གངས་ཚ་འཇོམས། 2018-11-12
སྙིང་ཉེ། ཕ་ཡུལ་གྱི་ཟླ་ལྔ་བའི་མཛེས་སྡུག
མིག་ལ་མཛེས་ཤིང་། ཡིད་དུ་སིམ་ནའང་།
མཐོ་རི་གསུམ་རྩེ་ནས། ངས་མིག་ཟུང་ཆེ་རུ་བགྲད་དེ།
ཁྱེད་ཉིད་ལོག་ཕེབས་ལ་ངང་སྒུག་བྱས།
ཉི་ཟླའི་མཁའ་ལམ་གཅོད་པའི་བྱ་ཁྱུ།
སྔ་མོ་ནས་རྒྱང་རིང་གི་ཚང་མལ་དུ་ལོག་སོང་།
ང་ཁོ་ནས། ཁྱོད་ཀྱི་ཆེད་དུ།
བས་མཐའ་འདིར་གནས་ཚང་བཅས་ཏེ།
ཧེ་ཙི་ནང་བཞིན། རྒྱ་མཚོའི་ཁ་གཏད་ནས།
སྐྱེད་ཚལ་ར་བ་ཞིག་བཟོས།
མེ་བུས་ཤིང་ཇ་བསྐོལ་ཏེ།
སྔར་བཞིན་ཁྱེད་ལ་བསྒུག
གཙང་བོའི་བཞུར་དབྱངས་རྣ་བར་འཇགས་ཐབས་བྲལ།
རླབས་ཀྱི་མེ་ལོང་རེ་རེ་ལས་ཁྱེད་རང་འཆར་བར་རེ་ལྟོས་བྱས།
གཙང་བོ་ལྟ་བུའི་དྭངས་གཙང་གི་ཁྱེད་རང་།
སོམ་ཉི་མེད་པར། ང་ཡི་ཕྱོགས་སུ་སླེབས་ཤོག
སྐར་ཚོགས་ཀྱི་ཁུ་སིམ་སྐྱ་མདས་དཀྲོགས་དུས།
འདུ་འཛིས་ཁེབས་པའི་གྲོང་ཁྱེར་འདིའི་ཧྲག་བར་ནས།
ཤར་མཐའི་ཉི་མ་སེར་པོ་དེ་ཁྱེད་རང་ཡིན་ན་བསམ།
སྙིང་ཉེ། ཟླ་ལྔ་བར།
ཕ་ཡུལ་ན་ཁྱེད་རང་མེད་པས།
སྐྱོ་གདུང་གི་དབྱར་ཁར་སྨྲེང་བ་རབ་ཏུ་འཁོར།
འདི་གར། ཁེར་རྐྱང་དུ་བསྡད་ཡུན་རིང་དྲགས་པས།
ཁེར་རྐྱང་ནི་རྒྱུན་ལྡན་གྱི་འཚོ་བ་ཞིག་ཏུ་སྣང་མོད།
ང་ཡི་དབུགས་རྒྱུན་མ་འགག་བར་དུ།
ཁྱེད་ཉིད་བརྗེད་ཐབས་ཤིག་ཡེ་ནས་མི་འདུག
སྙིང་ཉེ། ད་ལྟ།
ངས་རྒྱང་རིང་གི་ཕ་ཡུལ་ལ་བལྟས་ནས།
སྐྱོན་གྱིས་མ་གོས་པའི་སེར་ཆེན་མེ་ཏོག་དེ་དྲན་བྱུང་།
ཁྱོད་ཉིད་གྲོང་སྡེ་འདི་གཉིད་ལས་དཀྲོག་བྱེད་དམ།
བཀླགས་མ་ཚར་བའི་སྒྲུང་ཐུང་ཡག་ཤོས་དེ་ཡིན་སྙམ།
ཟླ་ལྔ་བའི་ནང་།
ཁྱེད་རང་དྲན་པའི་སྡུག་བསྔལ་མཐའ་དག
ཆད་ལྷག་མེད་པར་ཤོག་ངོར་འབྲི་འདོད།
ཤོག་བུའི་གནམ་གྲུ་ཞིག་བཟོས་ཏེ།
ཁྱོད་ཕྱོགས་སུ་གཏོང་འདོད།
འཛུམ་མདངས་དང་དགོད་སྒྲ་མོད་པའི་གནས་འདི་ནས།
ཁྱེད་རང་དྲན་དུས། སྙན་ངག་རེ་བྲིས་པ་ཡིན།
དུས་དེ་རིང་།
སྔོ་བསངས་ཀྱི་ནམ་མཁར་སྤྲིན་ནག་གི་ཡོལ་བས་བསྒྲིབས་འདུག
ལམ་གྱི་གཡས་གཡོན་ན་སྣ་མའི་མེ་ཏོག་བཞད་འདུག
རྙིང་ཧྲུལ་དུ་གྱུར་བའི་ཤོག་དེབ་ཅིག་ལས།
ཁྱོད་ཀྱིས་བྲིས་པའི་སྙན་ངག་དེ་བཀླག་འགོ་བརྩམས།
འཇིག་རྟེན་དཀར་ངོགས་འདི་རུ།
ཞེ་ཐོགས་ས་དང་སྙིང་ཉེ་ཡུལ་ཁྱེད་ལས་མི་འདུག
ལན་རེར། དྲན་སྣང་ཕྱོགས་གཅིག་ཏུ་བསྡུས་ནས།
ཕྱི་གསལ་ནང་གསལ་གྱི་མི་ཞིག་བྱེད་འདོད་ཀྱང་།
ཆར་ཆུས་བྲན་པའི་ཟླ་ལྔ་བ་འ།དི
བློས་མ་འཆུམས་པའི་ཚོན་རིས་སྐྱ་བོ་ཞིག་རེད་ཨང་།
ང་ལ་ཅི་ཡང་མེད།
ལྷམ་ཐེད་པོ་དང་ལྡེ་མིག་འདི་ལས། ང་ལ་ཅི་ཡང་མེད།
ལྷམ་བཟོ་བ་རྒད་པོ་དེ་ཡང་རྒྱང་རིང་ཞིག་ཏུ་ཕྱིན་སོང་།
ལྷམ་འདིས་ཁ་ཆེན་པོ་གདངས་ནས།
ང་ལ་སྦྱིན་པ་ཞིག་སློང་གིན་འདུག
ཡིན་ནའང་།
ངས་མིག་བཙུམས་ནས་ཁ་རོག་གེར་འདུག་དགོས་བྱུང་།
སྒོ་ཟྭ་བརྒྱབ་ཡོད།
ལྡེ་མིག་སྟེ་ང་དང་བར་ཐག་ཧ་ཅང་རིང་།
ཡིན་ནའང་། ངས་སྒོ་ཁའི་རྡོ་གཅལ་སྟེང་ནས།
ཤར་ཕྱོགས་ཀྱི་ཟླ་བ་སྒོར་སྒོར་ལ་བལྟས་ཏེ།
ལུས་སེམས་གཉིས་ཀར་ངལ་དུབ་ཀྱིས་མནར་བའི་མཚན་མོ་འདིར།
སྐྱིལ་ཀྲུང་གིས་བསྡད་དེ། ངལ་གསོ་ཤིག་བྱེད་འདོད།
རྩོམ་གསར། 10