སྤེན་ཚེ་གཞོན་པ། 2018-11-09
གཟའ་མཇུག
ཞིང་འབྲོག་པ་ཚོའི་ཆེས་རྒྱུན་ལྡན་གྱི་ཉིན་མོ་ཞིག
གྲོང་ཁྱེར་པ་ཚོའི་སྤྲོ་སྣང་གིས་བསུས་པའི་དུས་སྟོན་ཞིག
གཟའ་མཇུག
ངས། རེ་སྒུག་གིས་དྲངས་པའི་མཚན་མོ་རིང་པོ་ཞིག
མཚར་སྣང་གི་རྔམ་ཁ་སྟུག་པའི་བྱིས་བློའི་འཇིག་རྟེན་ཞིག
གཟའ་མཇུག་སླེབས་དུས།
ང་རང་། སྒོར་ཁུག་རྒྱགས་པའི་ཨ་ཕོ་ཚོང་དཔོན་ཞིག
གཏོང་ཕོད་ཆེ་བའི་སྦྱིན་བདག་བྱམས་སེམས་ཅན་ཞིག
གཟའ་མཇུག་ལ་སླེབས་དུས།
ངས། བོད་ཟས་ཁང་གི་ཨ་ཅག་བུ་ཁྲིད་ཀྱི་
མྱོས་བུམ་དེ་དྲན་འོངས།
སྤྲོ་སྐྱིད་ཁང་གི་རྒྱ་མོ་ལི་ལི་ཡི་འཕོང་ཚོས་དེ་དྲན་འོངས།
གཟའ་མཇུག་ལ་སླེབས་དུས།
ངས། ཞིང་གྲོང་གི་ཨ་མ་རྒན་མོར་ཁ་པར་
གཏང་རྒྱུ་བརྗེད་ཐལ།
མ་སྨད་གཉིས་ལ་ཁྱིམ་ཚང་ཞིག་གི་དྲོད་ཁོལ་སྦྱིན་རྒྱུ་བརྗེད་ཐལ།
གཟའ་མཇུག་ལ་སླེབས་དུས།
ངས། ང་རང་ལ་གློད་གྲོལ་ཐེངས་ཤིག་བྱས་ཆོག
ངས། ང་རང་ལ་གུ་ཡངས་ཐེངས་ཤིག་གཏང་ཆོག
གཟའ་མཇུག་ལ་སླེབས་དུས།
ངས་ཅི་ཡང་གླེང་ཆོག
ངས་གང་ཡང་བྱེད་ཆོག
གཟའ་མཇུག་ལ་སླེབས་དུས།
རྩོམ་གསར། 10