དབྱར་དུས་ཀྱི་སྣང་བ།

སྨྱུག་སྨྱོན།        2018-08-10

ཆར་པ་ཟིམ་ཟིམ་དུ་འབབ།

ས་འཛིན་ན་བུན་དང་སྨུག་པས་མནན་ཞིང་ཉེ་སར་བཅར།

ཐམས་ཅད་སྣུམ་ཐིང་ངེར། ཁུ་སིམ་མེར།

ལྗིད་ཏིག་གེར་གནས་བཅའ།

 

སྔོ་ལྗང་སྤང་རིའི་ལོགས་ཀྱི་གཡང་དཀར་གྱི་དྲིལ་དབྱངས།

གསལ་ཞིང་རྣ་བར་སིམ།

ཞིང་གསེབ་ཀྱི་རྐང་ལམ་ཀྱ་ཀྱུའི་ཐོག་གི་ཆུ་ལེན་ན་ཆུང་

མ་དེ་ཡང་ཏོབ་སྒྲ་དང་བཅས་རྐང་པའི་འདེགས་

འཇོག་འགྱུར་ཞིང་ལྟ་ན་སྡུག

 

ཁང་ཁྱིམ་དང་སྦྲ་གུར་ནས་དུ་བ་སྔོ་ལྷོག་ལྷོག་འཕྱུར།

ཕ་རྒན་གྱིས་གཞེས་ནིང་ལོའི་འབྲུ་ཆང་འཐུང་

བཞིན་སེམས་རྣལ་དུ་དབབ།

རྒྱལ་སྒོའི་མདུན་ངོས་ཀྱི་འདོགས་ཁྱི་རྔམ་པོ་དེ་

བར་མེད་དུ་འབ་པ་ནི།

སྦྱིན་བདག་ལ་ཤ་ཚ་བས་ཟུག་པ་འདྲ།

 

ཆར་པ་ཟིམ་ཟིམ་དུ་འབབ།

སྐྱེ་དངོས་ཀྱི་རྩ་བ་ལོ་འདབ་མུ་ནས་རྒྱས།

 

ཆར་རྗེས་ཀྱི་འཇིག་རྟེན་ལ་གཞིག་ན།

བག་ལ་ཉལ་བའི་ཡོལ་བ་ཞིག་གིས་ཀུན་ནས་བཀབ།

ཆར་པའི་ཁྲོད།

ཆར་གདུགས་མེད་ན་མི་རྣམས་བགྲོད་དབང་

བསྐུངས་བ་རང་གཤིས་སུ་རློམ།

ཆར་པའི་རྗེས།

ནུབ་ཚར་བའི་རྐང་ལམ་ལ་སླར་གསལ་ཁ་བཏོད་

པའི་བློ་སྤོབས་ཡེ་ནས་བྲལ།


  • ལེ་ཚན་སྔོན་མ།:དྲན་ངོགས་ཀྱི་ཁྱེད།
  • ལེ་ཚན་རྗེས་མ།:ང་ཅོལ་ཆུང་ཡིན་ཡང་ཨ་མར་བསྟོད།
  • རྩོམ་གསར། 10