ཚ་ཁོག་ཤང་།

      ཚ་ཁོག་ཤང་གི་ཧི་ཕིང་གྲོང་སྡེ་བཞི་པའི་སྟོད་དུ་ཆགས་པའི་རི་དེའི་སྐེད་པ་ནས་འབབ་པའི་ཆུ་དེ་ནི་རྒྱལ་བ་ཀརྨ་པ་གནས་འདིར་ཕེབས་དུས་ཁ་སྐོམ་པས་བྲག་ཕུག་ནས་བཏོན་ཏེ་ཇ་བསྐོལ་ནས་བཞེས་པ་དང་། རྗེས་སུ་དེའི་ཤུལ་ན་ཇ་ཤིང་ཞིག་འཁྲུངས་ཏེ་ད་ལྟར་ཇ་ལོ་སྔོ་སེང་སེང་ཡོད་ལ། བྲག་ཕུག་ནང་ཟངས་དེམ་ཞིག་ཀྱང་སྦས་ཡོད། རི་བོ་དེའི་རྒྱབ་ན་བླ་མ་ལུང་ཞེས་པར་ཀརྨ་པའི་མཚམས་ཁང་ཡོད་པས་མ་ཚད་བྲག་ངོས་སུ་བོད་ཡིག་ཀྱང་མང་པོ་མཇལ་རྒྱུ་ཡོད་ཟེར། གྲོང་མི་ཚོས་བསྟན་ཕྱོགས་སུ་ལྟ་དུས་དངོས་གནས་དར་དཀར་པོ་ཐུར་དུ་དཔྱངས་པ་འདྲ་བོའི་ཆུ་ཕྲན་ཞིག་བཞུར་ཡོད་ལ་འགོ་ཁུངས་སུ་ཤིང་སྡོང་ཞིག་ཀྱང་མཐོང་ཐུབ།

ཀརྨ་པས་བཏོན་པའི་གྲུབ་ཆུ།

     གྲོང་མི་ཚོས་ཆུའི་ཕར་རོལ་དུ་ད་དུང་མ་ཎི་བརྐོས་ཡོད་པའི་རྡོའང་ཡོད་ཟེར། ང་འདུག་བཟོད་མེད་པར་མགྱོགས་མྱུར་དུ་དུད་ཚང་གཅིག་ཡོད་པ་དེའི་ཕྱོགས་སུ་སོང་རྗེས་ཇི་ལྟར་བཙལ་ཡང་མ་ཎི་རྡོ་འབུམ་གྱི་གྲིབ་མ་ཙམ་ཡང་མ་མཐོང་བས་ཕྱིར་ལོག་གྲབས་བྱེད་དུས། འཕྲུལ་རྟ་ལ་བཞོན་པའི་ཕོ་སར་ཞིག་དང་ཐུག  ཁོས་མཛུབ་སྟོན་ལྟར་ད་ཅི་སོང་མྱོང་སར་སླར་ཡང་བཙལ་དུས་རྩྭ་ལྡུམ་དང་ཤིང་སྡོང་གི་ཁྲོད་ན་ས་འབུར་འབུར་ཞིག་འདུག  མགོ་བོ་བསྒུར་ནས་ལག་པས་རྩྭ་ལྡུམ་རྣམས་འབལ་ཏེ་ཐལ་རྡུལ་རྣམས་གཙང་མར་ཕྱིས་མ་ཐག་མ་ཎི་བརྐོས་ཡོད་པའི་རྡོ་འབུམ་རྣམས་གཅིག་རྗེས་གཉིས་མཐུད་ཀྱིས་མིག་ལམ་དུ་མངོན་བྱུང་།

