ཞིན་ཧྭ་གསར་འགྱུར་ཁང་པེ་ཅིན་ནས་སྤྱི་ཟླ7པའི་ཚེས14ཉིན་འབྱོར་བའི་གཏམ་གསར། རང་བྱུང་ཐོན་ཁུངས་པུའུ་ནས་ཤེས་རྟོགས་བྱུང་བར་གཞིགས་ན། “ཉི་གཏད་དམར03”རྟགས་ཅན་གྱི་ཚན་རིག་ཞིབ་འཇུག་གྲུ་གཟིངས་ཚེས14ཉིན་ཞ་མེན་ནས་གཏོང་འགོ་ཚུགས་ཏེ་ནུབ་ཞི་བདེ་རྒྱ་མཚོ་དང་ཤར་ཞི་བདེ་རྒྱ་མཚོ་སོགས་ཀྱི་ས་ཁོངས་སུ་ཀྲུང་གོའི་རྒྱ་མཚོ་ཆེན་མོར་ཚན་རིག་ཞིབ་འཇུག་གི་ལས་འགན་ཐེངས50པ་བསྒྲུབ་རྒྱུ་ཡིན་ཞིང་། སྔོན་དཔག་བྱས་ན2018ལོའི་ཟླ12པར་ལས་འགན་ལེགས་གྲུབ་བྱུང་ནས་ཞ་མེན་དུ་ཕྱིར་ལོག་རྒྱུ་ཡིན་པ་རེད། གྲུ་གཟིངས་ལན་གྲངས་དེས་རང་རྒྱལ་གྱི་མཚོ་འཇིངས་འཐབ་ཇུས་ཆེད་དོན“ཀླུ་མོ་མཚོ་འཇིངས”ལས་གྲྭའི་ལས་འགན་གཙོ་བོ་བསྒྲུབ་རྒྱུ་དངAདུམ་བུ་དངBདུམ་བུ་གཉིས་སུ་དབྱེ་རྒྱུ་ཡིན་པར་ཁྱོན་ཉིན150འགོར་རྒྱུ་དང་ལམ་ཚད་མཚོ་ལེ15000ཙམ་ལ་ཟིན་རྒྱུ་རེད། དེའི་ཁྲོདAདུམ་བུ་མཚོ་འགྲུལ་དུམ་བུ་དང་པོ་ཡིན་ཞིང་། དུས་ཡུན་ཉིན50ཡིན་པ་དང་གཙོ་བོ་ཀྲུང་གོའི་རྒྱ་མཚོ་ཆེན་མོའི་མཐུན་ཚོགས་ཀྱི་ལྕགས་རིགས་མང་པོ་གཅིག་འདུས་གན་རྒྱའི་ཁུལ་དུ་ཐོན་ཁུངས་དང་ཁོར་ཡུག་དང་སྐྱེ་དངོས་སྣ་མང་རང་བཞིན་ཞིབ་བཤེར་བྱས་ནས་གན་རྒྱའི་ཁུལ་གྱི་ཁོར་ཡུག་གཞི་རྟེན་ཐིག་ཚད་གྲངས་གཞི་དང་དངོས་དཔེ་ཐོབ་པ་བྱ་རྒྱུ་དེ་ཡིན་པ་རེད། Bདུམ་བུ་དེ་མཚོ་འགྲུལ་དུམ་བུ་གཉིས་པ་དང་གསུམ་པར་དབྱེ་བ་དང་དུས་ཡུན་ཉིན100ཡིན་པ་རེད། མཚོ་འགྲུལ་དུམ་བུ་གཉིས་པ་དེ་གཙོ་བོ་ཤར་ཞི་བདེ་རྒྱ་མཚོ་ཀྲུང་གོའི་གཏེར་ལས་ཚོགས་པ་ཀུང་སི་ལྔ་པས་ལྕགས་རིགས་མང་པོ་གཅིག་འདུས་གན་རྒྱའི་ཁུལ་དུ་ཐོན་ཁུངས་དང་ཁོར་ཡུག་ཞིབ་བཤེར་བྱས་ནས་གན་རྒྱའི་ཁུལ་གྱི་ཐོན་ཁུངས་གནས་ཚུལ་མདོར་བསྡུས་སྔར་བས་ཤེས་རྟོགས་བྱ་རྒྱུ་རེད། མཚོ་འགྲུལ་དུམ་བུ་གསུམ་པ་དེ་གཙོ་བོ་ཤར་ཞི་བདེ་རྒྱ་མཚོ་ཀྲུང་གོའི་གཏེར་ལས་ཚོགས་པ་སྤྱི་གཉེར་ཁང་ལྔ་པའི་གན་རྒྱའི་ཁུལ་དང་ཤར་ཞི་བདེ་རྒྱ་མཚོ་ཀྲུང་གོའི་རྒྱ་མཚོ་ཆེ་མོའི་མཐུན་ཚོགས་ཀྱི་གན་རྒྱའི་ཁུལ་དུ་ཐོན་ཁུངས་དང་ཁོར་ཡུག་གི་གཞི་རྟེན་ཐིག་ཚད་གྲངས་གཞི་ཞིབ་བཤེར་བྱ་རྒྱུ་རེད། གཞན་ཡང་ཚན་ཞིབ་རུ་མི་ཚོས་ད་དུང་མཚོ་ལམ་དུ་ཆུ་གཟུགས་ཀྱི་འཕྲོ་འགྱེད་རང་བཞིན་དང་རྒྱ་མཚོའི་འགྱིག་ཕྲན་སོགས་རྒྱ་མཚོའི་ཁོར་ཡུག་ཐད་ཀྱི་དོ་སྣང་བྱེད་མང་བའི་གནད་དོན་ལ་བརྟག་དཔྱད་བྱ་རྒྱུ་རེད།།