མི་ཚོགས་རྒྱ་མཚོའི་དཀྱིལ་ནས། །

མཛའ་མོའི་མིག་ཞགས་གཅིག་གིས། །

གཞོན་ནུ་ང་ཡི་སེམས་པ། །

དབང་མེད་བདག་ཏུ་བཟུང་སོང་། །

བྲག་དཀར་ཀླད་ཀྱི་མེ་ཏོག །

བསྙབ་ན་ལག་པས་མི་ལོན། །

བསྐྱུར་ན་སེམས་ཀྱིས་མི་བཟོད། །

གང་འདྲ་བྱས་ན་ལེགས་སམ། །

ལ་ཁའི་དར་ལྕོག་ལྷབ་ལྷུབ། །

གྲང་རླུང་གཡུགས་པའི་རྟགས་རེད། །

བུ་མོའི་སྒེག་འགྲོས་ལྡེམ་ལྡེམ། །

གནས་བདག་མེད་པའི་རྟགས་རེད། །

ཀ་བ་གདུང་མ་བཞིན་དུ། །

ཁ་ཁོག་དྲང་མོ་ཡིན་ན། །

ག་བུར་ལྟ་བུའི་སེམས་པ། །

ང་ཡི་བྱམས་པར་ཕུལ་ཆོག །

ཅ་ཅོའི་སྨྲ་བ་ཉུང་ཞིང་། །

ཆ་ལུགས་ཞི་ཞིང་དུལ་བའི། །

ཇ་མདོག་ལྭ་བ་གྱོ ན་པའི། །

ཉ་ཆུང་ཡིད་ལ་བབས་སོང་། །

སིལ་སྡོང་རིང་ནས་ཅི་བྱེད། །

སིལ་འབྲས་སྨིན་པ་ལེགས་དགོས། །

བུ་མོ་མཛེས་ནས་གང་ཡོང་། །

གཤིས་ཀ་བལ་ལས་འཇམ་དགོས། །

ང་རང་ཁྱེད་ལ་དགའ་དགའ། །

རིག་པའི་གནས་ལ་དགའ་ན། །

ཤེས་བྱ་རིག་པའི་གནས་ལ། །

སྔར་ནས་བྱང་ཆ་ལྡན་སོང་། །

དགུང་ནས་གཡུ་འབྲུག་གྲགས་པས། །

རྨ་བྱས་དགའ་སྤྲོ་འཁྲབ་སོང་། །

བུ་མོས་མཛའ་གཞས་བཏང་བས། །

བུ་ཆུང་དགའ་བས་མྱོས་སོང་། །

རྨོད་མཛོ་རོག་པོ་འགྲོགས་འགྲོགས། །

ངེད་གཉིས་འགྲོགས་རྒྱུ་བྱུང་ན། །

གཉའ་ཤིང་ཁུར་དགོས་བྱུང་རུང་། །

འགྱོད་པ་སྐྱེས་རྒྱུ་མི་འདུག །

ཁྱེད་ཀྱི་གཞས་ལ་ཉན་ཉན། །

དམ་པའི་ཆོས་ལ་ཉན་ན། །

བདེ་ལྡན་ཞིང་དུ་འགྲོ་བར། །

ལམ་བྲོ་སྔར་ནས་བསྒྲིགས་ཟིན། །

ཆུ་མོ་ཐུར་ལ་བཞུར་བ། །

བཀག་ཀྱང་འགག་ཐབས་མི་འདུག །

སེམས་པ་བྱམས་པར་ཕྱོགས་པ། །

ཕ་མས་བཀག་ཀྱང་མི་ཁོག །

ཆར་པ་འབབ་ཐེངས་ཤིག་གིས། །

མེ་ཏོག་མགོ་བོ་འབུས་སོང་། །

བུ་མོའི་འཕྲིན་པ་གཅིག་གིས། །

བུ་ཆུང་སྤྲོ་བ་འཕེལ་སོང་། །

ཁྱེད་ནི་སྤང་རྒྱན་པད་མ། །

ང་ནི་སེར་ཆེན་མེ་ཏོག །

ཚེ་སྔོན་ལས་འཕྲོ་ཞིག་གིས།།

སྤང་ལྗོངས་གཅིག་ལ་འཛོམས་སོང་། །

