འབུ་ཚེ་རིང་། 2017-11-21
སེམས་པ་ནང་ལ་བཀུག་ནས།།
དྲན་པ་འགོག་ཐབས་བྱས་ཀྱང་།།
ཁྱེད་རང་ཁ་འབྲས་གཙང་བས།།
བྱོལ་ཐབས་ཡོད་ས་མ་རེད།།
བསིལ་འཇམ་རླུང་གིས་སྤུར་བའི།།
སྤྲིན་པ་ཕྱོགས་བཅུར་འཐོར་སོང་།།
ང་རང་ཁེར་རྐྱང་ཡིན་པས།།
སྐྱོ་རོགས་བྱས་པ་ཡིན་ནམ།།
ནམ་མཁའི་ཟླ་བ་མཛེས་པས།།
ཁྱེད་ཀྱི་ཡིད་སེམས་བསླུས་ཡོད།།
ང་ཡང་རི་རྩེར་བུད་དེ།།
སྐར་ཚོགས་བརྩི་བར་མོས་སོང་།།
ས་མཐའི་ཁ་དོག་སྐྱོ་ལ།།
དབེན་པའི་གླུ་གཞས་སྨྲེང་བས།།
ང་རང་ཚོར་བས་གདོངས་ཏེ།།
ལུས་ཀྱི་ཤ་ཡང་སྐམ་སོང་།།
རི་བོར་འཛད་མཐའ་བྲལ་བས།།
ཆུ་ཀློང་དཀའ་ངལ་ཆེ་སོང་།
གྱེས་པའི་ལོ་ཟླ་རིང་བས།།
མི་ཚེའི་ཕྱེད་ཀ་ཟིན་འདུག།
ས་གཞིའི་ཁ་དོ་འགྱུར་བ།།
བདག་གིས་བརྩི་བར་མི་ཕོད།།
ལོ་ཟླ་བརྒལ་བ་མང་བས།།
སྐྲ་ལོ་དཀར་བར་དོགས་འདུག།
ཁྱེད་རང་དྲན་པས་མི་ཕན།།
འཕྲད་ཀྱང་བྱེད་རྒྱུ་མེད་འདྲ།།
སེམས་སུ་ཟིག་པའི་གྲི་ཆུང་།།
ནམ་ཞིག་ཡལ་བར་སྲིད་དམ།།
ཁ་བས་ཡིད་སེམས་གཙེས་བྱུང་།།
བྱེའུས་སྐྱོ་གཞས་བཏང་བས།།
ལྗོན་པའི་ལོ་འདབས་དག་ཀྱང་།།
གཙང་པོ་བརྒལ་ཏེ་ཕེབས་སོང་།།
རྩོམ་གསར། 10