བོད་ལྗོངས་ཀྱི་ཕོ་བྲང་པོ་ཏ་ལ་རྣམ་གསུམ་ནི་དམར་པོ་རིར་བཞེངས་པའི་ཕོ་བྲང་པོ་ཏ་ལ་དང་། གཞིས་ཀ་རྩེའི་བསམ་གྲུབ་རྩེ་མཁར་རྫོང་། ནག་ཆུ་ས་ཁུལ་གྱི་སོག་རྫོང་ཙན་དན་དགོན་བཅས་ལ་བཤད་པ་ཡིན་ཞིང་། ཕོ་བྲང་འདི་གསུམ་གར་ཐུན་མོང་གི་ཁྱད་ཆོས་མངོན་པ་སྟེ། བཟོ་བཀོད་ལ་བརྗིད་ཉམས་ལྡན་ཞིང་ཕན་ཚུན་གྱི་དབྱིབས་མཚུངས་ལ། ཕོ་བྲང་སོ་སོ་རི་བོ་རྒྱབ་བརྟེན་དུ་བྱས་ནས་བཞེངས་ཡོད་པ་རེད། 

       བོད་ལྗོངས་ནག་ཆུ་ས་ཁུལ་གྱི་སོག་རྫོང་དུ་མངའ་བའི་ཙན་དན་དགོན་ནི་ཀུན་གྱིས་བཞེད་ཚུལ་ལྟར་ན་སྤྱི་ལོ1667ལོར་བཞེངས་པ་ཡིན་མོད། ཆོས་སྡེ་འདི་གས་འདོན་སྤྲོད་བྱས་པའི་ཡིག་ཆ་ལྟར་ན་སྤྱི་ལོ1232ལོར་བཞེངས་པ་ཡིན་ཞིང་། ཐོག་མར་རྙིང་མ་པ་དང་། དེའི་རྗེས་བཀའ་བརྒྱུད་པ། ཕྱིས་སུ་དགེ་ལུགས་པ་བཅས་གྲུབ་མཐའ་དུ་མར་བསྒྱུར་བཅོས་བྱས་མྱོང་བ་རེད། ཕོ་བྲང་འདི་གླང་བོ་ཆེ་གན་རྐྱལ་དུ་ཉལ་བ་ལྟ་བུའི་རིའི་སྟེང་དུ་བཞེངས་ཡོད་ལ། མཐའ་འཁོར་དུ་པདྨ་འདབ་བརྒྱད་དང་འདྲ་བའི་ས་འཛིན་དབང་བོའི་མུ་ཁྱུད་དང་ཡན་ལག་བརྒྱད་ལྡན་གྱི་སོག་ཆུས་བསྐོར་འདུག ཙན་དན་དགོན་ལ་ཕོ་བྲང་པོ་ཏ་ལ་དང་མཚུངས་བར་ཕོ་བྲང་དཀར་པོ་དང་། ཕོ་བྲང་དམར་པོ། གྲྭ་ཤགས་བཅས་ཁང་བརྩེགས་རིམ་པ་བདུན་གྱིས་གྲུབ་ཡོད་པས་ཕོ་བྲང་པོ་ཏ་ལ་ཆུང་བ་ཞེས་ཀྱང་འབོད་ཀྱིན་ཡོད། 2001ལོར་རྫོང་རིམ་པས་རིག་དངོས་སྲུང་སྐྱོབ་ལས་ཁུངས་སུ་བདམས་པ་དང་། 1996ལོའི་རྗེས་སུ་ལོ་རེ་རེ་བཞིན་ཞིག་གསོ་དང་བསྐྱར་འཛུགས་བྱས་པར་བརྒྱུད་སྔར་ལས་རྒྱ་བསྐྱེད་པ་རེད།