ཞིང་ཕྲུག་སྨྱོན་པ། 2018-09-14
བརྩེ་བ་ལྗང་གུ་ཞིག་གི་འབྲས་བུ་རེད།
ནམ་ཟླ་གསར་པ་ཞིག་གི་སྟ་གོན་རེད།
སེམས་པ་གྲང་མོ་ཞིག་གི་རྨ་ཁ་རེད།
འཚོ་བ།སྟོན་ལོ་བཞིན་མཛེས་ཆོག
མི་ཚེ་སྟོན་ལོ་བཞིན་ཟད་སོང་།
རེ་བ་སྟོན་ལོ་བཞིན་བསྐྲུན་ཆོག་མོད།
འབད་པ་སྟོན་ལོ་བཞིན་ཟགས་སོང་།
འགན་འཁྲི་ཞིག་སྟོན་ལོ་བཞིན།
རླུང་ལ་བསྐུར་སོང་།
སྟོན་ལོ་འགུལ་ཚུལ་དེ་སྒེར་སེམས་ཤིག་ཡིན་ན།
སྤྱི་དོན་གྱི་ཆེད་དུ་མར་བབས་དགོས།
སྟོན་ལོ་རྒྱས་ཚུལ་འདི་འཚོ་བ་ཞིག་ཡིན་ན།
ཞེ་སྡང་དང་ཕྲག་དོག་མེད་པར།
ང་རྒྱལ་དང་སྤོབས་སེམས་མེད་པར།
ལྷག་རླུང་ཁྲོད་བ་དན་བཞིན་གཡོ་དགོས།
སྟོན་ལོ་སེར་པོ།ནམ་ཟླ་ཞིག་གི་འགྱུར་ལྡོག་ཡིན་ན།
འཚོ་བ་ཞིག་གི་མངོན་ཚུལ་ལོས་ཡིན།
སྟོན་ལོ་སེར་པོ།
སེམས་པའི་ཞིང་སར་སྐྱེས་པའི་འཚོ་
བའི་འདབ་ལོ་འདི་ཡིན་ན།
བདག་གི་སྡུག་ཡུས་དང་འཁང་ར།
བརྙས་བཅོས་དང་སྐྱོ་བ་ཡོད་ཚད།
སྟོན་རླུང་གྲང་མོ་འདིར་བསྐུར་འདོད།
སྟོན་ལོ་སེར་པོ་ཁྱོད་མཐོང་དུས།
ངས་ང་རང་རྒས་པ་གཞི་ནས་ཚོར།
རྩོམ་གསར། 10