བྲན། 2018-07-09
ནང་སེམས་རང་རིག་གི་མེ་ལོང་ནམ་མཁའི་ངོས་སུ།།
འཆར་ཡན་རྒྱུ་སྐར་གྱི་རི་མོ་སྣ་ཚོགས་ཤར་ན།།
སྣང་བ་སྤྲིན་དཀར་གྱི་ལུག་ཁྱུ་སྤང་ལ་འཐོར་འགྲོ།
སྟོན་གཞུང་ས་སྲོད་ཀྱི་གྲིབ་ཆེན་སྨག་གིས་ཟས་འགྲོ།
ཕྱི་རོལ་གཟུང་འཛིན་གྱི་སྒེའུ་ཁུང་ལྷོ་ལྟའི་ནང་ནས།།
དཀར་གསལ་ཟླ་འོད་ཀྱིས་འཐུང་བའི་མཚོ་མོ་རིག་ན།།
དྲན་པའི་རོལ་དབྱངས་ཀྱི་འགྱུར་ཁུགས་རིམ་གྱིས་ཉམས་འགྲོ།
ཤག་ཤག་ཆུ་མོ་ཡི་ཞེན་པའི་ལྷིང་འཇགས་དཀྲོགས་འགྲོ།
འཕངས་འབྲས་ཀུན་ཉོན་གྱིས་བསྐྱེད་པའི་ལ་མོ་ཐང་ནས།།
སྨིག་རྒྱུའི་ན་བུན་གྱི་རླངས་པ་ཞེ་རུ་ལྡིང་ན།།
ཆགས་པ་བན་བུན་གྱིས་དཀྲིས་པའི་རྣམ་ཤེས་ཁེགས་འགྲོ།
མཚུངས་མེད་འདུ་བྱེད་ཀྱི་སོར་མོའི་ཚོར་བ་ཉམས་འགྲོ།
རྟག་བརྟན་འགྱུར་མེད་ཀྱི་སེམས་པའི་ཀུན་གསལ་ཀློང་ནས།།
མི་འགྱུར་སྤྲོས་པ་ཡི་མཐའ་བརྒྱད་མདུད་པ་གྲོལ་ན།།
གུ་ཡངས་བག་ཕེབས་ཀྱི་རྩ་བའི་འགལ་འདུ་བཤིག་འགྲོ།
རྣམ་རྟོག་འདྲེ་སྲིན་གྱི་འཁོར་ཚོགས་རང་སར་བུད་འགྲོ།
ཕྱིན་དྲུག་ཚོགས་གཉིས་ཀྱི་དོན་དམ་སྒྱུ་མའི་གྲོང་ནས།།
སྣང་བ་སེམས་དབེན་གྱི་གསང་བའི་འཇོལ་མོ་གྲགས་ན།།
བདེན་སྟོང་ཐ་མ་ཡི་སྲིད་པའི་བག་ཆགས་ཡལ་འགྲོ།
འཛུམ་བག་སྣ་ཚོགས་ཀྱི་སྡོང་ལོ་རླུང་གིས་གཏོར་འགྲོ།
རྩོམ་གསར། 10