ས་འོག་ཏུ་སྦས་པའི་མ་ཎི་རྡོ་བརྐོས།

      རྡོ་འབུམ་གྱི་ཆགས་ཚུལ་ལ་བལྟས་ན། རྒྱ་ལམ་མ་ལས་གོང་འདི་ན་ནི་དད་ལྡན་རྣམས་ཀྱི་ཕྱག་སྐོར་བྱེད་ས་ཞིག་ཡིན་ཐག་ཆོད་མོད། དུས་ཀྱིས་དེད་པས་བོད་མི་རྣམས་རིམ་བཞིན་རྒྱང་དུ་བཀྱེས་ཏེ་རྡོ་འབུམ་ནི་ཁེར་རྐྱང་དུ་ལྷག  ངས་རྡོ་རེ་རེའི་སྟེང་གི་སྔོ་དྲེག་རྣམས་བཀོག་སྟེ་ལག་པས་འབྲུ་དྲུག་གི་ཡིག་གཟུགས་ལ་བྱིལ་བྱིལ་བྱེད་དུས། དད་པ་རིས་སུ་བརྐོས་ཏེ་བསྔོ་སྨོན་ས་གཞིར་བཅོལ་བའི་གནའ་མི་ཚོ་ལ་ལག་འཇུ་བྱེད་པ་དང་འདྲ། རྡོ་འབུམ་གྱི་གཟུངས་སྔགས་རེ་རེ་ཕྱི་ལ་མངོན་དུས་གྲོང་སྟོད་དུ་ཆགས་པའི་རི་འགོ་ནས་ཁ་རྦབ་ཆད་དེ་འབྲུག་གྲག་པ་ལྟ་བུའི་ལྡིར་སྒྲ་ལན་དུ་མར་གྲག་པ་ནི། ཡུལ་དུས་གཉིས་ཀྱིས་བསྒྲིབས་པའི་ལོ་རྒྱུས་ཀྱི་ཟིན་ཐོ་བོད་མི་ཞིག་དང་ཐོག་མར་འཕྲད་པའི་རྟེན་འབྲེལ་ཡིན་ལ། ཆུ་བོའི་ཕར་རོལ་དང་རི་བོའི་རྒྱབ་ཕྱོགས་སུ་སོང་བའི་རིགས་རྒྱུད་ཅིག་ལ་འབོད་སྐུལ་བཏང་བའང་ལོས་ཡིན།

     ངག་རྒྱུན་དུ་ཀརྨ་པ་གངས་དཀར་རི་བོ་ཕྱོགས་ནས་ཕེབས་ཏེ་ཧེ་ཕིང་གྲོང་སྡེ་གཉིས་པར་སླེབས་དུས། ཁྱིམ་ཚང་ཞིག་གི་བུ་སྤུན་གཉིས་ཀྱིས་ས་ཞིང་དང་རྒྱུ་ནོར་འཕྲོག་རྩོད་བྱེད་ཀྱིན་ཡོད་པ་དང་འཕྲད་པས་དེ་འདུམ་འགྲིག་མཛད། དེ་ནས་ཡར་ཕེབས་ཏེ་ཧེ་ཕིང་གྲོང་སྡེ་གསུམ་པའི་ཕར་རོལ་དུ་སྔོན་མའི་འགྲོ་ལམ་རྙིང་པའི་བྲག་རྩར་སྐུ་ངལ་གསོ་དུས་ཀྱི་ཕྱག་རྗེས་དང་ཞབས་རྗེས་ཡོད་ཀྱང་། ད་ལྟར་རྩྭ་ལྡུམ་གྱིས་བཀབ་སྟེ་ཧ་ཅང་རྙེད་དཀའ་ཟེར།  གྲོང་པ་དེའི་ཕར་རོལ་གྱི་རི་འདབས་སུ་བྲག་སྒང་སྒང་ཞིག་ཡོད་པ་དེ་ལ་ཡུལ་མི་ཚོས་བླ་མ་སྒང་ཞེས་འབོད།

ཀརྨ་པའི་ཞབས་རྗེས་ཡོད་པའི་བླ་མ་སྒང་།

     ས་ཆ་འདིའི་རྒན་པ་རྣམས་ཀྱིས་བཤད་པའི་ཀརྨ་པའི་གཏམ་རྒྱུད་ལས་ཀརྨ་པ་ཞེས་པ་ཡང་སྙིང་གང་ལ་ངོས་འཛིན་དགོས་ཞེ་ན། སྤྱིར་གངས་དཀར་རིན་པོ་ཆེའི་སྐུ་རབས་རིམ་བྱོན་ལ་སྐུ་རབས་གསུམ་པ་ཀརྨ་ཆོས་ཀྱི་འོད་ཟེར་དང་བཞི་པ་ཀརྨ་ཀུན་དགའ་དཔལ། ལྔ་པ་ཀརྨ་བྱང་ཆུབ་བསྟན་འཛིན་ཞེས་མཚན་གྱི་མགོ་ནས་ཀརྨ་ཞེས་བྲིས་པས་དེ་ལྟར་འབོད་སྲིད་མོད། མི་ཉག་ཕྱོགས་ནས་གངས་དཀར་རིན་པོ་ཞེས་པ་ལས་ཀརྨ་པ་ཞེས་འབོད་སྲོལ་མི་འདུག

