨོན་ལམ་མཐའ་ཡས་ཀྱི་ཆོ་གའི་གཞུང་བསྲང་ཞིང་། ཟེར་འཕྲོ་དགོན་དང་བོན་པོ་དགོན་པའི་འདུས་སྡེ་རྣམས་ཕེབས་འཚོགས་ཀྱི་འབྲེལ་བའི་ཐོག་འབུམ་རྨད་དགོན། སྨོན་རྒྱལ་དགོན། ཁྲོ་ཚངས་དགོན། ས་སྐྱའི་བརྒྱུད་འཛིན་སེང་འགྱིང་དགོན། འབར་ཁྱུང་དགོན། དགེ་ལུགས་ཀྱི་གྲུབ་མཐའ་འཛིན་པ་དགོན་གསར་དགོན། སྔར་འགྱུར་རྙིང་མའི་བརྒྱུད་འཛིན་ར་སྐོར་དགོན་སོགས་རིས་མེད་དད་ལྡན་སེར་སྐྱ་སྟོང་ཕྲག་ལས་བརྒལ་བ་ཙམ་བྱུང་བ་བཅས་ཉིན་བདུན་གྱི་རིང་དུ་འཚོགས་ཏེ་བདེ་སྨོན་གསུམ་གྱི་བོན་འཆད་ཁྲིད་བཀའ་དྲིན་བསྩལ་ཅིང་ལྷ་འབངས་རྣམས་ཀྱིས་སྐུ་གསུམ་སྙིང་པོ་མཐའ་ཡས་པ་ཞིག་ཁས་བླངས་བྱུང་བས་དགེ་བསྐུལ་རྒྱ་ཆེར་གྲུབ་བོ།།འདི་ལོ་དཔྱིད་དུས་མཁན་པོ་རིག་འཛིན་དབང་རྒྱལ་མཆོག་གི་དྲུང་ནས་ཡོངས་རྩེ་ཀློང་ཆེན་གཙོས་བོན་སྒོ་འགའ་ལུང་གསན། སྐུ་ཉིད་ནས་ཤར་རྫ་རི་ཁྲོད་ཀྱི་འདུས་པ་ཡོངས་ལ་ཡི་དམ་དབལ་གསས་རྔམ་པའི་དབང་མཆོག་བསྐུར་གནང་མཛད་དེ་སློབ་ཚོགས་དུ་མའི་རྒྱུད་ཡོངས་སུ་སྨིན་གྲོལ་གྱི་ལམ་ལ་བཀོད། དགུང་ལོ་ཉེར་བདུན་ཐོག་སྟེང་ཆེན་དགོན་མ་ལག་གསུམ་གྱི་སེམས་དཔའ་འདུས་སྡེ་དང་ཡུལ་གྱི་ལྷ་འབངས་བཅས་ལ་བོན་འཁོར་ཚིག་བཞི་དང་འབྲེལ་བར་སྔོན་འགྲོ་བློ་ལྡོག་རྣམ་བཞི་དང་། སྐྱབས་སེམས་སྐོར་སོགས་དགེ་སྡིག་བླང་དོར་བཅས་ཀྱི་སྨྲར་ཁྲིད་ཟླ་བ་གཅིག་ལ་གནང་སྟེ་འཕྲལ་གྱི་སྤྱོད་ཚུལ་དང་། ཕུག་གི་འདུན་མ། རྒྱུན་གྱི་ཉམས་ལེན་སོགས་ཇི་ལྟར་བྱ་དགོས་པའི་ཟབ་ཁྲིད་ལེགས་པ་བློ་སེམས་རྩེ་གཅིག་ལ་ཅིང་མཐར་འཕོ་དང་བཅས་འགྲོ་བའི་རྒྱུད་རྣམས་སྨིན་གྲོལ་དཔལ་གྱིས་ཡོངས་སུ་ཕྱུག་པར་མཛད།

