གུ་དཔལ་ཤིས། 2018-08-16
ཁྱོད་ནི་ང་ཡི་ཚོར་བའི་གནམ་ངོ་ཡིན།།
ཉི་མ་གྲང་དང་ཟླ་འོད་འཆར་ཚུལ་དག།
དྲན་སྣང་སྤྲིན་པ་འཐིབས་དང་མ་འཐིབ་ཀྱི།།
ཆར་འབྲུ་བཞིན་དུ་ཡིད་གཞུང་བརླན་ནས་ཐལ།།
སེམས་གཞུང་འདི་ནས་ཁ་བ་ལོ་མང་བརྩེགས།།
གངས་རི་བཞིན་དུ་འོད་ཀྱིས་འཁྱུད་པར་བྱས།།
ལོ་མ་སྒྲིག་པའི་རྟེན་འབྲེལ་ལྗང་གུའི་ངོགས།།
དབྱར་གཞུང་མེ་ཏོག་སེར་བས་དངན་པ་ཐེབས།།
གྲེ་བའི་ནང་གི་སྐད་ཆ་ལུས་འཕྲོ་དག།
རྨི་ལམ་རྫོང་ནས་ཞལ་ཁ་ཕྱེ་འམ་ཅི།།
ས་སྲོད་མོག་པའི་གྲིབ་མ་ཐར་ཐོར་འོག།
སེམས་ཀྱི་མེ་ཁ་སྦར་ཐབས་མ་བྱུང་ལགས།།
མིག་མཐའི་གྲིབ་དབྱངས་ཁྲོད་ན་སྒོམ་པར་ཞུགས།།
སེམས་སོང་སྡིག་སྒྲིབ་ཞེན་ཆགས་རབ་ཏུ་ལྗིད།།
གཙང་བོ་གྲངས་མེད་ཁྱོད་ཀྱི་གན་དུ་བཞུད།།
རི་བོ་མང་ཙམ་ཨག་འབྱོག་སྙིང་ཁར་བརླན།།
མིག་གི་མཐའ་ན་གྲིབ་མ་ལྷེམ་ལྷེམ་ལྷེམ།།
སྣང་བའི་དབྱར་ཁ་མེ་ཏོག་ཞལ་འཛུམ་ལེ།།
རྨི་ལམ་གྲོང་གི་བྱབས་ཁྲུས་གར་མ་ཀྱེ།།
ཆོས་ཉིད་སྟོན་གྱི་དུས་ཚིགས་ཚེས་ལ་ཤོག།
འབྱུང་འཁྲིགས་ལོ་ཟླ་དམར་པོ་རབ་ཞི་ནས།།
ལང་ཚོ་འཛུམ་པའི་མཆོར་སྒེག་ལྡེམ་ལ་ཤོག།
ཚོར་བའི་དབྱངས་འགྲོས་སིམ་པའི་ཞོགས་གསར་ཞིག།
ཚེས་པའི་རྟེན་འབྲེལ་སྙན་ངག་བསིལ་མ་འདྲེན།།
རྩོམ་གསར། 10