ཞི་འཚོལ། 2018-06-08
ཞི་བདེའི་འཛུམ་ཟེར་ལ་འཚང་ཁ་འབེལ་དུས། །
དགའ་སྡུག་མེ་ལོང་དེ་རྡུལ་གྱིས་འདག་སོང་། །
སྲིད་པའི་ཐང་ཆེན་གྱི་འདུ་ར་ཞིག་ནས། །
དཔའ་བརྟུལ་དཔུང་སྡེ་ཞིག་རབ་ཏུ་བྱུང་ཡོད། །
གསུང་རབ་གླེགས་བམ་གྱི་བར་གསེང་རེ་ལ། །
འཁོར་བའི་འཆིང་རྒྱ་དེ་དགྲོལ་ཐབས་བསྟན་ཀྱང་། །
འདོད་ཡོན་པད་ཚལ་གྱི་བསླུ་བྲིད་སྐྱེན་པོས། །
འཁོར་བའི་ཐང་ཆེན་ནི་ཉུལ་དགོས་བྱུང་ཡོད། །
མུ་ཏིག་འོད་ཆེན་ཞིག་མཁའ་རུ་འཕགས་ནས། །
ཆུ་འཛིན་ངམ་ནག་དེ་མཐའ་ནས་བཀྱགས་ཀྱང་། །
འོད་ཀྱི་པད་མོ་ལ་དྲོད་ཐིག་མེད་ན། །
སེམས་ཀྱི་འདབ་བརྒྱ་དེ་འགྲོལ་ཐབས་མི་འདུག །
ལྗོན་བཟང་ཤིང་ལོ་ཡི་བསིལ་ཡབ་འོག་ཏུ། །
མི་ཚེའི་མདུན་མ་ལ་བསམ་གཞིག་བསྣུན་དུས། །
དྭངས་གསལ་སེམས་ཚོར་གྱི་ལྡེབས་རིས་ངོས་སུ། །
གཏན་གྱི་སྐྱབས་གནས་ལ་ཕྱག་རྒྱ་ཤོར་སོང་། །
གཉུག་མ་འོད་གསལ་གྱི་བདེན་དོན་ངོ་མ། །
མདོ་བརྒྱུད་བསྟན་བཅོས་ནས་ཡང་ཡང་བསྟན་ན། །
བཅོས་མིན་སེམས་གཤིས་ཀྱི་པད་མོའི་གསེང་དུ། །
ཁྱོད་ལ་དད་འདུན་ཞིག་འཇམ་རྒྱུ་མི་འདུག །
དབེན་གནས་ཞི་འཇམ་གྱི་ནགས་ཀློང་ཞིག་ཏུ། །
ཟག་མེད་ཏིང་འཛིན་གྱི་ཚོར་གཤིས་དྭངས་མ། །
མྱོང་འདོད་ཞེན་ཆགས་ཀྱི་སྣེ་རུ་འཁོར་རུང་། །
འཕྲལ་གྱི་བྱ་བ་ཞིག་བློས་གཏོང་མ་ཕོད། །
རྩོམ་གསར། 10