གངས་ཆབ། 2018-07-06
ཀ་བ་གདུང་མས་བཏེགས་པའི་ཁང་ཁྱིམ་གྱི་ནང་ནས།།
ཁ་བའི་འདབ་མ་ཐོར་བ་སྒེའུ་ཁུང་ལས་མཐོང་དུས།།
ག་ཤེད་རི་ལུང་ཞིག་ན་ནོར་རྗེས་སུ་སྙེག་པའི།།
ང་ཡི་ཚ་བོ་ཚ་མོ་ཆུང་ཆུང་དག་དྲན་བྱུང་།།
ཅ་དག་ཕ་སྐད་གཙང་མ་ངག་སྒོ་ནས་ཐོན་ཅིང་།།
ཆ་ལུགས་བོད་གྱི་ལྭ་བ་ཡང་དག་ཅིག་གྱོན་ནས།།
ཇ་མར་ཤ་ཐུད་གཙང་མའི་ཁ་ཟས་དེ་རོལ་བའི།།
ཉ་ཉོག་ཁྱེད་ཚོ་དེ་རིང་འཁྱག་གི་ཞིག་ཨེ་ཡོད།།
ཏ་ལའི་ལོ་མ་ལྟ་བུའི་ཁ་བ་ཡི་འདབ་མ།།
ཐ་གྲུ་རི་ཀླུང་ཀུན་ཏུ་ཕྱོགས་མེད་དུ་བབས་ཀྱང་།།
ད་སྐབས་ཕྱུགས་ལུག་འཚོ་བའི་འབྲོག་ཐང་གི་རྫི་བོ།།
ན་ཐང་ལུང་ཁུགས་ཤིག་ན་གྲང་གི་ཞིག་ཡོད་དམ།།
པ་སངས་མདངས་ལས་དཀར་བའི་ཁ་བ་དེ་བབས་དུས།།
ཕ་རོལ་རི་སུལ་ཞིག་ན་རྫི་བོ་རུ་ཆས་པའི།།
བ་ཕྱུགས་གནག་ལུག་འཚོ་བའི་ཨ་ཉོག་དེ་ཆུང་ཆུང་།།
མ་ལོའི་རྩིབ་ན་མེད་པས་སྐྱོ་འུ་ཞིག་མེད་དམ།།
ཙ་ཏུར་བཞི་ལྡན་གཅན་གཟན་གདུག་རྩུབ་ཅན་དེ་ཚོས།།
ཚ་རུ་བལ་འཇམ་ལྡན་པའི་ལུག་ཁྱུ་ནི་དེ་ཚོ།།
ཛ་ལུང་རི་སུལ་ཀུན་ནས་འཇབ་རྒྱུགས་ཀྱིས་གསོད་པས།།
ཝ་མ་ཝོ་ལ་མ་ཡེངས་རྫི་བོ་དེ་སུན་ནམ།།
ཞྭ་མོ་དྲོན་པོ་ཞིག་ནི་མགོ་བོ་རུ་གྱོན་ཀྱང་།།
ཟ་རྒྱུ་བྲོ་ཆས་ཕྲན་བུ་རུམ་ནང་ན་ཨེ་ཡོད།།
འ་འུར་ལ་ཐང་གཉིས་ལ་ཆད་ཆད་དུ་བརྒྱུགས་ཀྱང་།།
ཡ་སོ་མེད་པའི་འབྲི་གཡག་མཚམས་པོ་རུ་ཨེ་ཐོན།།
ར་བ་ཕྱུགས་ཀྱིས་གང་ན་སྐྱིད་སྐྱིད་ཅིག་འདྲ་ཡང་།།
ལ་ལུང་འཕྲེད་ཀྱིས་གཅོད་པར་དཀའ་དཀའ་ཞིག་འདུག་གམ།།
ཤ་མར་ཟས་ཀྱི་བྲོ་བ་ཞིམ་པོ་ཞིག་ཡིན་ཡང་།།
ས་ཆེན་རྡོག་གིས་གནོན་པར་ཡི་ཐང་ཞིག་ཨེ་ཆད།།
ཧ་ཅང་སྙན་པོ་མིན་ཀྱང་སྒྲ་རྒྱན་དུ་ཐེ་བ།།
ཧ་ལམ་དོན་གྱི་གོ་བ་ཕྱོགས་ཙམ་ཞིག་སྟོན་པ།།
ཨ་ཉོག་ཕྱུགས་རྗེས་འདེད་པའི་ཚ་བུ་དང་ཚ་མོར།།
ཨ་ཞང་རང་མིང་ཅན་དེས་གང་དྲན་དུ་བྲིས་སོ།།
རྩོམ་གསར། 10