ད་ནི་དབྱར་གནང་གི་དུས་ཚོད་ཚར་ལ་ཉེ། ང་ཕ་ཡུལ་གྱི་པང་དུ་ལོག་ནས་དྲི་ཞིམ་མེ་ཏོག་གི་བསུང་ངད་ཀློང་ནས་སེམས་ལྷོད་ལ་བབས་ནས་གཉིད་སྐྱིད་པོ་ཞིག་ཀྱང་ལོག་མ་ཐུབ།

    ལོ་ཟླ་ནི་ཁ་རོག་གེར་ཚེ་སྲོག་ལ་འོད་སྣང་དང་མུན་པའི་སེམས་གཞས་རེ་བླངས་རྗེས་རྒྱང་རིང་དུ་ཆས་འགྲོ་བའི་ཆ་མེད་རྒྱུས་མེད་ཀྱི་མགྲོན་པོ་ཁེར་རྐྱང་དེ་ཡིན་ལ། ནམ་རྒྱུན་ཚ་གྲང་དྲོད་འཁྱག་གི་ལག་ཟུང་ཁོ་ནས་འཇིག་རྟེན་འདི་རུམ་མཁན་གྱི་སེམས་དཔའ་དེ་ཡང་ཡིན་སྲིད། མཐའ་ཡས་པའི་ཕ་ཡུལ་གྱི་སྤང་ཐང་དུ་མགོ་བོ་བསྙེས་ནས་དྭངས་གཙང་གི་ནམ་མཁར་ཅེར་ཐེངས་རེར། ས་ཆེན་འདི་ནམ་ཡང་ཚེ་སྲོག་ཡོད་ཚད་ཀྱི་འབྱུང་ཁུངས་དང་བརྟེན་ས་གཅིག་པུ་ཡིན་ན། ང་ཚོ་ནི་ལོ་ཟླའི་འཕུར་སྐྱོད་ཀློང་ན་འགྲུལ་བཞུད་ཐེངས་ཤིག་གི་རྐང་རྗེས་ས་ཆེན་པོ་འདིའི་བྲང་གཞུང་དུ་ཕབ་ནས་འགྲོ་བའི་ཆེས་གདུག་རྩུབ་ཀྱི་མགྲོན་པོ་དེ་ཡིན།

    ཕ་ཡུལ་གྱི་ཆེས་མཐའ་མའི་དབྱར་གཞུང་གི་རུམ་ཁ་ལས་གྱེས་པར་བྱེད་དུས། མེ་ཏོག་གི་སྒེག་ཉམས་དང་ཕྱེ་ལེབ་ཀྱི་གཤོག་འགྱུས་ང་ལ་རྨི་ལམ་ཞིག་གི་གཏམ་རྒྱུད་འཆད་ཅིང་། བྲང་ཁོག་གི་གཙང་བོའང་ཡོམ་ཡོམ་སྐྱོམ་པར་བྱེད། ད་ལྟ་བྲལ་དགོས་འདོད་པའི་སེམས་བྱུང་དག་ལྗང་མདོག་དང་དྭངས་གཙང་ལ་བརྒྱུས་ནས་ཕ་ཡུལ་གྱི་རུམ་ཁར་བྱོ་དགོས་ཡང་། དངན་པ་སྐྱོར་བའི་སྐྱོ་གདུང་གི་ཤུགས་རིང་རེ་རེ་ངག་སྒོ་ན་ཡང་ཡང་འཛུམ།

    ཕ་ཡུལ་དུ་སྡོད་པའི་ཆེས་མཐའ་མའི་ཉིན་འདི་ཚོར། ང་ལ་འཆར་ཡན་དང་ཕྱིར་འདང་གིས་བཞིབས་པའི་དོགས་འདྲི་མང་པོ་ཞིག་ཡོད། དུས་རབས་གསར་རྙིང་གཉིས་ལ་ཁྱེད་ནི་སྲ་མཁྲེགས་ཀྱི་གོར་མ་བཞིན་གོ་ལ་འདིའི་གྲུ་ཟུར་གང་རུང་དུ་གསོན་པའི་དཔའ་ངར་ནམ་ཡང་མ་ཞུམ་པར་སླེབས་ཡོང་ན། དུས་མ་འོངས་པར་ཡང་ཁྱེད་ཀྱི་ནམ་མཁའ་སྔར་བཞིན་སྔོ་ཞིང་དྭངས་སམ། ཁྱེད་ཀྱི་བློ་ཁོག་སྔར་བཞིན་ཡངས་ཤིང་ཆེའམ། ཁྱེད་ཀྱི་བྱམས་དུངས་སྔར་བཞིན་དྲོ་ཞིང་འཇམ་མམ། ཞེ་ལ་ཐོགས་པའི་ཕ་ས་ཕ་ཡུལ། ཁྱེད་དང་བྲལ་ན་ང་ནི་ནམ་ཡང་ཁེར་རྐྱང་གི་འགྲུལ་བཞུད་པ་དེའོ།།