བཙན། 2018-04-12
བདུད་རྩིའི་སྦྲང་ཆར་འབབ་པའི་ཞིམ་ཟས། །
འབད་བརྩོན་སྙིང་ཁྲག་དམར་པོས་བཏབ་པའི། །
འབྲས་མཆོག་ཡིད་བཞིན་བཅུད་ཀྱི་བང་མཛོད། །
དོན་མེད་ཆུད་ཟོས་ཤོར་བའི་སྐྱོ་སྣང་། །
འབྲས་མཆོག་ནས་བཟང་སྨིན་པའི་དུས་དེར། །
བཀྲེས་སྐོམ་སྡུག་བསྔལ་སེལ་བའི་ནོར་མཆོག །
ཞིམ་ཟས་ཡིད་བཞིན་སྙིང་གི་བང་མཛོད། །
དོན་མེད་ཆུད་ཟོས་ཤོར་བའི་སྐྱོ་སྣང་། །
ཤ་ཁྲག་ཕུང་པོས་གྲུབ་པའི་ཟས་མཆོག །
རྔུལ་ཆུ་ཟིལ་བས་མཛེས་པའི་ཞིང་ས། །
བསོད་ནམས་ལས་ཀྱིས་གནང་བའི་དངོས་གྲུབ། །
དོན་མེད་ཆུད་ཟོས་ཤོར་བའི་སྐྱོ་སྣང་། །
དཀའ་སྡུག་རྔུལ་ཆུས་གྲུབ་པའི་ནས་མཆོག །
དབུལ་པོར་བདེ་སྐྱེད་སྩོལ་བའི་ཟས་མཆོག །
འགྲོ་ཀུན་ཡིན་བཞིན་སྙིང་གི་བང་མཛོད། །
དོན་མེད་ཆུད་ཟོས་ཤོར་བའི་སྐྱོ་སྣང་། །
རྩོམ་གསར། 10