ཚེ་རིང་ལྷ་མཚོ། 2018-03-05
ལས་དབང་གི་དར་ལྕོག་སྔོན་མོས།
གངས་རི་དང་ལྟེ་ཁྲག་སྦྲེལ་བའི་སྟོན་ལོ་སེར་པོ་འདི་དག་གིས།
མག་མོག་གི་རི་ཁུལ་དོག་པོ་ནས།
ཡིད་ཆེས་དང་ང་རྒྱལ་བསྣམས་ཀྱིན།
འཚོ་བའི་སྔས་མགོ་ན་རང་དབང་གིས་རྡོག་པ་བསྲིངས་སྐབས།
དམིགས་འདུན་གྱི་དར་ཐག་རིང་མོ་སྐྱ་རེངས་དང་སྦྲེལ།
དེའི་ཕྱིར།
སྟོན་ལོ་སེར་པོར།
དབྱར་གྱི་མགྲོན་པོ་སྐྱེལ་བའི་འཛུམ་མདངས་དང་།
དགུན་གྱི་བསླུ་བྲིད་བསུ་བའི་རྣམ་དཔྱོད་ལྡན།
ནོར་འཛིན་སྒེག་མོར་འཁྱུད་པའི་ཆོད་སེམས་དང་།
རི་བོར་མཛེས་རྒྱན་སྣོན་པའི་མཐུ་སྟོབས་མངའ།
ད་དུང་།
སྟོན་ལོ་སེར་པོ།
རྫ་ཆབ་ཟིལ་མའི་གྲུ་ལ་བཞོན་ནས་དུས་རབས་གསར་པའི་དགའ་ཚལ་དུ་བསྐྱོད།
བསིལ་རླུང་འཇམ་པོ་གྲོགས་སུ་སྦྲོན་ནས་སྤྱི་ཚོགས་དམར་པོའི་ཁྲོམ་ར་བཤགས།
རིགས་ལ་ཞེན་པའི་མཛའ་མཐུན་འདྲུད་བཞིན་ཀ་ཁའི་སྙན་དབྱངས་གོ་ལར་གྱེར།
ལོས་བདེན།
སྟོན་ལོ་སེར་པོའི་ཡིད་གཞུང་ན།
གངས་རི་དང་དར་ལྕོག་ནི་མཛེས་ཤིང་སྡུག
སྦྲ་ནག་དང་རྩྭ་ཐང་ནི་རྔམ་ཞིང་བརྗིད།
མར་ཕྱུར་དང་འོ་མ་ནི་ཞིམ་ཞིང་མངར།
མདོར་ན།
སྐྱིད་སྡུག་རེས་མོས་ཀྱི་ལམ་རྒྱགས་དུ་མ་རུམ་དུ་བསགས་པའི་སྟོན་ལོ་སེར་པོ་ཚོ།
ཁ་བ་རི་བོའི་སེམས་ཁམས་ན་ནམ་ཡང་ལྷབ་ལྷུབ་ངང་འཕུར།
རྩོམ་གསར། 10