གནམ་སའི་བར་གྱི་ངོ་མཚར་གནས་མཆོག་དང་། །

གངས་རིའི་ལྗོངས་སུ་འཚོ་བའི་མི་རིགས་ཤིག །

གངས་རིའི་རྩེ་མོ་ནམ་མཁར་བསྙེགས་འདྲ་བ། །

ཁ་བ་གངས་རི་ཕ་ཡུལ་གངས་ཅན་རྒྱན། །

སྟོན་པ་ཐུགས་རྗེ་ཅན་གྱི་བྱིན་བརླབས་ལས། །

ནང་པ་སངས་རྒྱས་འཚེ་མེད་ཞི་བདེའི་ལམ། །

འགྲོ་དྲུག་མ་རུ་འཛིན་པའི་བཏང་སྙོམས་བློས། །

གངས་ཅན་ལྗོངས་འདིར་སྙིང་རྗེའི་མེ་ཏོག་བཞད། །

ལས་འབྲས་སེམས་སུ་འཛིན་པ་བདེན་པའི་བློ། །

བདེན་པའི་བློ་ལ་ཚད་མའི་རིན་ཐང་ལྡན། །

སྐད་ཅིག་འཇིགས་པའི་འགྲོ་བ་མིའི་རིགས་ལ། །

ནང་བསྟན་རིག་གནས་སེམས་ཀྱི་སྙིང་བཅུད་ཡིན། །

གངས་ཀྱི་རི་བོས་བསྐོར་བའི་ཕ་ཡུལ་དུ། །

གངས་ལ་ཆགས་པའི་བརྩེ་བ་དྲོན་མོ་ཡོད། །

བརྩེ་བ་དྲོན་མོས་བློ་གཏད་གངས་རིར་བཅོལ། །

ཕ་ཡུལ་གངས་ལྗོངས་མཚར་སྡུག་གོ་ལའི་རྒྱན། །

མཁས་རླུང་གཙང་ལ་གངས་ཆུ་ལྷག་པར་དྭངས། །

རང་བྱུང་ལྷུན་གྱིས་འགྲུབ་པའི་ཁོར་ཡུག་མཛེས། །

ལྷག་བསམ་གངས་ལྟར་དཀར་བའི་མི་བུའི་ཚོགས། །

གངས་རི་སེམས་སུ་དྲན་བཞིན་གངས་ལྗོངས་དྲན། །

དད་པའི་བློ་ཡིས་རང་སེམས་རང་གིས་བཅུན། །

སྙིང་རྗེའི་བློ་ཡིས་ཡོད་ཚད་བྱམས་ཀྱིས་སྐྱོང་། །

གངས་ཅན་ལྗོངས་ཀྱི་མི་བུའི་ལུས་སེམས་གཉིས། །

དྭངས་གཙང་ཡར་ཆབ་གཙང་པོའི་རྒྱུན་དང་རྒྱུགས། །

གངས་ཅན་མཁས་པའི་གཙུག་རྒྱན་ཙོང་ཁ་མཆོག །

རིག་པའི་སེང་གེ་དགེ་འདུན་ཆོས་འཕེལ་མཆོག །

རང་མོས་སྙན་ངག་སྲོལ་འབྱེད་རང་གྲོལ་སོགས། །

གངས་ཅན་རིག་པའི་སྐར་ཆེན་མང་ནང་མང་། །