གངས་ཆར། 2018-06-11
ཕ་ཡུལ་དང་ཕ་མ།
དྲན་པའི་ངོས་ཀྱི་ཡིག་འབྲུ་རྩ་ཆེན་བཞི་རེག་དུས།
སེམས་ཀྱི་རྩེ་མོ་ནམ་མཁའི་དབྱིངས་སུ་ཟུག
ལུས་ཀྱི་བ་སྤུས་སེམས་ཀྱི་དྲན་པ་དཀྲུགས།
ཡིད་ཀྱི་སྣང་ངོར་དགུན་གྱི་ཁ་བ་འབབ།
ཁ་བའི་མཛེས་པ་ནི།
ཕ་ཡུལ་གྱི་མཛེས་པ་དང་ཕ་མའི་འཛུམ་མདངས་ཡིན།
ཕ་ཡུལ་དང་ཕ་མ།
དགུན་གྱི་ཁ་བས་མ་ཟིན་པའི་ཡིག་འབྲུ་མཐུག་པོ།
དབྱར་གྱི་ཆར་པས་བཀྲུ་མི་ཐུབ་པའི་དྲེག་པ་མཐུག་པོ།
རྒྱུ་ནོར་ཁྲི་ཕྲག་གིས་བསླུ་མི་ཐུབ་པའི་སེམས་ཀྱི་གནས་མལ།
དྲན་ཤེས་སྟོང་གིས་སྐྱོང་བའི་དཔའ་དར་རིང་མོ།
ཕ་ཡུལ་དང་ཕ་མར་འཁྲེན་པ་ནི་བརྩེ་བ་མཐུག་པོ་ཞིག
ཕ་ཡུལ་དང་ཕ་མ།
བརྩེ་བ་རུམ་གང་ལས་འཕྲོས་པའི་འོད་སྣང་།
དྲན་པ་སེམས་གང་ལས་འཕྲོས་པའི་དུང་བ།
དྲན་གསོ་ཡིད་གང་ལས་འཕྲོས་པའི་སྣང་བ།
ཕ་ཡུལ་དུ་ཞེན་ཆགས་ཀྱི་དྲན་གསོ་དང་།
འཚར་ལོངས་ཀྱི་བརྒྱུད་རིམ་ཡོད།
འཚར་ལོངས་ཀྱི་བརྒྱུད་རིམ་ཁྲོད་དུ།
ཕ་མའི་རྔུལ་ཁྲག་གི་མཚོ་མོ་འཁྱིལ་ཡོད།
ཕ་ཡུལ་དང་ཕ་མ་དྲན་ཞོར་དུ།
བརྩེ་བ་དང་དྲིན་ལན་བསམ་བཞིན་ཡོད།
ཕ་ཡུལ་དང་ཕ་མ་དྲན་ཞོར་དུ།
རང་གི་རིགས་དང་རུས་པར་ལྟ་བཞིན་ཡོད།
ཕ་ཡུལ། ལུས་སེམས་ཀྱི་ངལ་གསོ་བའི་གྲུ་ཟུར་ཞིག
ཕ་ཡུལ། འཚོ་བའི་བདེ་སྡུག་གླེང་སའི་ཞིང་ཁམས་ཤིག།
རྩོམ་གསར། 10