སྒོ་སྤྲེའུ་ངེས་དོན། 2017-10-17
སྐད་གསུམ་ལོ་ཙཱའི་སྨྲ་བརྗོད་གཞལ་མཐའ་བྲལ།།
དུས་རབས་དཔའ་བོ་དམ་པའི་མཚན་ཉིད་ལྡན།།
དྲིན་ཆེན་ཨ་ནུ་ཐོན་མའི་རྗེས་གྲུབ་པའི།།
མཚན་ལྡན་སློབ་དཔོན་དམ་པའི་དྲུང་དུ་འདུད།།
དམ་པའི་གཞུང་ལུགས་འཆད་པའི་ལེགས་ཚོགས་དཔོན།།
གནས་མང་ཤེས་བྱའི་གཏེར་སྣོད་མངའ་བདག་རྒྱལ།།
སྣེ་ཤན་ཕྱོགས་སྟོན་གསལ་བའི་སྒྲོན་མེ་མཆོག།
རིན་ཆེན་དགོས་འདོད་འབྱུང་གཞིའི་བཤེས་གཉེན་བསྔགས།།
རྨོངས་པའི་མུན་པ་འཇོམས་པའི་བློ་ཡི་རྩེར།།
ཐབས་མཁས་ཤེས་རབ་རལ་གྲིས་གཅོད་མཁས་ཤིང་།།
ལྷག་བསམ་འོ་མའི་རྒྱ་མཚོས་སྤུད་ལེགས་པའི།།
དཔྱོད་ལྡན་དགེ་བའི་བཤེས་གཉེན་གུས་པས་འཚལ།།
རིག་ལྔའི་འཆད་རྩོད་རྩོམ་པའི་ལེགས་ཚོགས་གཞུང་།།
སྦྲང་ཆར་ཟམ་ཟིམ་འཇོ་བར་ཡང་དག་གསལ།།
ལེགས་ཉེས་བླང་དོར་འབྱེད་པའི་མུ་མེད་མཆོག།
རིག་པའི་དབང་གིས་ཕྱུག་པའི་སློབ་དཔོན་ཁྱེད།།
བསླབ་གསུམ་ཡོན་ཏན་ཟབ་མོ་མཁའ་དང་རྩེན།།
ཐུགས་བསྐྱེད་ཀློང་རྒྱ་ཡངས་མོས་གཞན་ཡིད་འགུགས།།
ཀུན་མཁྱེན་མི་ཕམ་མཆོག་གི་མཁྱེན་པའི་ཟླ།།
བརྗེད་མེད་བཤེས་གཉེན་དམ་པ་ཁྱེད་མིན་སུ།།
རིན་ཆེན་བདུད་རྩིའི་བསླབ་བྱ་རིན་བྲལ་འཆད།།
དངོས་གྲུབ་བསྟན་བཅོས་ངག་གི་གར་རྩེན་པའི།།
ལང་ཚོ་གསར་བའི་ཕུགས་འདུན་དགེ་ལེགས་སྩོལ།།
བཀའ་དྲིན་མཚུངས་མེད་དགེ་རྒན་དམ་པ་ལགས།།
དཔལ་ལྡན་ཤེས་རིག་ནོར་བུའི་བསྙེན་རྫོགས་ཤིང་།།
བྱམས་བརྩེའི་ངང་རྒྱུད་འཇམ་པོ་གཤིས་སུ་འཛོམས།།
སྐྱེ་རྒུའི་རྨོངས་མུན་སེལ་བའི་སྐྱབས་གནས་མཆོག།
སྙིང་རྗེའི་བདག་ཉིད་ཆེན་པོ་སློབ་དཔོན་ཁྱེད།།
གཙུག་ལག་རིན་ཆེན་འདོད་དགུ་སྤྱི་བོར་བཀུར།།
ཆོས་སྲིད་གསེར་གྱི་ཉི་གཞོན་ལུགས་ལྟར་སྲུང་།།
སྐྱབས་གནས་དཀོན་མཆོག་གསུམ་པོ་མི་བསླུ་བའི།།
ཚུལ་ལྡན་སློབ་དཔོན་དམ་པ་སླར་ཡང་བསྔགས།།
རྩོམ་གསར། 10