    སྐབས་བབས་ཀྱི་མཛད་པའི་འཕྲིན་ལས་ཇི་ལྟར་མཛད་པའི་སྐོར་ནི། སྤྱི་ལོ(༢༠༠༩)ལོར་དབྲ་སྟོན་དམ་པ་ཉིད་ཀྱིས་རྒྱལ་ཚབ་རིན་པོ་ཆེ་མཐུ་སྟོབས་རྣམ་རྒྱལ་མཆོག་དང་པཎྜི་ཏ་ཚུལ་ཆེན་ཐེག་མཆོག་བསྟན་པའི་ཉི་མ་མཆོག་ལ་དགོན་གནས་སྤོ་བའི་ཐུགས་འདུན་ཡོད་པ་སོགས་མ་འོངས་པའི་དམིགས་པ་རྒྱ་ཆེན་པོ་ཡོད་ཚུལ་སྐོར་ཞིབ་རྒྱས་སྒོ་ནས་ཕྱག་མོ་དང་དགོངས་རྟགས་ཀྱི་ལེགས་ཉེས་ཞུས་པར། རྩ་བའི་བླ་མ་རྣམ་གཉིས་ཀྱིས་ལུང་བསྟན་ལེགས་ཚུལ་གསུངས། དེ་བཞིན་འཇིགས་མེད་རིག་པའི་དབང་ཕྱུག་དང་། མཁན་པོ་རིག་འཛིན་དབང་རྒྱལ་རྣམ་པ་གཉིས་རི་ཁྲོད་ནས་དགོན་གནས་གསར་པར་ཞབས་བཅགས་ནས་རྟེན་འབྲེལ་ལྷ་དར་རིང་མོའི་སྣ་དྲངས་ཏེ་སྐྱེས་བཟང་གྱ་ནོམ་པ་བསྩལ། ཞོར་དུ་ཡུལ་གྱི་སྐྱེས་ལྷ་དང་གཉན་ལམ་སྡེ་བཞིའི་རིགས་སོགས་ལ་བསང་དང་གསེར་སྐྱེམས་ཀྱིས་བཀའ་བགོས་དམ་བཏགས་མཛད་དེ་ཕྱིས་སུ་ལས་གང་ལ་འཇུག་ཀྱང་སྟབས་ལེགས་པའི་ཕྲིན་ལས་ཀྱི་ཐ་ཚིག་དམ་པོར་བཞག གནས་གཞི་ལ་རབ་གནས་ཀྱིས་བྱིན་དབབ་ཅིང་ས་འདུལ་ཡང་ཕུན་སུམ་ཚོགས་པ་གནང་། སྔར་གྱི་གཙུག་ལག་ཁང་རྟེན་དང་བརྟེན་པ་བཅས་རང་སོར་བཞག་ནས་གོང་སར་གསར་བཞེངས་མཛད་པ་ཐུགས་ཐག་བཅད་དེ་གཤེན་གྱི་འབྱུང་ལྡན(༣༠༡)སྤྱི་ལོ(༢༠༡༡)ལོ་བོང་བུ་ཞེས་པ་ལྕགས་མོ་ཡོས་ཀྱི་ལོར་དཔལ་གཤེན་བསྟན་མདོ་སྔགས་བསྟན་རྒྱས་གླིང་འདུས་མང་ཡོངས་དང་ལྷ་སྡེ་ཀུན་ནས་མང་མོས་ཀྱིས་གནས་གཞི་སྤོ་བའི་ལས་ལ་འཇུག་སྟེ། རྒྱལ་བའི་བཀའ་རིན་པོ་ཆེ་དྲི་མ་མེད་པ་དག་ཚར་དང་། གཤེན་གྱི་བསྟན་པའི་བཀའ་སྲུང་ཆེན་མོ་མ་མཆོག་སྲིད་པ་རྒྱལ་མོའི་འབུམ་ཚོགས་གཞན་སྲུང་མ་ཆེ་ཆུང་གི་ཚོགས་བསྐང་དང་སྟོང་རྒྱུང་རྔན་བསང་དང་བློ་ལྡན་རྔན་བསང་ཡུལ་ས་འགྲས་བསྡུམ་བཅས་རིམ་གྲོ་གང་འཚམ་གྱིས་ལས་གཞིའི་སྟ་གོན་བྱས་ཏེ་འགོ་རྩོམ། དེ་ནས་ལས་གཞི་ལ་རིམ་པར་འཇུག་སྟེ་སྤྱི་ལོ༢༠༡༨ལོ་མཇུག་ལེགས་པར་གྲུབ་སྟེ་རབ་གནས་དང་དགའ་སྟོན་ཡོངས་སུ་གྲུབ་ནས་ད་ལྟ་རང་དགོན་དུ་སྐུ་མཚམས་ལ་བཞུགས་པ་བཅས་རྣམ་ཐར་མདོར་བསྡུས་སོ།།


  • ལེ་ཚན་སྔོན་མ།:གངས་ལྗོངས་ཀྱི་རིགས་པ་སྨྲ་བའི་ཁྱུ་མཆོག—བྲག་མགོའི་དགེ་བཤེས་བློ་བཟང་དོན་གྲུབ།
  • ལེ་ཚན་རྗེས་མ།:མི་ཉག་རི་ཁུད་དགོན་པའི་སྤྲུལ་སྐུ་འཇིགས་མེད་ཆོས་ཀྱི་འོད་ཟེར་མཆོག་གི་ངོ་སྤྲོད་མདོར་བསྡུས།
  • དོ་སྣང་ཆེ་བའི་རྩོམ།

    རྩོམ་གསར། 10