ཉི་ཚེ། 2018-03-19
ནོར་འཛིན་བུ་མོས་གོས་ལྗང་ལུས་སུ་མནབས།།
གཙང་ཆུབ་བསིལ་མས་སྙན་པའི་མགུར་དབྱངས་འཐེན།།
འདབ་ཆགས་བྱ་ཡིས་ལྗོན་པའི་ཡལ་ག་བསླས།།
རང་བྱུང་སྐྱེད་མོའི་ཚལ་ལ་ལྟད་མོ་ཡག།
ཕྱུགས་རྫིའི་གདོང་གི་རེ་བའི་ཁ་དོག་དང་།།
སྦྲ་ནག་ཐང་ལ་བྲན་པའི་ཚུལ་འདི་མཛེས།།
ནོར་ལུག་སྤང་ལ་བཀྲམ་པའི་ཉམས་རེ་སྐྱིད།།
འབྲོག་ཁྱིམ་སྦྲ་ནག་ཅན་ཚང་ནོར་གྱིས་ཕྱུག།
འབྲི་མོའི་ངུར་དབྱངས་ལྷས་རའི་སྤང་ནས་གྱེར།།
བེའུའི་སྣང་བ་ཚིག་གི་མེ་ཏོག་ཡིན།།
འབྲི་མོ་རྡང་ལ་འདོགས་པའི་གཞོན་ནུ་མ།།
དཀར་གསུམ་མཆོད་ཁ་ལེན་པའི་དུས་ལ་བྲེལ།།
བར་སྣང་འཇའ་འོད་འཐེན་པའི་བང་རིམ་ན།།
སྤྲིན་གྱི་མེ་ཏོག་འཐོར་བའི་སྐལ་བ་ལ།།
རྩྭ་དང་རྩི་ཤིང་སྐྱེ་ཡག་འཁྲུངས་ཡག་ཡིན།།
དཔྱིད་ཀྱི་དུས་འདི་འདོད་འཇོའི་བ་མོ་བཞིན།།
རྩོམ་གསར། 10