ལི་སྨད་ཉི་གཞོན། 2018-09-10
གྲང་ངར་དང་བུ་ཡུག་གི་འཚུབ་མ་རྒོད་པའི་མཐོ་སྒང་ན།
བྲེ་སེར་འབྲོང་གི་རིགས་རྒྱུད་ལས་ཆད་པའི་དཔའ་རྒོད་ཅིག
ཤེས་རིག་དང་ལ་རྒྱ་ཡི་མེ་དཔུང་འབར་བའི་རྭ་རྩེ་ན།
རིགས་རྒྱུད་ཀྱི་འདུ་ཤེས་སྙིང་ལ་བཅིངས་བའི་སྤོབས་པ་ཡོད།
ཕྱི་འཇིག་རྟེན་གྱི་སྣོད་བཅུད་མ་འཇིག་ན།
ནང་ཤེས་བྱ་ཡི་སྒྲོན་མེ་གཟིམས་མི་སྲིད།
དགེ་རྒན་ལགས། ཁྱེད་ནི་ང་ཡི་ལ་རྒྱ་དང་སྤོབས་པ་ཡིན།
འཚོ་བའི་འཁོས་ཀ་ཞན་ཀྱང་རུང་།
གཟུགས་དང་ལང་ཚོ་མེད་ཀྱང་ཆོག
ཁྱེད་ཀྱིས་ལྟ་བ་མཉམ་གནས་ཀྱི་ཐུགས་གཤིས་དྲང་མོས།
ང་ཚོར་ཡིད་ཆེས་དང་རེ་བ་བསྩལ་བྱུང་།
དགེ་རྒན་ལགས། ཁྱེད་ནི་ང་ཡི་ཕུགས་བསམ་དང་རེ་བ་ཡིན།
ང་ཚོར་ཅི་ཡང་མེད་དུས། ཁྱེད་ཀྱིས་ཅི་ཡང་གནང་བྱུང་།
ཁྱེད་ཀྱི་བྱམས་དང་བརྩེ་བའི་ཕྱག་ཟུང་གིས།
ང་ཚོར་ཞི་དལ་བག་ཡོད་ཀྱི་སྤྱོད་བཟང་ལ་འཇུག་པའི་སྒོ་མོ་ཕྱེ་བྱུང་།
ཁྱེད་ཀྱི་ཉེ་རིང་མེད་པའི་འཛུམ་མདངས་ཀྱིས།
ང་ཚོར་སྔར་མེད་ཀྱི་དྲོད་ཁོལ་གསར་བ་ཞིག་བསྩལ་བྱུང་།
དགེ་རྒན་ལགས།
ཁྱེད་ཀྱི་ལྷག་བསམ་དང་གཏོང་ཕོད་ལ་གུས་ཕྱག་ཡང་ཡང་འཚལ།
ཁྱེད་ཀྱི་བརྩོན་འགྲུས་ལས་བྱུང་བའི་གྲུབ་འབྲས་རེ་རེར་ཡིད་སྨོན་ཤོར་མྱོང་།
ཁྱེད་ཀྱི་རྒྱུན་འཁྱོངས་ལས་བསྐྲུན་པའི་ལམ་བུ་རེ་རེར་བཀའ་དྲིན་ཞུས་ཡོད།
དགེ་རྒན་ལགས།
ཁྱེད་རང་ཨ་ཐང་ཆད་ཀྱང་། བསམ་པ་སློབ་མའི་ཁྲོད་ན་ཡོད།
ཁྱེད་རང་རེ་ཐག་ཆད་ཀྱང་། མིག་ཟུང་སློབ་ཁང་ནང་ན་ཡོད།
ཁྱེད་ནི་ང་ཚོར་རྟག་ཏུ་ཤར་བའི་རྟ་བདུན་དབང་པོ་ཡིན།
ཁྱེད་ནི་ང་ཚོར་རྟག་ཏུ་སེམས་པའི་བྱམས་ལྡན་གྱི་ཕ་མའང་ཅི་ལ་མིན།
སྟོན་གསུམ་འབྲས་བཟང་གི་ལོ་ལེགས་ཁུར་དུ་དུད་པའི་དུས་ཚིགས་འདིར།
ངས་ཁྱེད་ཁོ་ནར་དབང་བའི་དུས་ཆེན་ལ་ཁ་གཡང་འབོད།
བཀྲ་ཤིས་བདེ་ལེགས་ཀྱི་ཁ་གཡང་འབོད།
རྩོམ་གསར། 10