གུས་ཞབས་དང་འབྲེལ་བའི་མན་ངག

ཡ་ཧུ་དཱ་པའི་ལེགས་བཤད་བདམས་བཏུས། 2016-11-07

རང་གིས་གཞན་ལ་བརྩི་བཀུར་ཞུས་པ་ན།།
གཞན་གྱི་བརྩི་བཀུར་ངང་གིས་རང་ལ་ཐོབ།།
དགའ་བ་གདོང་གིས་མཇལ་ན་བསོད་ནམས་འཕེལ།།
ཁྲོ་བ་འཛུམ་གྱིས་བསུས་ན་བདེ་སྐྱིད་ལྡན།།
གུས་དང་བརྩེ་བའི་ཉམས་འགྱུར་སྲོག་ལས་གཅེས།།
དཀོན་མཆོག་ལ་ཡང་གུས་ཞབས་མཁོ་བ་ལྟར།།
གཉེན་དང་གྲོགས་སོགས་ཐ་ན་རང་གི་དགྲར།།
བཅོས་མིན་སེམས་ཀྱིས་གུས་བཀུར་འཆང་བར་རིགས།།
ཟོལ་བཟང་ངང་རྒྱུད་མི་ཡི་རྩ་དོན་ཉིད།།
གལ་ཏེ་དོར་ན་མི་ཡི་གྲལ་ནས་བུད།།
ལེགས་པར་འཁྱོངས་ན་མི་ཡི་མཚན་ཉིད་ལྡན།།
འཇིག་རྟེན་མི་གཤིས་ཟེར་བ་མེ་ལོང་ལྟར།།
སྒྲིབ་གཡོགས་ཅི་ཡང་དབེན་པ་ཤིན་ཏུ་དཀའ།།
འོན་ཏེ་གཞུང་དྲང་གནད་ལ་མཐོང་ཆེན་དང་།།
རང་སེམས་གསོང་པོར་བསྟན་པ་ཅིས་ཀྱང་མཆོག།
བདེན་པའི་གཏམ་གྱིས་གཞན་སེམས་དཀྲུགས་པ་ལས།།
རྫུན་ཚིག་ཕྲན་བུས་མི་སྲོག་བསླུ་བར་གཅེས།།
དྲོད་ཁོལ་ལྡན་པའི་གཞིས་ཁྱིམ་བདེ་བའི་དཔལ།།
ལས་བརྩོན་འཚོ་སྒྲུབ་གནས་ལ་ཅིས་ཀྱང་འབད།།
འོན་ཏེ་འབད་འབད་བྱ་བའི་བྲེལ་ཟིང་ལས།།
གཉེན་གྱི་ཉེ་དུང་ཁྱོ་ཤུག་མཛའ་འབྲེལ་སོགས།།
དོར་ཏེ་མགོ་བོ་བསྙོགས་པ་བླུན་པོའི་མཚང་།།
བྱ་བ་ཆེ་ཕྲ་གང་ཞིག་གཉེར་བའི་ཚེ།།
རེ་བའི་མགོ་འཕངས་དེ་ཙམ་སྟོད་མི་བྱ།།
འགྲུབ་ན་རྒྱལ་ཁའི་དགོད་སྒྲ་གཏིང་ནས་བཞད།།
མ་འགྲུབ་ན་ཡང་རེ་ཆད་འབྱུང་མི་སྲིད།།

གུས་ཞབས་དང་འབྲེལ་བའི་མན་ངག

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10