ཁྱུང་གཤོག 2018-10-10
སང་ཉིན་ང་རང་འགྲོ་དགོས་པར་བསམ་ན།
བརྩེ་བའི་ས་གཞིའི་སྟེང་བཞད་པའི་མེ་ཏོག་དེ་བསྐྱུར་མི་ནུས།
དོ་ནུབ་ཀྱི་མཇལ་འཛོམས་ཁོ་ན་བྲང་ཁར་སྦྱར་རུང་།
སྐྱ་རེངས་ཀྱི་རྒྱབ་ལྗོངས་ལས་ཁྱེད་རང་མཐོང་ཐབས་བྲལ།
སྟོན་མགོ་བཀུག་མ་ཐག་པའི་དུས་ཚིགས་འདི་ལ།
ང་རང་ཁེར་རྐྱང་ངང་འགྲོ་དགོས་པས།
སྙེ་རླབས་ལྡེམ་པའི་ཕ་ཡུལ་གྱི་ཞིང་གྲོང་ལས།
ཁྱེད་ཀྱི་མེ་ཏོག་ཁྲོད་ཀྱི་མཛའ་གཞས་དེ་བརྗེད་ནུས་སམ།
མཛའ་གཞས་ཁྲོད་ཀྱི་བརྩེ་འཛུམ་དེ་འཁྱེར་དགོས་བྱུང་།
ད་ནི་ཁ་བ་ཁོ་ནར་དུས་ཆད་གདབ་དགོས།
མཛའ་གཞས་དང་འཛུམ་ཆུང་གིས་ང་ལ་ཕྱིར་དྲན་བྱེད་དུ་འཇུག་སྲིད།
ང་ནི་རྒྱང་རིང་རྒྱང་རིང་དུ་ཆས་སྲིད་ཀྱང་།
སུན་སྣང་མེད་པའི་དུས་ཚིགས་ཀྱི་གོམས་འགྲོས་ཁྲོད།
ཡང་བསྐྱར་ཁྱེད་ཀྱི་རུམ་ཁར་འབྱོར་ཡོང་།
ཞོགས་པ་འདིའི་གྱེས་བྲལ་གྱི་གོམས་སྟབས་ལས།
ཞོགས་པ་གཞན་ཞིག་གི་ཁེར་རྐྱང་བསུ་རན་སོང་།
རྩོམ་གསར། 10