དལ་འབྱོར་ལུས་རྟེན་བསྐྱེད་པའི་ཞིང་ས་མ། །

མཆོག་དམན་ཀུན་གྱི་མིག་ལམ་བདུད་རྩི་མ། །

འདོད་ལྡན་དགའ་བ་བསྐྱེད་པའི་མཛེས་ལྡན་མ། །

འཇིགས་བརྒྱད་ཀུན་ལས་སྐྱོབ་མཛད་རྗེ་བཙུན་མ། །

ཆུང་དུས་ཨ་མའི་བརྩེ་དུང་ལུས་ཀྱི་ཟུངས། །

གཞོན་དུས་མཛེས་མའི་བརྩེ་དུང་སྲོག་ལས་བྲིན། །

རྒས་ཚེ་རྒན་མོའི་གཅེས་སྐྱོང་ཚེ་ཡི་རྟེན། །

ཚེ་འདིར་འབྲལ་ཐབས་མེད་པ་བུད་མེད་ཉིད། །

མཁས་པའི་དཔལ་དང་བཙུན་པའི་ནང་ཚུལ་བཟང་། །

མཐོན་པོའི་ཐོབ་དང་དཔའ་བོའི་ཁེངས་པ་སོགས། །

གཅིག་ཅར་དབང་དུ་སྡུད་པའི་བདག་ཉིད་ཅན། །

མཆོག་གསུམ་ལྷ་ལས་རྒྱལ་བ་མཛེས་མའི་ལུས། །

གནམ་ལོ་གསར་པའི་དྲོད་རླུང་མཁའ་ནས་ལྡང་། །

སྦྲང་ཆར་ཟིལ་མས་ཆུ་སྐྱེས་དཔལ་ཡོན་བཞད། །

དཔྱིད་ཀྱི་དཔལ་མོས་མཛེས་མའི་ལུས་སེམས་སྤྲོ། །

གསུམ་བརྒྱད་དུས་ཆེན་བཀྲ་ཤིས་བདེ་ལེགས་ཞུ། །