ཁྲ་འཁྱིལ་མ་གཙུག་ལག་ཁང་ནི་སྟག་ལུང་སངས་རྒྱས་དབོན་གྲགས་པ་དཔལ་གྱིས་དགུང་ལོ་ཉི་ཤུ་རྩ་བདུན་པ་རབ་བྱུང་ལྔ་པའི་མེ་གླང（1277）ལོར་དབྱི་ཤོད་རི་བོ་ཆེར་  ཕྱག་བཏབ་པའི་དགོན་པའི་མིང་སྟེ（དེང་སང་བོད་རང་སྐྱོང་ལྗོངས་ཀྱི་ཆབ་མདོ་གྲོང་ཁྱེར་ཁམས་རི་བོ་ཆེ་རྫོང་ཡོད་ས） སངས་རྒྱས་དབོན་རིན་པོ་ཆེས་ཐོག་མར་ས་གནས་དེར་གཟིམས་གུར་ཕུབ་ནས་ས་འདུལ་དང་།  བྱིན་འབེབས་མཛད་རྗེས་ཟླ་བ་དང་པོར་རྩིག་རྨང་འདིང་སྟེ། ཀ་བཞི་མའི་ལྷ་ཁང་གཉིས་དང་། ཀ་དྲུག་གི་ལྷ་ཁང་། ཆོས་ཁྲི་ཁང་། ནག་ཚང་ཆེན་མོ་རྣམས་བརྩིགས། དེ་ནས་ལོ་ཤས་ནང་གྲྭ་པ་མང་དུ་འདུས་པ་རྣམས་ཀྱིས་སོ་སོའི་གྲྭ་ཚང་བརྩིགས་པས་གླིང་ཡང་རྒྱ་ཆེར་གྱུར།

རབ་བྱུང་ལྔ་པའི་ཆུ་ལུག（1283）ལོ་ནས་རིམ་བཞིན་སྐུ་གསུང་ཐུགས་རྟེན་རྣམས་བཞེངས་པའི་འགོ་བརྩམས་ཏེ། ཞོར་ལ་ཆོས་བཀའ་ཡང་ཡང་གནང་བས་སྐུ་ཚེའི་སྨད་དུ་དགོན་པ་དེར་གྲྭ་པ་སུམ་སྟོང་ཙམ་འཚོགས་པ་བྱུང་།  དེ་རྗེས་ཆོས་རྗེ་ཨུ་རྒྱན་མགོན་པོས་དགུང་ལོ་ཉི་ཤུ་རྩ་བརྒྱད་པ་རབ་བྱུང་ལྔ་པའི་ལྕགས་སྤྲེལ（1320）ལོར་ལྷ་ཁང་ཆེན་མོ་བཞེངས་འགོ་ཚུགས་ཏེ། ཕྱིའི་རྩིག་པ་རིམ་པ་གཅིག་གྱང་དང་། ནང་གི་རྩིག་པ་རིམ་པ་གཉིས་རྡོ་ཆེན།  འོག་ཁང་སྐུ་འཁོར་མཚོན་བྱེད་ཀྱི་ལྷ་ཁང་ཁྲ་བོ་མི་ཚད་བདུན་གྱི་མཐོ་དམན་ཙམ།  བར་ཁང་གསུང་གི་འཁོར་ལོ་མཚོན་བྱེད་ལྷ་ཁང་དམར་པོ་མི་ཚད་ལྔའི་མཐོ་དམན་ཙམ།  སྟེང་ཁང་ཐུགས་ཀྱི་འཁོར་ལོ་མཚོན་བྱེད་ལྷ་ཁང་དཀར་པོ་མཐོ་ཚད་མི་ཕྲེང་ལྔའི་ཚད་ཙམ་ཡོད་པ།  གཙུག་ལག་ཁང་གི་རྒྱ་ཁྱོན་ངོས་གཅིག་ལ་གཞུ་འདོམ་བརྒྱ་དང་སུམ་ཅུ་སོ་གསུམ（འདོམ་གང་ལ་སྤྱི་ཁྲེ་གང་དང་སྐར་མ་བརྒྱད་ཅུ་ཡོད་པར་ཆ་བཞག་ན་སྤྱི་ཁྲེ239.4）རེ་ཡོད་པ།  ལྷ་ཁང་འོག་མའི་རྒྱ་ཁྱོན་ཀ་བ་དྲུག་ཅུ་དང་ཀ་བ་རེའི་སྦོམ་ཚད་འདོམ་དོ་ལྷག་ཙམ། ཀ་བ་རེའི་བར་ཐག་སྤྱིར་བཏང་ལས་རིང་བ་ཞིག་གཞན་ཡང་ཞབས་དྲུང་བླ་བྲང་། ཡང་དགོན་བླ་བྲང་། རྙིང་མ་གྲྭ་ཚང་། སྟག་ལུང་གྲྭ་ཚང་། གསར་མ་གྲྭ་ཚང་བཅས་ལ་གསེར་དངུལ།  ལི་དཀར་དམར། སྨན་འདམ་སོགས་ལས་གྲུབ་པའི་སྐུ་བརྙན་དང་། མཆོད་རྟེན། སྨན་ཐང་། སྒར་བྲིས་ཀྱི་ཐང་ཀ་ཆིག་སྟོང་ལྷག་ཙམ་དང་།       ཆོས་རྩིགས་གཅིག་པུར་ཡང་པོད་གྲངས་ཆིག་ཁྲི་ལྔ་སྟོང་ཙམ་ཡོད། 

སྤྱི་ལོ2006ལོའི་ཟླ5ཚེས25ཉིན།  ཁྲ་འཁྱིལ་མ་གཙུག་ལག་ཁང་དེ་ཉིད་རྒྱལ་སྲིད་སྤྱི་ཁྱབ་ཁང་གིས་རྒྱལ་ཡོངས་ཀྱི་རིག་དངོས་སྲུང་སྐྱོབ་སྡེ་ཚན་གཙོ་བོའི་མིང་ཐོའི་ནང་བཅུག་ཡོད།