རོང་གི་ཡོས་དཀར་རྩམ་པ། །

འབྲོག་གི་འབྲི་མར་སེར་པོ། །

འབྱུང་ཡུལ་ཁ་ཁ་ཡིན་རུང་། །

དཀར་ཡོལ་ནང་ནས་མཐུན་སོང་། །

ངེད་གཉིས་ཆུ་ཕྲན་ཆུང་ཆུང་། །

ཆུ་ཕྲན་ཆུ་མགོ་ཁ་ཁ། །

ཟམ་མིག་འོག་ནས་འཕྲད་སོང་། །

རྒྱ་མཚོ་གཅིག་ནང་འཛོམས་སོང་། །

ཉ་མོ་ཆུ་ལ་བརྩེ་བ། །

ཆུ་མོ་ཉ་མོར་དུངས་པ། །

ཉ་མོ་ཆུ་མོ་གཉིས་ཀ །

རྒྱ་མཚོའི་དཀྱིལ་ནས་མཐུན་སོང་། །

སྟོད་ཀྱི་གངས་དཀར་རི་བོ། །

མཁའ་ཡི་ཉི་མས་མི་ཞུ། །

ང་དང་བྱམས་པའི་བརྩེ་དུངས། །

ཕ་མས་བཀག་ཀྱང་མི་ཁོག །

སྡེ་ཆེན་དཀྱིལ་གྱི་བྱམས་པར། །

འགྲོགས་པར་ཕ་མ་མི་འཐད། །

བསྐྱུར་ན་སེམས་ཀྱི་མི་ནུས། །

གང་འདྲ་བྱས་ན་ལེགས་སམ། །

རོ་མངར་སྦི་རག་དྭངས་མོ། །

འཐུང་འདོད་སྲེད་པ་སྐྱེས་ནས། །

གཅིག་བཞེས་གཉིས་དག་གནང་བས། །

མགོ་བོ་ཡོམ་ཡོམ་འདར་བྱུང་། །

ཁྱེད་ནི་གཡུ་ཆུང་དྲུག་དཀར། །

ང་ནི་དམར་ཆུང་བྱུ་རུ། །

ཚེ་སྔོན་ལས་དབང་ཞིག་གིས། །

སྐུད་པ་གཅིག་ལ་བརྒྱུས་སོང་། །

ཆུང་འདྲིས་བྱམས་པས་བསྐུར་བའི། །

ཤོག་དཀར་ཁུག་གི་སྙིང་གཏམ། །

ནམ་ཡང་སེམས་ཀྱི་གཏིང་ནས། །

བརྗེད་རྒྱུ་ཡོད་པ་མ་རེད། །

སྤང་རི་བྲག་རིའི་བར་ན། །

ཚེར་སྡོང་མགོ་ལྕོག་ལྡེམ་ལྡེམ། །

ང་དང་བྱམས་པའི་བར་ལ། །

མི་ངན་ཝ་མོ་འདུར་འདུར། །

དཀར་ཡོལ་གངས་དཀར་ཞིག་ལ། །

རི་མོ་རྨ་འབྲུག་ཕབས་ཡོད། །

དཀར་ཡོལ་ཆག་ན་མ་གཏོགས། །

རི་མོ་གསུབ་རྒྱུ་མི་འདུག །

ཁྱོད་ནི་དཀར་འཇམ་ཤོག་བུ། །

ང་ནི་སྤུས་ལེགས་སྨྱུ་གུ། །

སྨྱུ་ཤོག་མཉམ་དུ་སྦྲེལ་ནས། །

འགྱུར་མེད་གཏན་ཚིག་བྲིས་ཆོག །

ཚེ་འདིར་འབྲི་སྐལ་མེད་རུང་། །

སྐྱེ་བ་གཞུག་མ་ཞིག་ལ། །

ཤོག་དཀར་གཅིག་གི་སྟེང་ན། །

འབྲི་བའི་སྨོན་ལམ་བཏབ་ཆོག །

སེམས་དང་སེམས་པ་སྦྲེལ་ན། །

ཕ་མས་བཀའ་དབང་མ་དགོས། །

རླུང་དང་བསེར་བུ་ཡིན་རུང་། །

ཁ་ཁར་གཏོང་ཐབས་དཀའ་འོ། །