     མི་ཉག་མགོན་པོས་འབོ་གངས་དཀར་སྤྲུལ་སྐུའི་རྣམ་ཐར་ནང་ལ་རྨ་སེ་སྟོན་པ་རིན་ཆེན་བཟང་པོ་ནི་གངས་དཀར་བླ་མ་སྐུ་རབས་གཉིས་པ་ཡིན་ལ། སྤྱི་ལོ༡༣༧༢ལོར་རྟེན་འབྲེལ་བཟང་པོར་གཟིགས་ནས་དེང་སང་གངས་དཀར་རི་བོ་ཤང་གི་རྨུ་རྒྱུ་ཁྲི་འཛི་ལུང་པའི་རྒྱབ་རི་གར་མིའི་སྐེད་པར་དགོན་པ་ཞིག་བཏབ་པ་དེར་ཐོག་མར་མིང་དགོན་ཞེས་པ་དང་། རྗེས་སུ་རྨ་སེ་དགོན་ཁམས་གསུམ་གྲགས་བདེ་ཆེན་གླིང་ཞེས་གྲགས།གནས་དེར་བཤད་གྲྭ་དང་སྒྲུབ་གྲྭ་གཉིས་ཀ་བཙུགས་པས་བསྟན་པ་རྒྱས། བླ་མ་ཁོང་གིས་གངས་དཀར་དགོན་རྙིང་དང་རྨ་སེ་དགོན་གཉིས་ཀྱི་བདག་པོ་མཛད། སྐབས་དེ་དུས་ཀརྨ་པ་རོལ་པའི་རྡོ་རྗེ་གནས་འདི་གར་ཕེབས་ཏེ་དད་ལྡན་སེར་སྐྱ་རྣམས་ལ་ཆོས་ཀྱི་གནང་བ་བྱིན་པས་མ་ཚད་མི་ཉག་རབ་སྒང་གི་འཁྲུགས་པ་མང་པོ་ཞི་བར་མཛད་དེ་བློ་ཁ་ཆོས་ལ་བསྒྱུར་ཞེས་པ་དང་། དུང་དཀར་ཚིག་མཛོད་ནང་ཀརྨ་པ་སྐུ་ཕྲེང་བཞི་པ་རོལ་པའི་རྡོ་རྗེ་སྤྱི་ལོ༡༣༦༠ལོར་པེ་ཅིན་ཕོ་བྲང་ཆེན་པོར་ཕེབས་ཏེ་བོད་ཕྱོགས་སུ་ཕྱིར་ཕེབས་གནང་བའི་ལམ་ཀན་སུའུ་དང་མཚོ་སྔོན་བརྒྱུད་ནས་མདོ་ཁམས་ལྷོ་བརྒྱུད། འབའ་ཐང་། ཀོང་པོ། ཙཱ་རི་སོགས་གནས་ཐམས་ཅད་དུ་ཕེབས་པས་ལམ་བར་ལོ་བཅུ་ཙམ་ཐོགས་འགོར་བྱུང་ཞེས་པ་ལས་མི་ཉག་ཕྱོགས་ལ་ཕེབས་ཚུལ་བྲིས་མི་འདུག་མོད། དེང་སང་གངས་དཀར་དགོན་པའི་མཐའ་སྐོར་ལ་དམ་པ་ཁོང་གི་ཞབས་རྗེས་སོགས་མཇལ་རྒྱུ་ཡོད་པ་དང་། འབའ་ལ་ཕེབས་ན་མི་ཉག་ཕྱོགས་ཀྱི་བཀའ་བརྒྱུད་པའི་དགོན་གནས་གཙོ་བོ་ལའང་ཕེབས་ངེས་པས་དེ་ནི་རྒྱལ་བ་ཀརྨ་པ་རོལ་པའི་རྡོ་རྗེའི་ངག་རྒྱུན་ཞིག་མིན་ནམ་སྙམ།

