ལྷ་ས། བྱམས་པ་ཚེ་སྒྲོན། 2018-06-20
ཀ་ལ་པིང་ཀའི་སྙན་དབྱངས་དོ་ཤལ་དེ་མེད་རུང་།།
ཁ་བའི་ལྗོངས་ཀྱི་སྐད་ཡིག་རྩ་ཆེན་འདི་སྤྱད་ནས།།
ག་ལེར་དྲན་པའི་ས་བོན་ཞིང་ས་རུ་རྒྱས་སྐབས།།
ང་ཡི་ཚོར་བའི་ཡིག་ཕྲེང་ཁྱེད་ཕྱོགས་ལ་སྤྲིངས་ཡོད།།
ཅ་ག་བསམ་སྤྱོད་དག་པའི་རང་ཡུལ་གྱི་གཞོན་ནུ།།
ཆ་སྒྲིག་མིག་དང་སེམས་པར་འཁྱིལ་བ་དེ་དགའ་བྱུང་།།
ཇ་ལན་མར་ཁུས་འཇལ་བའི་རིགས་བཟང་གི་བུ་ཁྱེད།།
ཉ་གང་ཟླ་བཞིན་བཟང་བའི་སྙིང་དབུས་ཀྱི་དགའ་ལོ།།
ཏ་ལེ་བཅོས་མིན་སེམས་པའི་མེ་ལོང་གི་དབུས་ན།།
ཐ་གེ་མ་ཡིན་ཡུན་རིང་བཞུགས་པ་ཡི་བདག་པོ།།
ད་དུང་མ་འགྱངས་བདག་གི་ཁོར་ཡུག་ཏུ་ཕེབས་དང་།།
ན་ཆུང་བུ་མོའི་མ་བཟོད་སྙིང་གཏམ་ལ་གསན་མཛོད།།
པ་ཊའི་དྲ་མིག་མཐོངས་ནས་ཁྱེད་ཞལ་དེ་མཇལ་བས།།
ཕ་མེས་ཚེ་རབས་བརྒྱུས་པའི་སྐུ་བསོད་དེ་རེད་བསམ།།
བ་ཚྭའི་ཆུ་བོ་ཧུབ་ཀྱིས་བཏུང་བ་དང་འདྲ་བའི།།
མ་ནས་ཁྱེད་ལ་བཅངས་པའི་བརྩེ་དུང་འདི་ཇེ་ཟབ།།
ཙ་རི་ཞེས་བྱ་མཛེས་པའི་ཞིང་ཁམས་ནས་ཡོང་བའི།།
ཚ་ཟེར་ཅན་བཞིན་སེམས་ཀྱི་གུར་ཁང་དུ་འཕྲོ་མཁན།།
ཛ་ལང་རྩུབ་སྤྱོད་བྲལ་བའི་ཡིད་འཕྲོག་གི་ཆོམ་རྐུན།།
ཝ་ལེར་དྲན་པའི་ཡོལ་བར་རི་མོ་བཞིན་འཆར་བྱུང་།།
ཞ་ར་དབང་སྐྱོན་གནསབབ་ཅི་འདྲ་ལ་ཐུག་ཀྱང་།།
ཟ་ཟོ་གཡོ་འཁྱོམ་མེད་པའི་བརྩེ་བ་འདི་འབུལ་ཆོག །
འ་འུར་གསོན་བྲལ་མི་བྱེད་དམ་བཅའ་ལ་བརྟེན་ནས།།
ཡ་ཁོག་སྙིང་གི་ཚི་ལུར་ཁྱེད་ཉིད་རང་བསྒོམས་ཡོད།།
ར་ལུག་འཚོ་བཞིན་འབྱམས་ཀླས་སྤང་ཐང་གི་སྟེང་ན།།
ལྭ་རིང་གྱོན་པའི་དགའ་བོའི་འཛུམ་ཆུང་དང་ལྷན་དུ།།
ཤ་ཚའི་སྙིང་གཏམ་དུས་ཀྱི་ཅང་ཤེས་ལ་བསྐུར་ཏེ།།
ས་གསུམ་ཡིད་སྨོན་འཆོར་སའི་ཚེ་གྲོགས་ཤིག་བྱ་འདོད།།
ཧ་ཅང་དྲན་པས་མནར་བའི་འཁོས་སྡུག་གི་བུ་མོས།།
ཨ་མཚར་རྩེད་མོ་མིན་པའི་ཀ་རྩོམ་འདི་བྲིས་མཚམས།།
ཧ་ཧ་དགོད་སྒྲ་ཡལ་བའི་ཁང་མིག་ཆུང་ངུ་ཡི་ནང་དུ།།
ཨ་ཙི་ཁྱེད་རང་མ་དྲན་ཉིན་མཚན་ཞིག་མི་འདུག །
རྩོམ་གསར། 10