མེ་ཡི་ལྕེ་ལྡན། 2018-04-12
འཚོ་བའི་ལས་རླུང་གིས་རྒྱབ་ནས་དེད་ཅིང་། །
དྲན་པ་དགུ་འགྱུར་གྱིས་སྤྲིན་དང་འཐབ་དུས། །
དག་པའི་གནས་ལུགས་ཀྱི་ནས་སོན་རྡོག་པོ། །
འཚོ་བའི་གནས་མལ་ནས་ཉུལ་དགོས་བྱུང་སོང་། །
སྟོང་དང་རྟེན་འབྲེལ་གྱི་གནས་ལུགས་ཟབ་མོ། །
སྟོན་པ་སངས་རྒྱས་ཀྱི་ཞལ་ནས་གསུངས་ཀྱང་། །
དྲན་པ་ལང་ཤོར་གྱི་ས་ཞིང་རྒོད་པོར། །
རྟེན་འབྱུང་ས་བོན་གྱི་ལྡོག་ཟླ་ལང་ཡོང་། །
སྣང་བ་བན་བུན་གྱི་སྤྲིན་པའི་གསེབ་ན། །
གཉུག་སེམས་དག་པ་ཡི་ལུགས་ཤིག་ཡོད་སྐད། །
འདོད་ཡོན་མེ་ཏོག་གི་མཛེས་ཉམས་བཀྲ་དུས། །
རྒྱུ་འབྲས་དྲང་སྙོམས་ཀྱི་ས་བོན་བོར་འགྲོ། །
མཐའ་བྲལ་གནས་ལུགས་དེ་སེམས་ལ་བཞག་ནས། །
དབུགས་ལྡན་འགྲོ་བ་ཀུན་མ་རུ་བསྒོམས་ཀྱང་། །
འཚོ་བའི་སྲང་མདའ་ལ་མཐོ་དམའ་ཤོར་ཚེ། །
དགྲ་གཉེན་དབྱེ་བ་ཡི་ཆར་རླུང་འཚུབ་འོང་། །
ཆོས་དྲེད་མཁན་པོ་དག་འུར་ལང་མ་མཛོད། །
འཁོར་བའི་ཐང་ཆེན་ལ་བདེ་བར་བཞུགས་དང་། །
ཚུར་མཐོང་ས་བོན་གྱི་འབྲས་བུ་དག་ལས། །
རྒྱུ་འབྲས་དྲང་སྙོམས་ཀྱི་བདུད་བརྩི་བཞེས་ཆོག །
རྩོམ་གསར། 10