མ་ཎི་རྡོ་བརྐོས་རྙིང་པ།

     ཡིའུ་ཨའེ་གྲོང་སྡེའི་རི་སྒང་སྒང་ཞིག་ཏུ་སྨྱུག་མའི་ནགས་ཚལ་ནང་དུད་རྐྱང་ཞིག་ཡོད་པ་དེའི་སྒོ་ཁར་སླེབས་དུས། བདག་པོས་བསྟན་པ་ལྟར་རྒྱ་སྒོའི་འགྲམ་ལ་ཕྱུར་བུར་སྤུངས་པའི་རྡོ་ལེབ་མང་པོའི་ཐོག་ལ་ཤེལ་དམ་དང་བྱིས་པའི་རྩེད་ཆས་རྙིང་པ་སོགས་གད་སྙིགས་ཀྱིས་གང་འདུག  ངས་གད་སྙིགས་རྣམས་རེ་རེ་བཞིན་བླངས་ཏེ་ཞིབ་ཀྱིས་བལྟས་དུས་དེ་ནི་མ་ཎི་བརྐོས་ཡོད་པའི་རྡོ་འབུམ་རེད་འདུག  ལ་ལ་མགོ་ཐུར་བསྒྱུར་ནས་བཞག་ཡོད་ཅིང་། ཡིག་གཟུགས་ཀྱང་རབ་རིབ་ཙམ་ལས་གསལ་པོར་མཐོང་མི་ཐུབ། ངས་མགོ་ཐུར་བསྒྱུར་བ་རྣམས་དྲང་པོར་བཞག་རྗེས་ཐོག་ནས་མར་བལྟས་དུས། དེ་ནི་སྤྱིར་བཏང་གི་རྡོ་འབུམ་ཞིག་ལས་མི་མཐོང་ཡང་། འོག་ནས་ཡར་བལྟས་ན་མ་གཞིར་བང་རིམ་ལྔ་ཅན་གྱི་མཆོད་རྟེན་གྱི་བཟོ་ལྟ་ཞིག་རེད་འདུག་པས་དོན་དུ་འདི་ནི་མཆོད་རྟེན་གཟུགས་ཀྱི་རྡོ་འབུམ་ཞིག་ཡིན་ནམ། ཡང་ན་ཕྱི་ལ་རྡོ་འབུམ་བརྩིགས་པའི་མཆོད་རྟེན་ཞིག་ཡིན་གསལ་ཐག་མ་ཆོད།

ཕྱི་ལ་མ་ཎི་རྡོ་བརྐོས་བཞག་ཡོད་པ་འདི་ནི་མཆོད་རྟེན་ཞིག་མིན་ནམ་སྙམ།

       སྐབས་དེར་བདག་པོས་ད་དུང་ཁང་ཞབས་ཀྱི་བྲག་ཕུག་ནང་འདམ་པའི་བྱིས་པ་ཡོད་ཅེས་ཟེར། འདམ་པའི་བྱིས་པ་ཞེས་པ་ནི་འདམ་པས་བཞེངས་པའི་ལྷ་སྐུ་འདྲ་མིན་ནམ་སྙམ་སྟེ་སོང་ནས་བལྟས་དུས། སྨྱུག་མའི་ནགས་ཚལ་ནང་པོ་ཏི་འདྲ་བའི་བྲག་རྡོ་བརྩེགས་མ་ཅན་ཞིག་གི་འོག་ལ་ཚ་ཚ་མང་པོ་གཏོར་འདུག  མང་ཆེ་བ་ནི་མགོ་ཆད་མཇུག་རྡུམ་ལས་ཆ་ཚང་བ་ཞིག་ཕལ་ཆེར་མེད་པ་ནི་དུས་ཡུན་རིང་པོ་འགོར་བ་དང་བྱིས་པ་བསམ་མེད་རྣམས་ཀྱིས་རྩེད་ཆས་བྱེད་པས་ཡིན་རྒྱུ་རེད། བདག་པོས་འདི་ཚོ་ནི་ཁོ་རང་ཆུང་དུས་ནས་ཡོད་ཟེར་བ་ཙམ་ལས་ཚ་ཚ་ཞེས་མིང་ཡང་མི་ཤེས་པར་འདམ་པའི་བྱིས་པ་ཞེས་དགོད་ཤོར་བའི་མིང་གིས་འབོད་ཀྱིན་ཡོད་པས། འཇིག་རྟེན་གྱི་དངོས་པོ་མང་པོ་མིང་མེད་པ་ནས་འགོ་ཚུགས་ཏེ་རིམ་བཞིན་དོན་གྱིས་སྟོང་བ་དང་། མཐར་རྗེས་མེད་ཤུལ་མེད་དུ་ཆགས་འགྲོ་བའི་གནས་ལུགས་ལ་བདེན་ཁ་མི་སྟེར་རང་སྟེར་རེད་བསམས།

སྨྱུག་ཚལ་ནང་གི་ཚ་ཚ་བཞག་ཡོད་པའི་བྲག་ཕུག