གངས་ཆར། 2017-12-12
དྲན་པའི་ངོས་སུ་རླུང་དམར་ལྡང་དུས་སུ། །
མིག་ཆུ་དམར་པོ་བྱེ་ཐང་སྒང་དུ་ལྷུངས། །
སྐད་ཆ་སྙན་མོས་སེམས་པ་རླུང་ལ་བསྐུར། །
དྲན་པ་གསལ་པོ་མུན་པ་ནག་པོར་དབང་། །
ཁ་སང་བརྩེ་བ་དགོད་སྒྲའི་འཛུམ་མདངས་ཁྲོད། །
དེ་རིང་བརྩེ་བ་གཡང་ཟེའི་ཕྱོགས་སུ་སླེབས། །
རྡོ་བ་ཚ་པོའི་སྟེང་གི་དྲན་པ་འཇིགས། །
བརྩེ་བ་ཟབ་མོ་མི་རྟག་ནག་པོར་དབང་། །
རྐང་ལམ་ཕྲ་མོ་རིམ་བཞིན་གཞུང་ལམ་འགྱུར། །
གཞུང་ལམ་ཆེ་ཡང་ངལ་གསོའི་གནས་ཤིག་དཀོན། །
ཕྱི་ཡིས་རྣམ་པས་ནང་སེམས་བཀབ་དུས་སུ། །
སེམས་ཀྱི་བདེ་བ་མུན་པ་ནག་པོར་དབང་། །
རྫིང་ཆུ་ལྟར་དུ་ལྷིང་འཇགས་ནམ་རྒྱུན་གཤིས། །
མེ་སྟག་བཞིན་དུ་དྲོད་ཀྱིས་སེམས་པ་དྲོས། །
ཆུ་དང་མེ་གཉིས་མཉམ་དུ་གནས་སྐབས་སུ། །
མི་གཤིས་འཇམ་པོ་འགྱུར་ལྡོག་ནག་པོར་དབང་། །
སྐབས་རེ་སེམས་ཀྱི་ཚོར་བ་ཞན་དྲགས་པས། །
ཧད་ཀྱིས་དྲན་པ་བརླགས་ནས་སེམས་པ་སྐྲག །
འཇིག་རྟེན་འཚོ་བ་བདེ་སྡུག་མཉམ་བསྲེས་ལས། །
སྡུག་བསྔལ་ཤུགས་ཀྱིས་བདེ་བ་ནག་པོར་དབང་། །
ནམ་མཁའ་སྔོན་པོ་མིག་གིས་བལྟ་ཤེད་ཆེ། །
ས་གཞི་ཡངས་པོ་སེམས་ཀྱིས་རྒྱང་བལྟ་བྱེད། །
མི་ནི་ཇི་ལྟར་གླེང་ཡང་གནམ་སའི་བར། །
སེམས་ཀྱི་བསམ་པ་ཕ་མཐའ་ནག་པོར་དབང་། །
ཁ་ཤས་མིག་ཆུས་ངོ་གདོང་བཀྲུས་ནས་འདུག །
ཁ་ཤས་ཁྲེལ་རྒོད་ཁྲོད་ནས་ལུས་པོ་རྒས། །
འཇིག་རྟེན་འགྲོ་མིའི་ལས་དབང་མི་གཅིག་ཀྱང་། །
སེམས་རྒྱུད་ནག་པོར་དབང་དུས་ཅི་ཞིག་ཡལ། །
རྩོམ་གསར། 10