སེ་མཚོ་སྐྱེམ། 2018-04-12
མི་ཚེའི་ལས་རླུང་གད་གྲོང་སྤྱིལ་བུར་བསྟིམ་པའི། །
ཁྱི་དང་སྤྲང་པོའི་འཚོ་བ་ངན་ངོན་ཞིག་གིས། །
འཐིང་སླད་སུན་འབྱིན་བྲེལ་བའི་ཡིད་ཀྱི་ཁྱེའུ། །
འདས་སོང་ལོ་ཟླའི་ཕག་ནས་རྒྱང་ལ་བྱོལ་འདོད། །
ཨ་ཐང་ལན་གཅིག་ཆད་པ་ཉུང་ངུ་མིན་པའི། །
མི་ཚེ་སྐྱོ་བས་འཁྱེར་བའི་ལོ་ཟླའི་འོག་འགྱུ། །
བརླང་ཚིག་དུག་ལོ་སྲུལ་བའི་མཁན་གྲོང་རེ་ན། །
ཡུས་སེམས་གཉོམ་པོ་མྱ་ངམ་ཐང་ན་ཉུལ་འོང་། །
སྤྲང་པོའི་སེམས་ན་གཟིམས་པའི་འོད་ཀྱི་ཟེགས་མ། །
དུས་གསུམ་རེ་བས་སྲུང་བའི་ས་བོན་གྲུང་པོ། །
ཐོབ་ཤོར་མི་ཚོགས་གསེབ་ནས་ཁབ་བཞིན་བོར་ཚེ། །
འདུན་པའི་སྡོང་ལོ་དེ་ཡང་ཕང་བར་ཟགས་སོང་། །
ཡིད་ཀྱི་བེར་ཀ་སྐྱ་རེངས་ངོགས་ན་བཅོལ་ཞིང་། །
མཛའ་བའི་དྲོད་ཁོལ་མུན་པའི་མདངས་ལ་འཆེལ་བའི།།
ཁྱི་ཡི་བརྟུལ་ཞུགས་བླངས་པའི་ལྡོམ་པོ་གང་དེས། །
མཆི་མའི་ས་བོན་ནམ་མཁའི་རླུང་ལ་བསྲིངས་འདུག །
རེ་བའི་སྙིམ་སྦྱོར་མང་པོ་འཚང་ག་ཤིག་ཤིག །
ཐལ་མདོག་ས་བོན་འབྲུ་རྡོག་ཇེ་ཉུང་ཇེ་ཉུང་། །
ང་དང་ཁྱོད་ལ་རེ་བའི་སྤར་མོ་མེད་ཚེ། །
ལྗང་མྱུག་གསར་པ་སྦྲུམ་པའི་ཐ་ཚིག་ཡིན་འགྲོ། །
ངུ་ངག་སེམས་སུ་ལྷུང་བའི་གཏོལ་མེད་ལྡོམ་པོ། །
རྨི་ལམ་ཡན་ཡུན་སུལ་ན་བྱ་བཞིན་འཕུར་ཞིང་། །
མི་ཚེ་ཞིང་ས་གཤིན་པོ་ཐན་པས་གཟས་ཚེ། །
ཡང་མཐའི་རི་གཤམ་ཞིག་ལ་གོམ་པ་བརྟོལ་ངེས། །
རྩོམ་གསར། 10