ཁ་བ་སྙན་གྲགས། 2018-04-19
བཤེས་གཉེན་ཁྱེད་ཉིད་རྟ་བདུན་དབང་པོ་བཞིན།།
ཤེས་རིག་ཡོན་ཏན་གཏིང་ཟབ་ཆུ་གཏེར་ལྟར།།
ཐུགས་རྒྱུད་ལྷག་བསམ་དཀར་བ་གངས་ཀྱི་རི།།
ཀུན་ལ་སྙོམས་པོར་འཇུག་པས་ཟས་གཙང་སྲས།།
བཤེས་གཉེན་གདམས་ངག་འོ་མའི་ཟས་བཅུད་ཀྱིས།།
གདུལ་བྱའི་བློ་གྲོས་ལུས་སྟོབས་གོ་རྟོགས་འཕེལ།།
བཤེས་གཉེན་ཁྱེད་ཀྱི་སློབ་གསོ་བཟང་པོ་ཡིས།།
ན་གཞོན་སློབ་མའི་མདུན་ལམ་ཡངས་པ་འདིས།།
བཤེས་གཉེན་ཁྱེད་ཀྱི་བཀའ་དྲིན་རི་རབ་བཞིན།།
རིགས་ལ་དུང་བ་བཤེས་གཉེན་ཁྱེད་ཀྱི་གཤིས།།
མི་རིགས་བཟོ་སྐྲུན་མཁན་པོ་ཁྱེད་ཀྱི་མཚན།།
མཚན་ཉིད་དོན་དང་ལྡན་པ་ཁྱེད་ཀྱི་གཤིས།།
རྨོངས་གཉིད་བག་འཁུམ་ལེ་ལོའི་མི་རིགས་འདིའི།།
སྲོག་རྩ་ཉག་གཅིག་སྐད་དང་ཡི་གེ་ཡི།།
གསོན་ཤུགས་རྒྱས་པའི་སྐད་ཡིག་ལང་ཚོའི་དཔལ།།
སྐལ་ལྡན་གདུལ་བྱའི་ཚོགས་ལ་བསྩལ་བ་འདི།།
རྟ་བདུན་དབང་བོའི་འོད་སྣང་འགྱེད་པ་བཞིན།།
བཤེས་གཉེན་ཁྱེད་ཀྱིས་ཤེས་བྱའི་རྨོངས་སེལ་ཞིང་།།
གདུལ་བྱའི་བློ་ཡི་མུན་པ་མཐའ་ནས་སངས།།
བཤེས་གཉེན་ཁྱེད་ཉིད་འཇམ་མགོན་བླ་མ་ཉིད།།
བཤེས་གཉེན་ཁྱེད་ཀྱི་ཤེས་ཡོན་ཟབ་ཅིང་རྔམ།།
ལྷག་བསམ་ཟོལ་མེད་རིས་མེད་ཀུན་ལ་བྱམས།།
མི་རིགས་སློབ་གསོའི་བདེ་སྡུག་ཐུགས་སུ་ཉར།།
བཤེས་གཉེན་ཁྱེད་ཉིད་མི་ཕམ་མགོན་དང་ཉིད།།
བཤེས་གཉེན་ཁྱེད་སྐུ་རི་རྒྱལ་ལྷུན་པོ་བཞིན།།
བཤེས་གཉེན་ཁྱེད་ངག་ཁུ་བྱུག་གསུང་དབྱངས་རེད།།
བཤེས་གཉེན་ཁྱེད་ཐུགས་རིན་ཆེན་ནོར་བུའི་མཛོད།།
བཤེས་གཉེན་ཁྱེད་ཉིད་བསམ་འཕེལ་ནོར་དང་མཉམ།།
འཆད་ལ་མཁས་པས་འཇམ་མགོན་ས་པཎ་དང་།།
རྩོད་ལ་བྱང་བས་རྗེ་བཙུན་ཙོང་ཁ་མཆོག །
རྩོམ་ལ་ཐོགས་མེད་ཙན་དྲ་གོ་མིའི་དཔལ།།
འདི་དག་དང་ནི་བཤེས་གཉེན་དཔལ་ཡོན་མཉམ།།
བཤེས་གཉེན་ཁྱེད་ཉིད་སློབ་མའི་སྐྱབས་མགོན་ཡིན།།
ཨ་འབུམ་ཐོགས་མེད་གསུང་གི་བདུད་རྩི་ཡིས།།
ཡིད་ཀྱི་རྨོངས་སེལ་མི་ཚེའི་ཐབས་ཀྱི་མཆོག །
མ་ལུས་ཤེས་བྱ་ཀུན་ལ་འཇིགས་བྲལ་གྱུར།།
ཤེས་ཡོན་མ་ལུས་གཅིག་ཏུ་བསྡུས་པ་བཞིན།།
ལྔ་རིག་གླིང་ག་འདི་ན་བཤེས་གཉེན་ཞིག །
ཨ་འབུམ་བློ་བཟང་དམ་ཆོས་ཞེས་སུ་གྲགས།
རྩོམ་གསར། 10