དུད་ཁ་དོང་སྤྲུག 2018-11-12
ཟླ་དགུ་ཞག་བཅུ་ལུས་ལ་ངལ་བས་ཁུར།།
ཚེ་འདིར་མི་ལུས་རིན་ཆེན་གནང་བའི་མ།།
ཡོད་ཚད་ང་ལ་བློས་གཏོང་བྱེད་མཁན་དེ།།
དྲིན་ཆེན་མ་ཡུམ་ཡིན་ནོ་གཅེས་ལོ་མ།།
མངར་བའི་ནུ་འོ་སྣུན་ཞིང་རྒྱབ་ཏུ་ཁུར།།
ཞིམ་པའི་ཁ་ཟས་གང་ཡག་ང་ལ་སྦྱིན།།
ལུས་ཀྱི་དྲོད་ལ་གཅར་ནས་སྐྱོང་མཁན་དེ།།
དྲིན་ཆེན་མ་ཡུམ་ཡིན་ནོ་གཅེས་ལོ་མ།།
ཁ་ལུད་སྣབས་ལུད་ཁ་ཡི་བལྡགས་ནས་འཕྱིས།།
གཅིན་དང་སྐྱག་པ་བྱམས་པའི་ལག་པས་ཕྱིས།།
ནམ་ཡང་བརྩེ་བས་སྐྱོང་བའི་ལྷ་མོ་དེ།།
དྲིན་ཆེན་མ་ཡུམ་ཡིན་ནོ་གཅེས་ལོ་མ།
འཇིག་རྟེན་འདི་རུ་མངོན་ལྐོག་མེད་པའི་མི།།
སྡིག་སྨོད་དེར་ཡང་བྱམས་པའི་དྲོད་ཡོད་པ།།
རེ་བའི་མིག་ཟུང་བདག་ལ་བཅངས་མཁན་མ།།
དྲིན་ཆེན་མ་ཡུམ་ཡིན་ནོ་གཅེས་ལོ་མ།།
ངོ་དགའི་དོན་དུ་ཚིག་གཅིག་མ་ལབ་ཅིང་།།
ང་ལ་ཁ་ཞེ་གཉིས་མེད་ལྷག་བསམ་བཅངས།།
རྡེབ་རྡུང་བྱས་ཚད་བརྩེ་བས་བླན་པའི་མོ།།
དྲིན་ཆེན་མ་ཡུམ་ཡིན་ནོ་གཅེས་ལོ་མ།།
རྩོམ་གསར། 10